Omapulo Ovatangi
Tyokwivisa oviwa ovipe matyipu nalupi?
Sesusi watile: “Oviwa ovipe Viouhamba, mavikapopiwa kombanda yohi aiho, ovanthu aveho vomihoko nomihoko mwene avekeliivilako, onthyulilo pahe aiya.” (Mat. 24:14) Ondaka yapitiywa okuti “onthyulilo” ili movelesikulu ei, no movelesikulu 6, mo Ngeleku yatiwa teʹlos, ipopia onthyulilo youye ou wa Satanasi, mauhanywa-ko movilwa vyo Alumangendom. (Ehol. 16:14, 16) Naina matutwalako okwivisa atee kukamba vala katutu opo ouye ou wa Satanasi uhanywe-ko. Otyipuka etyi tyipilulula etyi ankho tupopia kohale.
Kohale ankho tupopia okuti, matuyeke-po okwiivisa oviwa ovipe tyina ononkhumbi ononene mbamahimbika. Ngwe mambuhimbika nehanyauno lyo Mbambilonia Onene. (Ehol. 17:3, 5, 15, 16) Ankho tusoka okuti tyina ononkhumbi ononene mbamahimbika, Siovaa makayeila epito liouye ou wa Satanasi, vokwehemufende avahanywa-ko. Pahe opo “enima liokankhenda ka Siovaa” liapwa. (Isa. 61:2) Tupu ankho tusoka okuti ava mavakahupa, ovava vala ankho vafenda-le Siovaa pweetyi ononkhumbi ononene mbehenehimbike. Ovo yatyo ankho tuveeleka nova Sundaa vahupile etyi o Selusalei yahanywa-po menima 607 P.K.E. Ova Sunda ovo mokonda yokuhole Siovaa, nokuyele ovivi avapakwa ovilimbo vahupe tyina o Selusalei ihanywa-po. (Isek. 5:11; 9:4) Mahi otyipuka otyo tyalingilwe ova Sundaa, katyilii neetyi Sesusi apopile mu Mateusi 24:14. Onondaka mba Sesusi mbuli movelesikulu oyo mbulekesa okuti, ovanthu vapondola okutavela oviwa ovipe Viouhamba, atee umwe tyina kukamba vala kapii opo o Alumangendom ihimbike.
Otyipuka twanoñgonoka onondaka mbuli mu Mateusi 24:14, tupu tyipilulula etyi ankho tupopia tyiyemba konondaka matukapopia mbukahi “ngomamanya amwe omanene ongandavila” tyili m’Eholololo 16:21. Etyi twetyiovaulula umwe vali nawa twetyimona okuti ovipuka viapopiwa monotesitu ombu onombali vilii. Oityi tupopila ngootyo? Tupopia ngootyo mokonda yeetyi tuhole okumona tyikala ovanthu tyina veiva oviwa ovipe Viouhamba. Paulu wati: “Pokati ka ava veli nokuyovoka . . . oviwa ovipe “efi liomwenyo.” Pala onondyale mba Huku, haviwa-ko, “efi liononkhia.” (2 Kol. 2:15, 16) Onondyale mba Huku veyele oviwa ovipe tulongesa, mokonda tuvepopila okuti ouye wavo, ouye ou wovivi utuminwa na Satanasi, apa katutu mauhanywa-ko. — Swau 7:7; 1 Swau 2:17; 5:19.
Tupu tala okuti omamanya omanene apopiwa m’Eholololo, “ovihuna vimwe ovinene.” Mokutala otyo tyilekesa okuti mononkhumbi ononene, oviwa ovipe mavikapopiwa vali unene, nenyina lya Siovaa alikanoñgonokwa vali unene. (Isek. 39:7) Okuti pomuvo watyo opo tyina Ombambilonia Onene yamahanywa-po, ovanthu mavekesuka noviwa ovipe tulongesa mwivalela efi liomwenyo? Tyipondola ovanthu vamwe tyina vamakamona Ombambilonia Onene ili nokuhanywa-po, mavakahinangela umwe okuti otyipuka etyi Onombangi mba Siovaa ankho vetyipopia-le.
Ine otyo ovipuka mavikaenda ngootyo, opo matyilifu neetyi tyalingilwe ko Isitu. Etyi Ovihuna Ekwii viapwa, pweetyi Siovaa ‘akundisa ovika-huku aviho vyo mo Isitu,’ ovanthu vae ova Isilayeli pokutunda ko Isitu “vaile novanthu ovanyingi veheva Isilayeli.” (Oku. 12:12, 37, 38) Tyipondola ovanthu ovo vahimbikile vala okuyumba onthumbi mu Siovaa, pweetyi vamona Ovihuna aviho Ekwii, Mwisesi alingile.
Vana mavakayumba onthumbi mu Siovaa tyina Ombambilonia Onene yamahanywa-po, mavakakala nomphitilo yokukwatesako onondenge mba Kilisitu, nkhele mavakavasiwa pano pohi pomuvo opo. (Mat. 25:34-36, 40) Ovanthu mavakatiwa vala onongi, tyina kwakamba katutu opo o Alumangendom ihimbike. Pahe opo ovalembulwa aveho, vatambula-le ondyambi yavo keulu.
Otyipuka etyi twanoñgonoka, tyilekesa umwe nawa okuti Siovaa una olwembia olunene, una okankhenda. Ngwe tyili, “kahande nawike eye okuhanywa-ko, mahi wahanda aveho vehike kokulivela.” — 2 Pet. 3:9.