Kala Nokankhenda “Novanthu Aveho”
ETYI Jesus alongesile ovalongwa vae oñgeni ankho vena okuivisa onondaka onongwa, wevepopilile okuti hapeho ovanthu mavahande okutehelela. (Lucas 10:3, 5, 6) Otyo tupu tyihole okumoneka movilinga vietu viokuivisa. Ovanthu vamwe tuvasa movilinga viokuivisa ovakalavi. Tyina vetulinga onya, tyipondola okutupuiya okukala nokankhenda navo, nokuveivisa.
Omunthu wokankhenda utala etyi vakuavo vesukisa novitateka viavo iya uvekuatesako. Mahi oityi matyimoneka inkha katukala nokankhenda novanthu tuvasa movilinga viokuivisa? Kamatukala vali nombili, tyilekesa okuti kamatulingi ononkhono mbokuvekuatesako. Ombili yetu ikahi ngotupia. Opo otupia tuteme unene, tyesukisa omphepo. Tupu, opo ombili yetu ipame, tuna okukala nokankhenda novanthu!—1 Tessalonicenses 5:19.
Oñgeni tupondola okulilongesa okukala nokankhenda, alo umwe tyina tyihapepukile? Matulilongesa onongeleka ononthatu tupondola okuhetekela: Jeova na Jesus iya na apostolu Paulu.
HETEKELA OKANKHENDA KA JEOVA
Mokueenda kuomanima omanyingi ovanthu vapopia omatutu konthele ya Jeova. Mahi no ngotyo, Jeova utualako “okukala nokankhenda na vana vahapandula, no nondingavivi.” (Lucas 6:35) Oñgeni Jeova alekesa okankhenda? Utyilinga mokupua-elundo novanthu aveho. Jeova uhanda “ovanthu aveho” vayovolwe. (1 Timóteo 2:3, 4) Namphila Huku eyele ovipuka ovivi, mahi ovanthu vakolela unene kwe iya kahande nawike ankhie.—2 Pedro 3:9.
Jeova utyii nawa okuti Satanasi ukemba ovanthu. (2 Coríntios 4:3, 4) Ovanyingi valongeswa omatutu konthele ya Huku tunde pouna. Ngotyo, mokonda yonkhalelo vasoka, nonkhalelo velitehelela tyipondola okuvepuiya okutavela otyili. Mahi Jeova uhanda okuvekuatesako. Oñgeni tutyii?
Mongeleka, soka oñgeni Jeova akalele konthele yovanthu vepunda-umbo lyo Ninive. Namphila ankho valinga ovipuka ovivi, Jeova wapopilile Jona okuti: “Okuti hipondola okukala nokankhenda nepunda-umbo enene lyo Ninive, muna ovanthu 120. 000 vehetyivili okupunga otyiwa notyivi?” (Jonas 4:11) Jeova wakalele nokankhenda novanthu ovo, mokonda ankho kavei otyili konthele yae. Moluotyo, Jeova atumu Jona ekevelondole.
Nga Jeova, nonthue tuna okankhenda novanthu. Ovanthu vakolela unene. Tupu nonthue tuhanda okuvekuatesako okumunoñgonoka, alo umwe tyina valinga ngoti kamavetavela otyili.
HETEKELA OKANKHENDA KA JESUS
Nga Tate yae, Jesus nae ankho una okankhenda novanthu “mokonda ankho valingwa onya iya vatahua-tahua ngonongi mbuhena omunthita.” (Mateus 9:36) Jesus ankho utyii omokonda yatyi ovanthu vavasiwa motyitateka otyo. Ononkhalamutwe mbonongeleya ankho vevelinga onya tupu vevelongesa omatutu. Namphila Jesus ankho etyii okuti ovanthu ovanyingi kamavakala ovalanduli vae mokonda yomahunga omanyingi, no ngotyo wevelongesile ovipuka ovinyingi.—Marcos 4:1-9.
Uhasoye inkha omunthu umwe kahande okukutehelela tyina umuivisa otyikando tyo tete
Tyina onkhalelo yomuenyo ipiluluka, ovanthu vapondola okutehelela otyili
Tyina ovanthu vehetavela onondaka onongwa, tuna okulinga ononkhono mbokunoñgonoka omokonda yatyi vasokela ngotyo. Hamwe vasoka omapita konthele Yombimbiliya ine konthele yo Vakristau mokonda vaimbuka okuti ovanthu vamwe veliti Ovakristau, valinga ovipuka ovivi. Vamwe hamwe veiva omatutu konthele yetyi tutavela. Tupu, vamwe hamwe vena owoma wokuti ombunga yavo novanthu vo motyilongo, mavevelingi omukuele inkha vapopia nonthue.
Ovanthu vamwe tuvasa movilinga viokuivisa hamwe valambelele movitateka ovinyingi. Omphange umwe omisionaliu utiwa Kim wapopia okuti ovanthu ovanyingi avasa mo telitoliu yae, vahupa kovita iya vetupu vali ovipuka ankho vali navio kohale. Ovanthu ovo, vetupu vali etyi vakevelela komutwe wandyila. Vetupu ehambu iya kavayumbu onthumbi movanthu. Tupu, apeho valinga atyiho opo Onombangi mba Jeova vayekepo okuivisa. Alo umwe nthiki imwe avahande okumuveta.
Oñgeni Kim atualako okukala nokankhenda namphila ovanthu vemulinga onya? Kim apeho uhinangela onondaka mba Provérbios 19:11, mbati: “Ounongo womunthu, umukuatesako okuhanumana liwa.” Tyina asoka kovipuka ovanthu vo motelitoliu yae valambelele, otyo tyimukuatesako okukala nokankhenda navo. Tupu, ha aveho avasa movilinga viokuivisa vemulinga onya. Alo umwe una ovalongwa motelitoliu oyo.
Tupondola okulipula okuti: ‘Inkha hanoñgonokele otyili, ñgeno nakala ñgeni tyina Onombangi mba Jeova mbuya okumphopila onondaka onongwa?’ Mongeleka, ñgeno nakala ñgeni inkha neivile-ale omatutu konthele Yonombangi mba Jeova? Hamwe nonthue katuetavelele okuiviswa iya ñgeno tuahandele ovanthu vakale nokankhenda nonthue. Jesus wati tuna okulinga nawa vakuetu ngetyi onthue tuhanda okulingwa. Ngotyo, tuna okulinga ononkhono mbokunoñgonoka oñgeni ovanthu velitehelela iya tuna okupwa-elundo navo, alo umwe tyina tyihapepukile.—Mateus 7:12.
HETEKELA OKANKHENDA KA PAULU
Apostolu Paulu ankho una okankhenda novanthu aveho, alo umwe vana ankho vemulinga onya. Omokonda yatyi? Omokonda ankho uhinangela okuti nae ongotyo ali kohale. Wati: “Kohale nali omunthu upopia omapita Huku, ankho ndyimonesa ovanthu ononkhumbi iya ankho ndyitupu onondunge. Mahi, nalekeswa okankhenda mokonda ankho ndyilinga ovipuka nehei iya ankho ndyitupu ekolelo.” (1 Timóteo 1:13) Paulu ankho utyii okuti Jeova na Jesus vakalele nokankhenda nae. Wanoñgonokele nawa omokonda yatyi ovanthu ankho vahandela okumutalameka okuivisa, mokonda nae ankho otyo alinga.
Ovikando vimwe, Paulu wavasile ovanthu ankho vetavela komalongeso omatutu. Oñgeni otyo tyemukalesile? Mu Atos 17:16, tutangamo okuti etyi ankho eli mepunda-umbo lyo Atenas, “wanumanene unene etyi amona okuti epunda-umbo lieyula ovilolo.” Mahi Paulu waundapesile ovipuka ovio opo evelongese. (Atos 17:22, 23) Paulu ankho wivisa mononkhalelo mbelikalaila mokonda ankho uvasa ovanthu velikalaila opo etyivile ‘okuyovola vamwe.’—1 Coríntios 9:20-23.
Tyina tuivisa kovanthu vehetavela ine vetutala monkhalelo yapenga, tupondola okulinga nga Paulu. Tupondola okuundapesa etyi twii konthele yavo opo tuvekuateseko okulilongesa “onondaka onongwa mbotyipuka otyiwa.” (Isaías 52:7) Omphange umwe utiwa Dorothy, wati: “Motelitoliu yetu, ovanyingi valongeswa okuti Huku utupu ohole iya ukoyesa vala ovanthu. Ame ndyivepandula mokonda vetavela ku Huku iya ndyivelongesa etyi Ombimbiliya ipopia konthele yohole Jeova ena, netyi makalinga komutwe wandyila.”
“TUALAKO OKUFINDA OTYIVI NOTYIWA”
Tyina onthyulilo ikahi nokuhika, tupondola okukala nonthumbi yokuti ovituwa ovivi viovanthu “mavivilipo.” (2 Timóteo 3:1, 13) Mahi katupondola okuyeka otyo tyinyone okankhenda tuna novanthu iya nehambu lietu. Jeova upondola okutukuatesako opo ‘tutualeko okufinda otyivi notyiwa.’ (Romanos 12:21) Omukokoli-ndyila umwe utiwa Jessica wapopia okuti movilinga viokuivisa apeho uvasa ovanthu vena elungavi iya vetulinga omukuele. Ayawisako okuti: “Otyo tyisoyesa. Tyina ndyipopia nomunthu, ndyilikuambela ku Jeova opo ankhuateseko okutala omunthu ngetyi emutala.” Otyo tyihole okukuatesako Jessica okuhatale vala konkhalelo elitehelela, mahi alingi ononkhono mbokukuatesako ovanthu.
Onthue tutualako okuovola vana vahanda okuvasa otyili
Momuvo watyo, ovanthu vamwe vapondola okutavela ekuateso lietu iya avelilongesa otyili
Tupu, tuna okulinga ononkhono mbokupameka ovakuatate vetu tyina tuivisa navo. Jessica wapopia okuti tyina aivisa novakuatate iya ovanthu avehetavela, wovola okuhasuku unene notyo. Mahi upopia otyipuka otyiwa, ngetyi ouwa utundilila kovilinga viokuivisa, namphila ovanthu vamwe vehetavela.
Jeova utyii okuti ku onthue pamwe katyapepukile okuivisa. Mahi uhambukwa unene tyina tuhetekela okankhenda kae! (Lucas 6:36) Tyotyili, Jeova kamatualako okukala nokankhenda, noumphua-lundo novanthu vouye uno. Tupondola okukala nonthumbi yokuti wii nawa onalupi maeta onthyulilo. Mahi tyina onthiki oyo ihenehikepo, onthue matutualako okuivisa nombili. (2 Timóteo 4:2) Ngotyo, tutualeiko okuivisa nombili, iya atukala nokankhenda “novanthu aveho.”