3. Omokonda Yatyi Ovanthu Onondalawa Vamonena Ononkhumbi?
Omokonda yatyi okunoñgonoka ekumbululo otyiwa?
Tyituihama unene tyina tumona ovanthu onondalawa vamona ononkhumbi. Mokonda yotyo, vamwe vasoka okuti katyesukisile okukala omunthu ukahi nawa, mokonda no ngotyo momono-ale ononkhumbi.
Soka kuetyi:
Vamwe vetavela okuti ovanthu vankhia avatyitwa vali lya vali. Ovanthu ovo vasoka okuti vana valingile ovipuka oviwa, vatyitwa vali mahi avakala nomuenyo ukahi nawa, mahi vana valingile ovipuka ovivi vatyitwa vali mahi avakala novitateka. Ngetyi tyipopia ovanthu ovo, alo umwe omunthu ondalawa, upondola okumona ononkhumbi inkha kohale walingile ovipuka ovivi. Mahi . . .
Tyina esilivilo patyi omunthu okumona ononkhumbi pehepano, tyina ahahinangela vali ovipuka ovivi alingile puetyi ankho ena omuenyo kohale?
Omokonda yatyi tulingila ononkhono mbokukala nekongoko likahi nawa nokulityilika okuliveta, tyina omuenyo wetu pehepano utei kuetyi tualingile kohale?
OPO UNOÑGONOKE VALI
Tala ovidiu yati Omokonda Yatyi Huku Ayekelelako Ononkhumbi? mo jw.org.
Oityi Ombimbiliya Ipopia?
Okumona ononkhumbi katyilekesa okuti tukahi nokulolwa na Huku.
Mahi ononkhumbi pamwe mbutumonekela vala mokonda tuvasiwa pomphangu yapenga, no momuvo wapenga.
“Okuhateka hakuo vanthuko vapepuka, novita havia vanako vena epondolo, havanongo vala vena okulia, vana valunguka havo vala vena olumono, tupu havokuna enoñgonoko vala vapandwa, mokonda omuvo novitateka viuhulukila vala ovanthu aveho.” — ECLESIASTES 9:11.
Onkhali o tyimwe povipuka vietela ovanthu ononkhumbi.
Ovanthu vapopia ondaka “onkhali” opo vahangunune otyipuka otyivi omunthu alinga. Mahi, Ombimbiliya ipopia ondaka oyo, opo ihangunune onkhalelo yovanthu aveho, tyilinge onondalawa ine onondingavivi, vapiñgana onkhali.
“Ame natyitilwa monkhali, iya ame ndyimukuankhali tundee pomuvo me yange ankhutula.”— SALMO 51:5, Okatoi.
Onkhali yaetela ovanthu ovitateka ovinene.
Onkhali kaituetela vala ovitateka moupanga wetu na Siovaa, mahi tupu yetuyapula kovitungwa vya Huku. Otyo tyaeta ononkhumbi ononene kovanthu aveho.
“Tyina nahanda okulinga etyi tyaviuka, mu ame muna etyi tyapenga.” — OVA LOMA 7:21.
“Ovitungwa aviho kumwe vitualako okukema nokueihamenwa.” — OVA LOMA 8:22.