Etyi Omutungi Wetu Etulongesa Tyitukalesa Nekevelelo
Huku walaa okuti apa katutu metulingila ovipuka oviwa. Mamaneko ononkhumbi, ovanthu aveho kombanda yohi avakala nomuenyo ukahi nawa. (Salmo 37:11) Omokonda yatyi tuyumbila onthumbi momilao ovio? Omokonda “Huku hamunthu-ko pala okukemba.” (Números 23:19) Matutale ovipuka vimwe oviwa Omutungi wetu malingi.
Huku Makahanyako Ovanthu Onondingavivi
“Tyina onondingavivi mbuyova ngeholi, iya vokulinga ovivi vatualako nokupama, mavakanyimuako apeho.” — SALMO 92:7.
Mononthele mbokualamba tuamona okuti ovivi vitualako nokuliyawisa. Otyipuka otyo katyituhuvisa, mokonda Ombimbiliya momukanda wa 2 Timotiu 3:1-5 upopia okuti “kononthiki mbahulilila” ovanthu mavatualako okulinga ovipuka ovivi. Oityi ononthiki mbahulilila? Ouye uno wovanthu vehetavela ku Huku. Apa katutu Huku makahanyako vana vatualako okulinga ovipuka ovivi. Mahi vana vokulinga ovipuka oviwa vetavela ku Huku ovo vala makakala apeho kombanda yohi. Ombimbiliya yati: “Ovaviuki mavakakala kombanda yohi, avakakala-ko apeho-apeho.” — Salmo 37:29.
Huku Mahanyeko Satanasi
“Huku wokuava ombembwa apa katutu makamiangula Satanasi.” — OVA LOMA 16:20.
Tyina Satanasi novilulu viae novanthu valinga ovipuka ovivi mavahanyuako, kombanda yohi makukala ombembwa. Omutungi wetu wati: “Nawike mekevetilisa [mekekutilisa] owoma.” — Miquéias 4:4.
Huku Makamanako Omauvela Nononkhia
“Ekaka lia Huku likahi pokati kovanthu . . . Huku makasekuna ononkhuka momaiho avo, ononkhia kamambukakala-ko vali nii okuliyava nii okulila nii omaluihamo kavikakala-ko vali.” — EHOLOLOLO 21:3, 4.
Ononkhumbi nomauvela mavikapwa-ko mokonda Huku makamanako ovitateka aviho vietwa na Satanasi na Andau na Eva noukuankhali wetu. Mokonda yotyo, “ononkhia kamambukakala-ko vali.” Ovanthu vehole nokutavela Omutungi mavakalala pala apeho. Mahi opi mavakakala?
Omutungi Wetu Mapilulula Ohi Aikala Ouye Omupe
“Ehoko, nohi yakukuta mavikahambukwa, otyipembe matyikeliyolela mokonda mamukatema ononthemo.” — ISAÍAS 35:1.
Tyina Huku amamane-ko ovivi, ohi maikala ouye omupe! Mamukala onomphangu ononyingi mbayova nawa, nokulia okunyingi. (Salmo 72:16) Omalunga nomatala nonondongi mambukasukuka nawa, tupu mamukakala onombisi ononyingi novipuka ovikuavo. Atee umwe onondaka ‘ohi yasiliswa’ tupondola okukembulimbwa! Ovanthu mavakakala momaumbo avo muene. Petupu omunthu wahamakala neumbo liae, ine makaliwa nondyala ine makahepa. — Isaías 65:21, 22.
Huku Makatutilisa Ovanthu Vokuankhia
“Makukakala etutilo.” — OVILINGA 24:15.
Okuti una umwe wahanda okukamona tyina amatutiliswa? Huku yetu Omukulami makakondolela omuenyo ovanthu ovanyingi ine okukevetutilisa opo vakakale pano pohi Mouye Omupe. Nkhele soka oñgeni otyo matyikekuhambukiswa, no ñgeni matyikahambukiswa vana mavakatutiliswa! Oityi tutavelela okuti ovanthu mavakatutiliswa? Omokonda Ombimbiliya ipopia ovanthu ovanyingi, ovakulu novana vatutilisilwe, avakala vali nonombunga mbavo. Tupu Sesusi watutilisile ovanthu, otyo ovanthu ovanyingi vetyiete. — Luka 8:49-56; Suau 11:11-14, 38-44.