Oandyu Italelapo Maliya

OMUHIKUENA ou omuwa o Maliya. Ankho omu Isilayeli, ukala mepundaumbo lio Nazare. Huku ankho utyii okuti Maliya omunthu ondalawa. Otyo atumina oandyu yae Gabriel ipopie nae. Utyii oityi Gabriel atolela Maliya? Tutalei.

Gabriel apopila Maliya okuti: ‘Okamene, ove wokuapandua unene. Yehova ukahi noove.’ Maliya kenemone omunthu ou. Ankho wasukalala, mokonda ketyii oityi Gabriel ahandele okupopia. Mahi Gabriel emupopila okuti tula omutima.

Wati: ‘Uhakale nouoma, Maliya. Yehova wahambukua unene noove. Mokonda yotyo, malingi otyipuka tyimue tyihuvisa pala ove. Apa katutu mokala nomona, iya omuluku okuti o Yesu.’

Gabriel atualako okuti: ‘Omona oo makala omunene, aihanwa okuti Omona wa Huku Omukulami. Yehova memulingi ohamba, nga David. Mahi, Yesu makala ohamba yaapeho, ouhamba wae kamaukapwa.’

Maliya apulu okuti: ‘Otyo matyikala ñgeni? Ame hinenepue. Hinekale nomulume, oñgeni ndyipondola okukala nolukembe?’

Gabriel akumbulula okuti: ‘Epondolo lia Huku maliya kuove. Moluotyo, Omona oo maihanwa okuti Omona wa Huku.’ Oandyu oyo aitolela Maliya okuti: ‘Hinangela Elisabete ombunga yove. Ovanthu ankho vapopia okuti Elisabete omukulu unene pala okukala novana. Mahi apa katutu nae makala nomona. Mokonda Huku utupu natyike tyimupona.’

Maliya apopi okuti: ‘Ndyimupika wa Yehova. Tyilingwe ngetyi wapopia.’ Iya oandyu aiende.

Maliya aende liwa okukatalelapo Elisabete. Etyi Elisabete eiva ondaka ya Maliya, olukembe meimo lia Elisabete alulomboka nehambu. Elisabete akala weyula ospilitu ya Huku, iya apopila Maliya okuti: ‘Ove wapeua ononkhano onongwa mbakolela vali pokati kovakai aveho.’ Maliya akala na Elisabete onohanyi ononthatu, iya akondoka keumbo ko Nazare.

Maliya ankho ukahi pala okunepwa nomulume utiwa o Jose. Mahi, Jose ankho kahande vali okunepa Maliya etyi eiva okuti omunthimba. Moluotyo, oandyu ya Huku aipopila Jose okuti: ‘Uhakale nouoma wokunepa Maliya. O Huku wemuavela omona.’ Maliya na Jose avelinepe, iya avakevelela alo Yesu atyitwa.