Sesusi Wankhimanekwa-le Etyi Ehenetyitwe

Etyi oandyu Gabiliyeli yapopila omuhikuena Maliya okuti mamono omona iya omona oo malukwa okuti o Sesusi, akakala Ohamba maikatumina apeho, Maliya apulu okuti: “Otyo matyiende ñgeni, tyina ame nehenelale nomulume?” — Luka 1:34.

Oandyu Gabiliyeli aimukumbulula okuti: “Ononkhono mba Huku mambukulaukila iya epondolo Liomukulami malikuhiki. Mokonda, omona matyitwa maihanwa okuti omusukuki, Omona wa Huku.” — Luka 1:35.

Tyafuile, opo Maliya etavele onondaka ombo oandyu Gabiliyeli aiyawisako okuti: “Tala! Elisabete ombunga yove nae una onohanyi epandu noulemi, namphila akulupa-le, ngwe ovanthu vemupopia okuti utupu olutyito. Mokonda Huku utupu ondaka naike, ahapondola okufuisapo.” — Luka 1:36, 37.

Maliya etavela etyi oandyu Gabiliyeli yapopia, mokonda wakumbulula okuti: “Ame ndyimupika wa Siovaa! Tyiende na ame ngetyi wapopia.” — Luka 1:38.

Etyi oandyu Gabiliyeli yapita, Maliya elipongiya opo akatalelepo Elisabete kumwe nomulume wae utiwa Sakaliya, vakala konomphunda mbo Sundeya, popepi no Selusalei. Okutunda keumbo lya Maliya alo ko Nasalee, paendwa ononthiki ononthatu ine ononkhuana.

Pahe Maliya ehiki meumbo lya Sakaliya. Tyina anyingila, akukunya Elisabete. Ononkhono mba Huku ambulaukila Elisabete iya, apopila Maliya okuti: “Ove wapandua vali pokati kovakai, tupu omona ukahi meimo liove wapandua unene! Ame, ame-lie opo ndyipahulwe na ina ya Tatekulu yange? Etyi wankhukunya, liwa-liwa omona meimo liange ahomboka mokonda yehambu.” — Luka 1:42-44.

Maliya mokuapandula, akumbulula okuti: “Ame ndyinkhimaneka Siovaa, ame hipondola okuyeka-po okuhambukilwa Huku Omuyovoli wange. Mokonda watala nawa onkhalelo yomupika wae. Iya okupolelela hono ovanthu aveho vomuvo uno mavandyihana okuti, wokuna ehambu. Mokonda Wepondolo wandingila ovipuka ovinene.” Tyimoneka nawa okuti namphila Maliya apandwa, mahi omunkhima auho wewavela Huku. Wapopile okuti: “Enyina liae esukuki. Iya apeho una okankhenda novanthu aveho vokuna onthilo nae.” — Luka 1:46-50.

Maliya atualako okunkhimaneka Huku nonondaka ombu: Huku “walekesa epondolo liae nokuvoko kwae, ayandyanesa vokuna omalusoke omalityindailo momitima viavo. Ovanthu vepondolo wevepola kovipundi viavo vioutumini iya apake kounene vana veliola omitima. Vokuna ondyala wevekutisa novipuka oviwa iya ovahona evetaata mankhanya. Weya okukuatesako Isilayeli omuumbili wae, okuhinangela onkhenda yae apeho, ngetyi apopilile ovakuaukulu vetu, Ambalaiau novatekula vae.” — Luka 1:51-55.

Maliya akala na Elisabete onohanyi ononthatu, tyafuile ankho umukuatesako mokonda onthiki Elisabete makutula ankho ikahi popepi. Otyo ankho otyipuka tyimwe otyiwa valinga, ovakai ovo vevali ovakuatyili vakuatesuako na Huku avakala nomona, okukala mphangu ike momuvo oo wakolela momienyo viavo!

Iya tala okuti Sesusi wankhimanekwa etyi nkhele ehenetyitwe. Elisabete wemuihana okuti, “Tatekulu yange” iya etyi Maliya anyingila meumbo akukunya, omona meimo lya Elisabete “ahomboka mokonda yehambu.” Ngetyi matulilongesa, otyo ankho tyelikalela unene nonkhalelo ovanthu ovakuavo vatekula Maliya, netyi vatekula omona wae ankho matyitwa.