Elongeso 13
Oñgeni Ove Upondola Okuvasa Ongeleya Yotyili?
Onongeleya ambuho mbuhambukiswa Huku, ine ike vala? (1)
Omokonda yatyi kwakalela onongeleya ononyingi mbutola okuti Ovakristau? (2)
Oñgeni ove upondola okwimbuka Ovakristau votyili? (3-7)
1. Yesu waetako ongeleya ike vala yo Vakristau votyili. Ngotyo omuhono kuna okukala vala olutu lwike, ine onthumbo yovafendeli votyili va Yehova Huku. (João 4:23, 24; Efésios 4:4, 5) Ombimbiliya ilongesa okuti kavehi ovanthu vekahi mondyila yahita itwala komwenyo. — Mateus 7:13, 14.
2. Ombimbiliya yapopia okuti konyima yononkhia mbono apostolu, katutu katutu mewaneno lyo Vakristau mukanyingila omalongeso ahavyukile novituwo havyo vakristauko. Ovanthu vamwe vapandyula vana vokutavela opo vevelandule ovo tyipona okulandula Kristu. (Mateus 7:15, 21-23; Atos 20:29, 30) Otyo tukahi nokumonena onongeleya ononyingi mbelikalela vati okuti Ovakristau. Oñgeni tupondola okwimbuka Ovakristau votyili?
3. Etyi tyiimbukisa vali unene Ovakristau votyili eholelo vena pokati kavo. (João 13:34, 35) Ovo kavalongeswa okusoka okuti ovo vavilapo vali tyipona ovanthu vomihoko ine ovivala ovikwavo. Nawike puvo ulongeswa okuyala ovanthu vokovilongo ovikwavo. (Atos 10:34, 35) Molwotyo ovo kavalingi onthele movita. Ovakristau votyili vatala vakwavo ngo vakwatate nonomphange. — 1 João 4:20, 21.
4. Onthele onkhwavo yongeleya yotyili ovanthu vatyo vena onthilo yokwaya kohi Nombimbiliya. Ovo vatavela okuti Ombimbiliya Ondaka ya Huku nokutavela etyi oyo ipopia. (João 17:17; 2 Timóteo 3:16, 17) Ovo vatala Ondaka ya Huku ngotyipuka tyokwakolela vali tyipona omalusoke novityiliyo vyovanthu. (Mateus 15:1-3, 7-9) Ovo vaovola okukwama Ombimbiliya momwenyo wavo wakese nthiki. Molwotyo ovo kavaivisa otyipuka tyimwe ya avalingi otyikwavo. — Tito 1:15, 16.
5. Ongeleya yotyili tupu ina yokuhivilika enyina lya Huku. (Mateus 6:9) Yesu wanoñgonokesa enyina lya Huku, Yehova kuvakwavo. Ovakristau votyili navo otyo vena okulinga. (João 17:6, 26; Romanos 10:13, 14) Ovalye ovanthu potyilongo tyove vatolela vakwavo kombinga yenyina lya Huku?
6. Ovakristau votyili vena yokuivisa Ouhamba wa Huku. Otyo Yesu alinga. Oe apeho watola kombinga Youhamba. (Lucas 8:1) Oe watuma ovalongwa vae okuivisa onondaka ombu kombanda yoohi aiho. (Mateus 24:14; 28:19, 20) Ovakristau votyili vatavela okuti Ouhamba wa Huku oo vala maukaeta ombembwa nomphameko kombanda yoohi ino. — Salmo 146:3-5.
7. Ovalongwa va Yesu kavapondola okulinga otnhele youye ou omuvi’. (João 17:16) Ovo kavelipake monondaka mbouye uno wopulitika ni momawala avo. Ovo velityilika kononkhalo, kovituwo, nokovilinga, vyokunyona vyeyula mouye uno. (Tiago 1:27; 4:4) Ove upondola okwimbuka potyilongo apa ukala othumbo imwe yovanthu vongeleya yokuna omaimbukilo atyo aa Ovakristau votyili?
[Elitalatu kemẽla 27]
Ovakristau Votyili velihole pokati, vena onthilo no Mbimbiliya, nokuivisa kombinga Youhamba wa Huku