Oñgeni Tupondola Okuimbuka Ongeleya Yotyotyili

Opo ove ukale epanga lia Huku, una yokuendela mongeleya yapandwa na Huku. Yesu wati “ovafendeli votyotyili” mavakafenda Huku notyili. (João 4:23, 24) Kuna vala onkhalelo ike yavyuka yokufenda Huku. (Efésios 4:4-6) Ongeleya yotyotyili ituala ovanthu komuenyo waapeho. Anthi ongeleya yomatutu ituala kononkhia.—Mateus 7:13, 14.

Upondola okuimbuka ongeleya yotyotyili mokutala ovanthu vekahimo. Mokonda Yehova ondalawa, novafendeli vae votyotyili tupu vena yokukala onondalawa. Ngetyi omulalandya omuwa wiima omalalandya omawa, nongeleya yotyotyili ilongesa ovanthu okukala onondalawa.—Mateus 7:15-20.

Omapanga a Huku ahumba unene Ombimbiliya. Vetyii okuti Huku oe watuma okuhoneka Ombimbiliya. Ombimbiliya ivekuatesako okulilongesa kombinga ya Huku. Tupu ivekuatesako okutetulula ovitateka vyavo. Ombimbiliya ivekuatesako kovipuka aviho viomuenyo wavo. (2 Timóteo 3:16) Omapanga a Huku alinga ononkhono mbokulinga etyi vekahi nokulongesa.

Omapanga a Yehova ehole vakuavo. Yesu walekesile okuti uhole ovanthu mokuvelongesa kombinga ya Huku. Tupu wavelulile ovavei. Aveho vokuendela mongeleya yotyotyili vena ohole navakuavo. Nga Yesu, kavatombo omapongo, novanthu vomihoko omikuavo, no vovivala ovikuavo. Yesu wapopila ovalongwa vae okuti: mamukaimbukwa okuti muvalongwa vange inkha mukala noluembia pokati kenyi.—João 13:35.

Omapanga a Huku ena onthilo nenyina liae, Yehova. Inkha omunthu umue kei enyina liove, upondola okukala epanga liove liotyotyili? Kapondola. Putyina tuna epanga, tupu twii enyina liae, nokupopia ovipuka oviwa kombinga yae. Aveho vana vahanda okukala omapanga a Huku, vesukisa okunoñgonoka enyina liae nokulipopila vakuavo. Yehova otyo ahanda tulinge.—Mateus 6:9; Romanos 10:13, 14.

Nga Yesu, omapanga a Huku alongesa ovanthu kombinga Youhamba wae. Ouhamba wa Huku, outumino maukapilulula oohi ino omphangu imue ongwa pala okukala. Omapanga a Huku apopila vakuavo onondaka ombo onongwa kombinga Youhamba wa Huku.—Mateus 24:14.

Onombangi mba Yehova mbulinga ononkhono mbokukala omapanga a Huku. Ovo vahumba Ombimbiliya. Tupu vena ohole navakuavo. Ovo vei enyina lia Huku. Vena onthilo nalio. Tupu valongesa vakuavo kombinga Youhamba wa Huku. Onombangi mba Yehova hono, vekahi nokuendela mongeleya yotyotyili.