Anya Ongeleya Yomatutu

Satanasi nonoandyu mbae onombi kavahande ove uundapele Huku. Ovo vahanda okuyapula ovanthu aveho ku Huku. Omaliva patyi vaundapesa? Eliva limue ongeleya yomatutu. (2 Coríntios 11:13-15) Ongeleya yomatutu kailongesa otyili tyikahi Mombimbiliya. Onongeleya mbomatutu mbelifua nonombongo mbahasilivila. Tyina utala onombongo ombo ngoti mbukahi nawa, anthi tyilityili kambusilivila. Okukala nambo mbupondola okukuetela vala ovitateka ovinene.

Omatutu onongeleya kaapondola okuhambukiswa Yehova, Huku yotyotyili. Etyi Yesu ankho ekahi pano pohi, ovanthu vonongeleya vahandele okumuipaa. Ovo ankho vasoka okuti onkhalelo yavo yokufenda yaviuka. Ovo vati: “Onthue tuna vala Tate wike, Huku.” Okuti Yesu watavelele? Ahau, katavelele. Yesu wevepopila okuti: “Onue muna Tate yenyi Eliapu.” (João 8:41, 44) Hono ovanthu ovanyingi vasoka okuti vekahi nokufenda Huku. Anthi, tyilityili vekahi nokuundapela Satanasi nonoandyu mbae onombi.—1 Coríntios 10:20.

Ovanthu vonongeleya mbomatutu valinga ovipuka ovivi. Ouye weyula ovitateka mokonda yovipuka ovivi ovanthu valinga. Ovo valinga omaundalelapo, valua, vavaka, vamonesa emone vakuavo, nokuipaa. Ovanyingi vokulinga ovipuka ovio veli monongeleya. Anthi, onongeleya mbavo kambuvekuatesako okulinga etyi tyaviuka. Ovo kavapondola okukala omapanga a Huku inkha vatualako nokulinga ovipuka ovivi.—Mateus 7:17, 18.

Ongeleya yomatutu ilongesa ovanthu okulikuambela kovilolo. Huku kahande tulikuambele kovilolo. Huku una ehunga. Pahe sokolola, putyino omunthu kapopi nove muene anthi upopia vala nolutalatu luove, uhambukwa? Omunthu oo upondola okukala epanga liove liotyotyili? Ahau, kapondola. Yehova uhanda ovanthu velikuambele vala kuoe muene. Kahande velikuambele kovipuka vihena omuenyo, ovilolo no malutalatu.—Êxodo 20:4, 5.

Ongeleya yomatutu ilongesa okuti tyikahi nawa okuipaa vakuetu movita. Yesu wapopile okuti omapanga a Huku ena yokukala nohole kese umue namukuavo. Onthue katuipaa ovanthu tuhole. (João 13:35) Tupu otyivi okuipaa ovanthu vokulinga ovipuka ovivi. Etyi onondyale mba Yesu mbeile okumukuata, kayekele ovalongwa vae value pala vemuamene.—Mateus 26:51, 52.

Ongeleya yomatutu ilongesa okuti onondingavivi mambukamona emone moifelunu yotupia. Ombimbiliya ilongesa okuti onkhali ituala kononkhia. (Romanos 6:23) Yehova, o Huku yoluembia. Okuti Huku wokuna oluembia upondola okumonesa emone ovanthu? Ahau. Mouye omupe, mamukakala vala ongeleya ike yapadua na Yehova. (Revelação 15:4) Onongeleya ambuho mbokuendela momatutu a Satanasi kambukakalako vali.