Onondaka Mbouhama No. 37

Onondaka Ombu o Pala Ovanthu Aveho

Onthyulilo yo Nongeleya Mbomatutu Ikahi Popepi!

▪ Onongeleya mbomatutu otyityi?

▪ Mambunyimuako ñgeni?

▪ Iya ove mokahupila-pi?

Onongeleya Mbomatutu Otyityi?

Okuti ovivi vikahi nokulingwa menyina lio nongeleya vikunumanesa? Ovita, noukongombanda, novipuka ovivi vilingwa novanthu vapopia okuti vaumbila Huku, okuti kuove tyaviuka? Omokonda yatyi tyimoneka ngoti onongeleya ombo mbukahi nokueta ovitateka ovinyingi?

Onkhali hayo nongeleya-ko ambuho. Oyo nongeleya mbomatutu vala. Yesu Kristu, omunthu wokuapandua unene, walekesa okuti onongeleya mbomatutu mbuhindila ovanthu okulinga ovipuka ovivi, ngatyina ‘omuti omuvi wiima ovinyango viahasilivila.’ (Mateus 7:​15-​17) Ovinyango vionongeleya mbomatutu ovipi?

Onongeleya Mbomatutu . . .

◼ MBULIPAKA MOVITA NOMO PULITIKA: ‘O jornale imue ko Asia yati: Mo Asia no kononthele ononkhuavo, ovatumini vahongiliya ovanthu vonongeleya, opo vafuisepo omahando avo.’ Moluotyo, o jornale oyo ilondola okuti: ‘Ouye wanyingila moulai.’ Onkhalamutwe imue yo nongeleya mo Estado Unido yati: ‘Muna yokuipaa omakongombanda putyina nkhele ehemuipaele.’ Tupu ati, ‘Ipaei omakongombanda aeho menyina lia Huku.’ Mahi, Ombimbiliya yati: ‘Inkha omunthu umue apopia okuti: ‘Ame ndyihole Huku,’ mahi uyele mukuavo, omunthu oo onkhembi.’ (1 João 4:​20) Yesu alo umue wati: ‘Tualeiko okukala nohole no nondyale mbenyi.’ (Mateus 5:​44) Kuove onongeleya mbulipaka movita onoñgapi?

◼ OMALONGESO ONONGELEYA MBOMATUTU ELIYANDYANA: Onongeleya ononyingi mbulongesa okuti ovanthu vena ohande yahankhi putyina omunthu ankhia. Mokonda yelongeso olio, ovanthu vafeta onombongo ononyingi, opo valingilueko omalikuambelo onohande mbavana vokuankhia. Anthi, etyi Ombimbiliya ilongesa tyelikalela. Yati: ‘Ohande ilinga onkhali​—⁠oyo muene mainkhi.’ (Ezequiel 18:⁠4) ‘Ovanthu vokuna omuenyo vetyii okuti mavankhi. Mahi, vokuankhia kavei vali natyike.’ (Eclesiastes 9:⁠5) Yesu walongesa okuti vokuankhia maveya okututiliswa. Mahi, inkha ovanthu vakalele nohande yahankhi, ñgeno etutilo kaliesukisile. (João 11:​11-​25) Okuti ongeleya yove ilongesa okuti ohande kainkhi?

◼ MBUYEKELELA OMAUNDALELAPO: Kovilongo vimue, onongeleya mbuyeka ovalume vanepa ovalume vakuavo, novakai vanepa ovakai vakuavo, vakale ononkhalamuntwe mo nongeleya ombo. Tupu, mbuita kovatumini opo valinge okasamendo kovanthu ovo. No nongeleya mbumwe mbupopia okuti oundalelapo kaulingwa, nambo mbuyekelela ononkhalamutwe mbavo okulala novana. Mahi, oityi Ombimbiliya ilongesa konthele youndalelapo? Ombimbiliya ipopia tyayandyuluka okuti: ‘Muahayondyuei. Tyilinge vokulinga omaundalelapo, no vokufenda ovilolo, na vana valala nomukai wamuene, ine o nomulumue wamuene, ine ovalume vokulala novalume vakuavo . . .kamavapiñgana ouhamba wa Huku.’ (1 Coríntios 6:​9, 10) Okuti ove wii onongeleya mbuyekelela omaundalelapo?

Oityi matyikalingwa komutwe no nongeleya mbokuna ovinyango viavola? Yesu walondola okuti: ‘Kese omuti wahaimi ovinyango oviwa, mautetuapo iya auyumbwa motupia.’ (Mateus 7:​19) Tyotyili, onongeleya mbomatutu mambukanyimuako! Mahi, oñgeni mambunyimuako, iya onalupi? Emonekelo livasiwa mo Mbimbiliya, momukanda wa Revelação kapitulu 17 no 18, liava ekumbululo.

Oñgeni Onongeleya Mbomatutu Mambuya Okunyimuako?

Nkhele sokolola vala elekeso limue lihipululwa mo Mbimbiliya. Omukai wekunga wapumphama kontyinyama tyimue otyinene. Otyinyama otyo tyina omitwe epanduvali no nombinga ekwi. (Revelação 17:​1-4) Omukai oo ekunga oityi tyihangununa? Omukai oo, una oupanga omunene ‘no nohamba mbo kombanda yoohi.’ Wavala ovikutu vikuhuka, uundapesa oisesu, no kuna olumono olunyingi. Tupu, ukahi ‘nokuyapula ovanthu aveho’ novituwa viae vioumbanda. (Revelação 17:18; 18:​12, 13, 23) Ombimbiliya itukuatesako okunoñgonoka okuti omukai oo wekunga, eongano lionongeleya ouye auho. Hangeleya ikeko vala. Mahi, onongeleya ambuho mbokuna ovinyango viavola.

Otyinyama otyo otyinene, kuapumphama omukai oo, omaongano o pulitika ouye auho.a (Revelação 17:​10-​13) Onongeleya mbomatutu mbapumphama kotyinyama otyo otyinene, komaongano ­o pulitika, okuovola okuhongolela ovatumini momatokolo avo.

Mahi, apa katutu, makukapita otyipuka tyimue tyihuvisa. ‘Onombinga ekwi wamona, no tyinyama otyinene, mavapilukilapo omukai wekunga, avemuipaa nokumulula omuvalo wae, avali ohitu yae, avemuyoko notupia.’ (Revelação 17:​16) Apa katutu ovatumini vopulitika, mavapilukilapo onongeleya mbomatutu avembunyimiko ambuho! Olie makahinda okulinga otyipuka otyo? Omukanda wa Revelação mo Mbimbiliya ukumbulula okuti: ‘Huku mapake momitima viavo olusoke luokunyimako onongeleya mbomatutu, opo afuisepo ehando liae.’ (Revelação 17:​17) Enga, Huku meya okukoyesa onongeleya mbomatutu, mokonda yovipuka aviho ovivi mbulinga menyina liae. Mouviuki wae Huku makaundapesa omaongano o pulitika, opo ahanyauneko onongeleya ombo mbomatutu.

Inkha kuhande okuhanyaunuako kumue no nongeleya ombo, oityi ove una yokulinga? Huku walondola okuti: ‘Tundeimo vanthu vange.’ (Revelação 18:⁠4) Moluotyo, pahe ou omuvo wokutila monongeleya mbomatutu! Mahi, opi ove upondola okutilila? Kupondola okuhatekela kuvana vokuti kutupu Huku, mokonda navo maveya okuhanyaunuako. (2 Tessalonicenses 1:​6-9) Omphangu itavela vala okuhupila, omongeleya yotyotyili. Mahi oñgeni moimbuka ongeleya yotyotyili?

Oñgeni Upondola Okuimbuka Ongeleya Yotyotyili

Ovinyango patyi oviwa ongeleya yotyotyili yavela?—Matetus 7:⁠17.

Ongeleya Yotyotyili . . .

◼ IIMBUKILWA KOLUEMBIA: Ovafendeli votyotyili kavalingi ‘onthele youye.’ Kaveliyapaukile mokonda yomihoko ine o yonontheto. Vena oluembia pokati kavo.’ (João 13:35; 17:16; Atos 10:​34, 35) Kaveliipaa, anthi, vaovola okuhupisa vakuavo.​—⁠1 João 3:⁠16.

◼ IYUMBA ONTHUMBI MONDAKA YA HUKU: Ongeleya yotyotyili kailongesa ‘oviso viovakuakulu’ ‘novitumino viovanthu.’ Omalongeso ongeleya yotyotyili atunda Mondaka ya Huku, Ombimbiliya. (Mateus 15:​6-9) Omokonda yatyi? Omokonda ‘Huku oe watuma okuhoneka Ombimbiliya, iya yakolela pala okulongesa, nokuviyula, nokuviukisa ovipuka, nokutetulula nouviuki.​—⁠2 Timóteo 3:⁠16.

◼ IPAMEKA ONOMBUNGA, INA OVITUWA OVIWA, TUPU IKUATESAKO OVANTHU OKUKALA NOVITUWA OVIO: Ongeleya yotyotyili ilongesa ovalume vokuanepa okukala ‘nohole novakai vavo, ngatyina vehole omalutu avo muene.’ Ikuatesako ovakai okukala ‘nehumbilo enene novalume vavo.’ Ilongesa ovana ‘okutavela ko vohe.’ (Efésios 5:​28, 33; 6:⁠1) Tupu, vana vapewa otyilinga mewaneno, vena yokukala novituwa oviwa.​—⁠1 Timóteo 3:​1-10.

Okuti kuna ongeleya yokuna ovituwa ngovio? Omukanda Holocausto da Pulítica, wahonekua mo 2001, wati: ‘Inkha ovanthu ovanyingi vaundapesile etyi Onombangi mba Yehova mbulongesa netyi valinga, ñgeno kutupu ovita, nokuliipaa kukahi nokueta ononkhumbi mouye auho.’

Tyotyili, Onombangi mba Yehova movilongo 235, kavaivisa vala ovitumino vio Mbimbiliya konthele yovituwa oviwa​—⁠mahi, veviundapesa momuenyo wavo. Ita Onombangi mba Yehova vekukuateseko okunoñgonoka oityi Huku ahanda kuove, opo umufende monkhalelo yaviuka. Pahe ou, omuvo wo kulumbana okuovola ongeleya yotyotyili . Wahasete. Onthyulilo yo nongeleya mbomatutu ikahi popepi!​—⁠Sofonias 2:​2, 3.

Inkha uhanda okunoñgonoka vali konthele yonondaka mbo Mbimbiliya mbuiviswa no Nombangi mba Yehova, vehonekela okuundapesa onondaka mbukahi pombwelo.

□ Ndyikahi nokuita ombrochula Mantenha-se Vigilante!

□ Mbambavo, nthaindyei opo mundongese Ombimbiliya.

[Footnote]

[Blurb on page 3]

Onongeleya mbomatutu mbuna oupanga omunene no ‘nohamba mbo kombanda yoohi’

[Blurb on page 3]

‘Tundeimo vanthu vange’