Etyi Tyilingwa Eliongiyo Omwenyo Wetu Woukilisitau

Evi Viapopiwa-mo

• Onondaka Mbokuhimbika 2

• Olumono Lukahi Mondaka ya Huku 3-5

  • Elongomona 3

  • Olumono Lwa Huku 4

Okutanga Ombimbiliya 5

• Kala Nombili Movilinga Viokwivisa 6-14

  • Pokuhimbika Etompho 7

  • Pokukondoka-ko 8

  • Pokulongesa Omunthu Alinge Omulongwa 9

  • Okuhangununa Etyi Tutavela 10

  • Elongomona 11

  • Oñgeni Tyilingwa 12

  • Pokulinga Omalekeso 13

  • Okwivisa Nonovindiu Nomikanda 14

• Omwenyo Wetu Woukilisitau 15-16

  • Elilongeso Li’Ombimbiliya Mewaneno 16

• Pokumanuhula 17

• Pokupandula no Pokupakaila-mo 18

• Omuvo 19

• Osimanu Ewaneno Likahi Nokupilwa 20

• Osimanu Yotyonge 21

• Osimanu Yehinangelo 22

• Omululiki Weliongiyo Omwenyo Novilinga Vietu 23

• Omuhongoli Weliongiyo Omwenyo Novilinga Vietu 24

• Omukulu Wewaneno Wokupakaila-mo Vokulinga Ononthele 25

• Omphangu Onkhwavo Palingilwa Ononthele 26

• Onovindiu 27

1. Ovipuka viapopiwa momukanda omu, vikwatesako vokulinga ononthele meliongiyo Omwenyo Wetu Woukilisitau. Vokuna ononthele otyiwa vatange evi viapopiwa momukanda Omwenyo Wetu Novilinga Vietu, neevi viapopiwa momukanda omu opo vanoñgonoke etyi mbulingwa. Ovaivisi aveho vapondola okupewa ondundo vahonekwe opo vapewe-pewe ononthele. Ovanthu ovakwavo veya apeho komaliongiyo, navo vapondola okupewa ononthele ine vekahi nokulinga evi Ombimbiliya ilongesa, no kuna onondunge mbukala nomunthu ufenda Huku. Omukulu ululika eliongiyo Omwenyo Wetu Novilinga Vietu, una okutomphola nomunthu wehe-mwivisi wahanda okulinga-linga ononthele meliongiyo atale ine wata-mo. Pokutomphola nae, nou umulongesa Ombimbiliya hahe akale-po. (Okuti hatyo, o umwe vakala nae meumbo mahi tyina Ombangi ya Siovaa). Ovipuka esukisa okupopilwa, ovievi vitompholwa nomunthu wahanda okulinga omwivisi. Vaonganekwa Okap. 8 Opalangalafu 8.

ONONDAKA MBOKUHIMBIKA

2. Tyina twamamane okwiimba nokulikwambela, omweendesi una vala ominutu ike apopie ovipuka matulilongesa meliongiyo, haunene vina mavikwatesako ovateheleli.

OLUMONO LUKAHI MONDAKA YA HUKU

3. Elongomona: Lilingwa vala monominutu ekwii. Elongomona olio pamwe litoneka vala ovipuka vitatu aa vivali. Lina okulingwa nomukulu wewaneno aa omukwatesiko wovakulu vewaneno utyivila okulongesa nawa. Ine matuhimbika okulilongesa omukanda omukwavo w’Ombimbiliya, opo omulongomoni maiti vokonomakina vapakeko ovindiu yokuhimbika omukanda maulilongeswa, pahe ai mokuhangununa osapi yelongomona. Una okupotoyola nawa ononthele mbokwesukisa, nokuhangununa omalutalatu ekahi-mo.

4. Olumono Lwa Huku: Onthele ei ikala vala onominutu ekwii. Yeendeswa nomukulu wewaneno aa omukwatesiko wovakulu vewaneno utyivila okulongesa nawa. Omweendesi ulinga vala omapulo otyo ovanthu vakumbulula tyahalambe monosekundu 30. Mahi pokuhimbika no pokumanuhula ahapopi vali natyike. Omweendesi una okulinga omapulo aeho evali, ya oe utyii ine onovelesikulu ambuho mbutangwa, oo kamambutangwa ambuho.

5.  Okutanga Ombimbiliya: Onthele ei ikala vala onominutu ononkhwana. Ipewa ovakwendye, mahi pokuhimbika no pokuvitula kapopi vali natyike. Omweendesi weliongiyo ukwatesako vokulinga onthele ei vetyivile okutanga nawa, avatange umwe etyi tyahonekwa. Mokonda pamwe onthele imwe maitangwa yalema, omukulu wokwaava ononthele usoka nawa atale olie maipewa.

KALA NOMBILI MOVILINGA VIOKWIVISA

6. Onthele ei ikala onominutu ekwii nononthano. Yalingwa ikwateseko ovaivisi na vakwavo vali vakale ovanongo pokwivisa nokulongesa Ombimbiliya ovanthu twehelityiliyile navo. Pamwe novakulu vewaneno vapewa omalekeso oo. Wamapewa onthele, upopilwa oñgeni ilingwa mombulusula yokwati Lilonga Okutanga Nokulongesa no yokwati Humba Ovanthu. Tyina pamakala onthele yati elongomona lina omapulo, opo ilingwa nomukulu wewaneno aa omukwatesiko wovakulu vewaneno utyivila okulongesa nawa. — Tanga popalangalafu 15 papopia oñgeni tyilingwa elongomona lina omapulo.

7.  Pokuhimbika Etompho: Onthele ei ipewa ovakwatate aa onomphange. Tyina yamapewa omukwendye veilinga na mukwendye mukwavo, ine ipewa omuhikwena aveilingi na muhikwena mukwavo. Ine ipewa omukwendye veilinge nomufikwena, otyina ombunga. Vapondola okulinga onthele yavo lutai, okuti hatyo avapumphama. Upondola okutanga vali vimwe popalangalafu 12 no 13.

8.  Pokukondoka-ko: Onthele ei ipondola okulingwa novakwendye, okuti hatyo ailingwa novafikwena. Tyina yamapewa omukwendye, opo veilinga na mukwendye mukwavo. Ine ipewa omuhikwena, valinga na muhikwena mukwavo. (Ovilinga Vietu Viouhamba 5/97 pefo 2) Vapondola okupumphama aa okukala lutai. Vokulinga onthele ei valekesa oñgeni tupopia nomunthu umwe twelivasile-ale nae, pahe atukondoka-ko tukatomphole vali nae. Ine una vali vimwe wahanda okunoñgonoka, upondola okukatanga popalangalafu 12 no 13.

9. Pokulongesa Omunthu Alinge Omulongwa: Onthele ei ipondola okulingwa novakwatate, okuti hatyo ailingwa nonomphange. Tyina yamapewa omukwendye, opo veilinga na mukwendye mukwavo. Ine ipewa omufikwena, veilinga na mufikwena mukwavo. (Ovilinga Vietu Viuhamba 5/97 pefo 2) Vapondola okupumphama aa okukala lutai. Pokuliga onthele ei, valinga ngatyina vekahi metompho liahimbika-le. Katyisukisa valinge umwe evi tulinga movilinga viokwivisa, okupopia onondaka mbokuhimbika no mbokuvitula ine hatyo-ko tyaitwa-po. Tupu katyisukisa okutanga atyiho tyili pomukanda veli nokulilongesa namphila okutyilinga tyahapengele.

10. Okuhangununa Etyi Tutavela: Ine onthele ei elongomona, opo ilingwa nomukwatate. Ine yatiwa elekeso ngeetyi tulinga movilinga viokwivisa, opo tyitei vala ou yamepewa. Tyina yamapewa omukwendye, opo veilinga na mukwendye mukwavo, okuti hatyo vapondola okwilinga nomuhikwena tyina ombunga. Ou weipewa otyiwa apotoyole nawa ekumbululo liepulo likahi ponthele yae, ahangununa nounkhengela ovipuka viapopiwa apa yapolwa. Omwivisi oe mwene utyii ine upopia omukanda apola onthele oyo aa keupopi.

11. Elongomona: Onthele ei ilingwa nomukwendye, mahi eilingi ngatyina elongomona ekahi nokulinga mewaneno. Tyina elongomona malingi liamapolwa mombulusula Humba Ovanthu, po viokwapotoyolwa A, opo etyi mapopi tyina okulekesa oñgeni tupondola okulongesa ovanthu movilinga viokwivisa nonotesitu mbukahi-po. Tyimwe ena okulinga, okuhangununa oñgeni ovelesikulu atanga tupondola okwihangununina omunthu, nokupopia etyi ovelesikulu yatyo mwene-mwene ihangununa. Ineelongomona liapolwa melongeso limwe liombulusula Humba Ovanthu, opo una umwe okupopia oñgeni matulingi ngeetyi tyapopiwa-po tyina tuli movilinga viokwivisa. Ine tyitavela upondola apopi-po tyimwe tyapopiwa monthele 1 yombulusula yatyo.

12. Oñgeni Tyilingwa: Opalangalafu ei neei ilandula-ko, mbukwatesa-ko ava valinga omalekeso okwatiwa “Pokuhimbika Etompho” no okwati “Pokukondoka-ko.” Ine pononthele ombo petupu natyike tyiita okupilula elekeso, opo omunthu una umwe okulinga ngeetyi tulinga movilinga viokwivisa, okulekesa komunthu twavasa otyipuka tyimwe tyapopiwa m’Ombimbiliya, etyipopi umwe nawa, neetyi tulinga ngatwakondoka vali komunthu twapopile-ale nae. Ou malingi elekeso oe mwene utyii ine maavela omunthu omukanda umwe tulongesa nao ovanthu, okuti hatyo okumulekesa ovindiu imwe, aa ketyilingi. Pokulinga omalekeso oo otyiwa umwe okulinga ngatyina mukahi vala nokutomphola nomunthu tyihena apa uli nokutanga, neetyi tulinga tyimoneke okuti tusuka novanthu tulongesa.

13. Pokulinga Omalekeso: Omwivisi upondola okulinga onthele yae ngeetyi tyilingwa potyilongo vakala, alekesa oñgeni tyilingwa tyina twivisa:

1. (1) Umbo na Umbo: Pelekeso olio omwivisi ulekesa etyi tulinga tyina tukahi nokwivisa umbo na umbo, nokulinga ngatyina alikalela omunthu aa okumuhonekela omukanda, no oñgeni tupopia nomunthu twapopile-ale nae pahe atuwane okutomphola vali nae.

2. (2) Okwivisa Tyeheli Movilinga Viokwivisa: Apa omulongwa ulinga ngo mwivisi wavasa omunthu mahi ngwe keli movilinga viokwivisa pahe pokutomphola opo, emulongesa tyimwe. Upondola atangela otesitu omunthu umwe matiwa aundapa nae kovilinga, aa valongeswa aveho kosikola, aa veli nokweendela kumwe mo taxi.

3. (3) Okwivisa Apa Pakwata Ovanthu: Apa omulongwa upondola okulinga ngatyina ekahi nokwivisa nokatuku-tuku komikanda, nokulinga ngatyina aivisa pana palandesilwa, no momatapalo, na pana ovanthu vakaombela, na apa patalamekwa omatuku-tuku, aa pomphangu imwe vali pakwata ovanthu ovanyingi.

14. Okwivisa Nonovindiu Nomikanda: Omulongwa upondola okwavela omunthu avasa omukanda, okuti hatyo emulekesa ovindiu. Ponthele yae ine pena ovindiu, upopia vala etyi ipopia eheihikisa.

OMWENYO WETU WOUKILISITAU

15. Tyina twamamane okwiimba, palingwa onthele imwe ikala onominutu 15, okuti hatyo pamwe pakala ononthele onombali, mbukwatesako ovateheleli okulinga etyi tulilongesa m’Ombimbiliya. Ine kapapopilwe okuti onthele ikahi-po ipondola okulingwa nomunthu omukwavo, ononthele ombo mbulingwa vala novakulu wewaneno pamwe o umwe povawatesiko vavo utyivila okulongesa nawa. mahi tyina pameya onthele imwe ipopia etyi tyesukisa mewaneno, opo ilingwa vala novakulu wewaneno. Ine peya elongomona lina omapulo, melilingi upondola okulinga omapulo eli-po, nomakwavo vali elikwata neetyi onthele yatyo ipopia. Pokuhimbika katyisukisa okupopia onondaka ononyingi opo omuvo wokuhangununa onthele utuuke, novanthu avatomphola-mo. Ine pena ou mapulwa, opo hahe vali aye kopaluku ahakumbululila apa epumphi ine wetyivila.

16. Elilongeso Li’Ombimbiliya Mewaneno: Onthele ei ilingwa monominutu 30. Mahi ilingwa nomukulu wewaneno utyivila okulongesa nawa. (Ine ovakulu vewaneno kavehi, opo tyitavela ilingwe na umwe povakwatesiko vavo utyivila okulongesa nawa) Ovakulu vewaneno ovo vatala olie wata-mo aendese onthele Elilongeso Li’Ombimbiliya Mewaneno. Vana vaholovonwa vaendese Elilongeso Li’Ombimbiliya, otyiwa valinge umwe nawa onthele oyo, etyi ipopia atyiivala umwe nawa, avahalambesa omuvo. Una okuhangununa onotesitu mbatyo, haunene mbokwati Tanga, nokukwatesako ovateheleli okweendela mweetyi veli nokulongeswa. Vokweendesa onthele oyo, tupu otyiwa pamwe-pamwe avatange ononthele mbumwe mbupopia oñgeni tyilingwa onthele ina omapulo ngeetyi Omutala Womulavi. (Omutala Womulavi 04/23. pefo 24, pokakasa) Tyina ono palangalafu mbuli nokulilongeswa mbamapu, katyisukisa vali okupopia ovipuka ovikwavo nankho umwe nkhele pahupa omuvo. Tyina tyitavela, ovaendesi novatangi vapondola okulikalaila mu kese osimanu. Tyina omweendesi weliongiyo amaiti komweendesi welilongeso li’Ombimbiliya ahupise-po omuvo, opo una okutala etyi malingi ahupise-po omuvo. Tyimwe upondola alingi vala omapulo tyihena omutangi.

POKUMANUHULA

17. Onominutu ononthatu. Omweendesi weliongiyo uhinangelesa ovateheleli ovipuka oviwa twelilongesa meliongiyo. Ine nkhele pahupa omuvo, upondola okwiita ovateheleli vapopie ovipuka vapanda meliongiyo, pahe apopi etyi matuya okulilongesa mosimanu onkhwavo. Upondola apopi umwe nomanyina ovalongwa mavalingi ononthele mosimanu ilandula-ko. Tupu ine pena omaiviso, omweendesi upondola okwetangela ewaneno. Ovipuka vimwe ngeetyi omaliongiyo okukaivisa, nokukomba novikwavo vali, katyisukisa okuvilinga omaiviso mokonda vipakwa-le pekwatulu liomaiviso. Ine omuvo kautuuka pala okutanga omaiviso aeho, omweendesi upondola okwita kwaava mavalingi ononthele meliongiyo vemuhupisile-po omuvo. (Tanga opalangalafu 16 no 19) Eliongiyo limanuhuka notyiimbo nelikwambelo.

POKUPANDULA NO POKUPAKAILA-MO

18. Omweendesi weliongiyo una vala ominutu ike apandule omulongwa, nokumupakela-mo ngeetyi tyapopiwa ponthele aundapela. Tyina omweendesi aihana omulongwa opo alinge onthele yae, katyisukisa apopie elongeso likahi nokululika omulongwa. Tyina pahe omulongwa amamane onthele yae, na tyina omweendesi amamane okumupandula, opo pahe ngapo apopia onthele yalulika omulongwa, nokumuhinagelesa nounkhengela oityi ahalingile nawa; emwaavela ondundo ekelilongese vali nawa elongeso ankho limululika pokulinga onthele yae. Omweendesi tupu upondola okupopia ovipuka vimwe vili ponthele omulongwa alinga mavikwatesako omulongwa novateheleli. Ine pena tyimwe omulongwa ahalingile nawa, omweendesi upondola okutomphola nae pokamphengi tyina eliongiyo liamapu tyiyemba kweetyi onthele ankho imululika yapopia, aa onthele imwe vali ikahi mombulusula Humba Ovanthu, okuti hatyo o yokwati Lilonga Okutanga Nokulongesa Nawa, nomomukanda Escola do Ministério. Ine katyetavelele okupopia nae tyina eliongiyo liamapu, upondola okutomphola nae onthiki onkhwavo. — Opo unoñgonoke otyilinga tyomweendesi Weliongiyo Omwenyo Novilinga Vietu, no tyomukulu wewaneno wokupakaila-mo vokulinga ononthele, tanga ponopalangalafu 19, 24, no 25.

OMUVO

19. Petupu onthele naike ilamba momuvo. Nomweendesi weliongiyo umwe kapondola okupopia unene alambesa omuvo. Namphila omukanda wovilinga ulekesa-le omuvo wa kese onthele, katyisukisa okuti na apa omulongwa amana-le etyi ankho ena okupopia akevela umwe atee omuvo waitwa ponthele yae uhika-po. Ine umwe ulambesa omuvo, una okupakailwa-mo pokamphengi nou ukahi nokweendesa eliongiyo kumwe nomukulu wewaneno wokupaikala-mo vokulinga ononthele. (Tanga ponopalagalafu 24 no 25.) Eliongiyo aliho okuti umwe noviimbo nomalikwambelo likala vala ola 1:45 min.

OSIMANU EWANENO LIKAHI NOKUPILWA

20. Tyina ewaneno likahi nokupilwa nomupili womawaneno, eliongiyo lina umwe okulingwa ngeetyi tyikahi Pomukanda Wovilinga. Tyahalingwa vala Elilongeso Li’Ombimbiliya Mewaneno, mokonda ponthele oyo papinga elongomona liovilinga likala onominutu 30, lilingwa nomupili womawaneno. Tyina omupili womawaneno ehenelinge elongomona liae, omweendesi Weliongiyo Omwenyo Wetu Woukilisita, upitulula evi twelilongesa, apopi-po vimwe mavililongeswa mosimanu onkhwavo, ine pena omaiviso eetange, pahe aihana omupili womawaneno. Tyina omutalelipo womawaneno amamane elongomona liae, apopi otyiimbo tyokuvitula eliongiyo, aihana ou wanakwa alinge elikwambelo. Tyina ewaneno lina omweenda, ononthele mbovalongwa mbuhole okulingilwa pomphangu onkhwavo, opo kamambulingilwa-po mosimanu oyo. Ine ewaneno lina ovikundyi, vapondola okutwalako nokulinga omaliongiyo avo, mahi monthiki omweenda alinga elongomona liovilinga aveya okuliongiya newaneno.

OSIMANU YOTYONGE

21. Mosimanu yotyonge tyo nthiki ike no tyononthiki ononthatu, kapakala eliongiyo liomokati kosimanu. Mahi ovanthu aveho mewaneno vena okuhinageleswa velilongese mefendelo liombunga aa okulilongesa vala aveke ononthele ankho mbukahi pala okulingwa meliongiyo.

OSIMANU YEHINANGELO

22. Ine Ehinangelo malilingwa mokati kosimanu, opo katukala neliongiyo Omwenyo Wetu Woukilisitau.

OMULULIKI WELIONGIYO OMWENYO NOVILINGA VIETU

23. Ovakulu vewaneno vaholovona umwe puvo alinge wokululika eliongiyo Omwenyo Wetu Woukilisitau. Omukukuko oo ee ukala notyilinga tyokwonganeka nawa eliongiyo eli, nokutala ine lili umwe nokweenda ngeetyi lina okulingwa. Otyiwa apeho vakale netompho nomukulu wewaneno wokupakaila-mo vokulinga ononthele. Tyina omululiki weliongiyo Omwenyo Wetu Woukilisitau amatambula Omukanda Wovilinga, unaka ovanthu mavalingi ononthele mbonohanyi onombali, okuti umwe ovokulinga ononthele mbovalongwa, noombu mbehe-mbovalongwa, naava mavahongolela eliongiyo mu kese osimanu vetavelwa novakulu vewaneno. (Tanga onopalangalafu 3-16 no 24.) Pokunaka vokulinga ononthele, omululiki weliongiyo utala komanima no kounongo wovalongwa, nokutala ovalie vetyivila okupotoyola nawa ononthele mbavo. Ongootyo alinga nononthele mbatyo ambuho tyina ehenenake ava mavembulingi. Tyahanda umwe ñgeno ovanthu vapewa ononthele mbavo tyina nkhele kukamba onosimanu ononthatu. Tupu vokuna ononthele otyiwa okuvepa okamukanda kokwati Onthele Yove Meliongiyo Omwenyo Wetu Woukilisitau Novilinga Vietu (S-89). Omululiki Weliongiyo, una okulinga atyiho opo ehinangeleso liononthele lipapakwe pekwatulu liomaiviso. Ovakulu vewaneno vapondola okunaka umwe puvo, okuti hatyo omukwatesiko wavo opo velikwatese-ko nomululiki weliongiyo Omwenyo Wetu Novilinga vietu. Mahi ononthele mbehe-malekeso ovalongwa, vembunakela ava vembulinga ovakulu vewaneno vala.

OMUHONGOLI WELIONGIYO OMWENYO NOVILINGA VIETU

24. Onosimanu ambuho umwe povakulu vewaneno ukala omuhongoli weliongiyo. (Ine ovakulu vewaneno kavehi, ovakwatesiko vavo vokwalongoka nawa vapondola okuhongolela eliongiyo.) Omweendesi oe upopia onondaka mbokuhimbika no mbokuvitula. Tupu oe wihana aveho mavalingi ononthele. Upondola okulinga ononthele mbumwe meliongiyo, haunene mbuna pehena-le otyinyingi tyipopiwa-po, hamwe mapalekeswa vala ovindiu kwapwa. Pokupandula ovalongwa otyiwa okwahasete. Ovakulu vewaneno ovo vaholovona ovalie vata-mo vaendaise omaliongiyo. Vana ovakulo vewaneno vatala okuti vata-mo, tyiti umwe ou ahongolela osimanu ei, ou vali ahongolela monkhwavo. Namphila hamwe mewaneno muna ovanthu ovanyingi vata-mo mokuhongolela, mahi omululiki weliongiyo Omwenyo Novilinga Vietu upondola ngae upalaika okuhongolela eliongiyo. Ine omukulu umwe wewaneno wata-mo aendaise Elilongeso Li’Ombimbiliya Mewaneno, opo tupu upondola okuhongolela Eliongiyo Omwenyo Novilinga Vietu. Mahi omuhongoli weliongiyo una okutyivila okupandula vokulinga ononthele, nokuvepakaila-mo tyina tyisukisa, nokweendesa nawa eliongiyo alihalambe momuvo. (Tanga opalangalafu 17 no 19) Ine pena omphamgu, omuhongoli upondola okupumphama kopaluku nomikolofone imwe, otyo aihana vokulinga ononthele tyina nae otyo ahanda. Omweendesi upondola okupumphama kopaluku ponthele yokutanga Ombimbiliya, nonthele aiho Kala Nombili Movilinga Viokwivisa. Okulinga ngootyo katyimane omuvo.

OMUKULU WEWANENO WOKUPAKAILA-MO VOKULINGA ONONTHELE

25. Omukuku wewaneno wokupakaila-mo, tyina tyisukisa oe ukwatesako vakulu vakwavo vewaneno novakwatesiko vavo tyina vamalingi ononthele mbokulongesa mewaneno, okuti umwe omeliongiyo Omwenyo Novilinga Vietu, na tyina vamalingi omalongomona, novaendesi v’Omutala Womulavi, no vokweendesa Elilongeso Li’Ombimbiliya mewaneno, novatangi. Mahi utompholela navo pokamphengi. — Tanga popalangalafu 19.

OMPHANGU ONKHWAVO PALINGILWA ONONTHELE

26.  Ine mewaneno muna ovaivisi ovanyingi, papondola okutaindywa omphangu onkhwavo opo ovaivisi vamwe vakalingaile-po omalekeso. Noopo yatyo otyiwa pakale omukulu wewaneno utyivila okulongesa nawa aendese ononthele ombo. Ine petupu ovakulu vewaneno vatuuka pala okukala notyilinga otyo, opo umwe povakwatesiko vavo utyivila okulongesa nawa, upondola ngae weendesa ononthele ombo. Ovakulu vewaneno ovo vaholovona olie upondola okukala notyilinga otyo. Tupu ovo vatala veñapi mavesukisa okukala-po. Omweendesi weliongiyo ulinga ngeetyi tyapopiwa popalangalafu 18. Ine ewaneno lina omphangu oyo, ovalongwa mavakalingila-po ononthele mbavo, vaya napo ngamwamana okulinga ononthele mbuli pokwati Ovola Olumono Lwa Huku, avakondoka tyina onthele Kala Nombili Movilinga Viokwivisa yamapu.

ONOVINDIU

27. Eliongiyo liomokati kosimanu lina-le onovindiu mbatyo mbaholovonwa ambupakwa mo JW Library®, ya katyipwiya-le okumbuvasa.

© 2023 Watch Tower Bible and Tract Society of Pennsylvania

S-38-NK 9/25