Oityi Tulilongesila ku Jesus

Konthele Yokukala na Vakuetu

Tuna okukala nohole mokonda yatyi?

Okuti ove ulekesa ohole na tyina ovanthu vehekuhole? Inkha tuhanda okuhetekela Jesus, tuna okukala nohole alo na vana vetuyele. Jesus wati: “Iya inkha mukala vala nohole na vana vemuhole, opo tyina esilivilo patyi? Mokonda alo umue ovakuankhali vehole vana vevehole. . . . Anthi, tualeiko okukala nohole no nondyale mbenyi . . . , opo mukale ovana va Hamanene, mokonda oe una okankhenda na vana vahapandula no nondingavivi.”—Lucas 6:32-36; 10:25-37.

Omokonda yatyi tuna okukala ovaeveli?

Tyina tuamalingi otyivi, tuhanda Huku etuevele. Jesus walongesa okuti tyaviuka okulikuambela ku Huku opo etuevele. (Mateus 6:12) Anthi, Jesus tupu wati Huku metuevela vala inkha tuevela vakuetu nomutima auho. Oe wati: “Inkha muevela ovanthu oviponyo viavo, tupu Tate yenyi keulu memuevela vienyi. mahi, inkha kamuevela ovanthu oviponyo viavo, tupu Tate yenyi kamemuevela oviponyo vienyi.”—Mateus 6:14, 15.

Oñgeni ombunga ipondola okukala nehambu?

Namphila Jesus nalumue anepele, mahi tupondola okulilongesila kwe opo tukale nomuenyo wehambu mombunga. Monondaka mbae no movituwa, waava ongeleka tuesukisa okuhetekela. Tala ononkhalelo ononthatu mambulandulako:

1. Omulume una okukala nohole nomukai wae ngetyi ehole olutu luae muene. Jesus waava ongeleka kovalume vokuanepa. Wapopilile ovalongwa vae ati: “Ame ndyimupa otyitumino otyipe, tyokuti kalei nohole pokati kenyi.” Alo pi? Jesus ayauisako okuti: “Ngetyi ame ndyimuhole.” (João 13:34) Ombimbiliya ipopila ovalume vokuanepa konthele oyo okuti: “Onue valume, tualeiko okukala nohole novakai venyi, ngetyi Kristu ehole ewaneno, iya elipakula mokonda yalio. . . . Moluotyo, ovalume vena okukala nohole novakai vavo, ngetyi vehole omalutu avo muene. Una uhole omukai wae ulihole oe muene. Mokonda kutupu omunthu wayalele olutu luae muene. Anthi, ulutekula nokuluyunga nawa, ngetyi Kristu ayunga ewaneno liae.”—Efésios 5:25, 28, 29.

2. Vokuelinepa vena okulityilika okulienda konyima. Okulala nomunthu omukuavo kondye yotyinepo onkhali ku Huku, tupu tyinyona onombunga. Jesus wati: “Kamunetange . . . ‘Moluotyo omulume masipo he na ina, eliwaneka nomukai wae, iya ovo vevali avakala vala ohitu ike’? Ngotyo, kavakala vali ovanthu vevali, anthi vakala ohitu ike vala. Moluotyo, etyi Huku apaka kokanga ike, omunthu ehetyiyapule. . . . Ame ndyimupopila okuti kese umue uhenga omukai wae wahalingile oumbalehi, iya akanepa omukuavo, omulume oo ukahi nokulinga oumbalehi.”—Mateus 19:4-9.

3. Ovana vena okutavela kovohe. Namphila Jesus ankho ehena nkhali iya ovohe ovakuankhali, ankho utavela kuvo. Ombimbiliya ipopia konthele ya Jesus etyi ankho ena omanima 12 okuti: “Oe walauka navo [ovohe yae] iya ehiki ko Nazare, atualako nokuvetavela.”—Lucas 2:51; Efésios 6:1-3.

Okulandula onondonga ombo otyiwa mokonda yatyi?

Jesus wapopia konthele yovipuka alongesa ovalongwa vae ati: “Inkha muanoñgonoka ovipuka evi, mamukala nombembwa inkha muvilinga.” (João 13:17) Opo tukale Ovakristau votyotyili, tuna okutavela omalondolo Jesus etuavela konthele yokukala na vakuetu. Oe wati: “Ovanthu aveho mavaimbuka okuti muvalongwa vange inkha mukala neholelo pokati kenyi.”—João 13:35.

[Ehangununo liolutalatu pefo 19]

Opo unoñgonoke vali konthele oyo, tala okapitulu 14 komukanda Oityi Ombimbiliya Tyili Ilongesa?*

[Ehangununo liolutalatu pefo 19]

* Walingua no Nombangi mba Jeova.

[Ehangununo liolutalatu pefo 18]

Onthengele-popia ya Jesus yomona omupeseli itulongesa okuti tyakolela unene okukala nohole nokuevela. —Lucas 15:11-32.

[Ehangununo liolutalatu pefo 19]

Vokuelinepa vena okulityilika okulienda konyima