Oityi Tulilongesila ku Jesus

Konthele Yomuenyo Mombunga

Olusoke patyi konthele yotyinepo lueta ehambu mombunga?

Otyinepo oupanga umwe wakolela unene. Etyi Jesus apulwa inkha tyitavela okulihenga, akumbulula okuti: “Kamunetange okuti una wevetunga tunde ponthyimbi, wevetungile omulume nomukai, ati: ‘Moluotyo omulume masipo he naina, eliwaneka nomukai wae, iya ovo vevali avakala vala ohitu ike?’ Ngotyo, kavakala vali ovanthu vevali, anthi vakala ohitu ike vala. Moluotyo, etyi Huku apaka kokanga ike, omunthu ehetyiyapule. . . . Kese umue uhenga omukai wae wahalingile oumbalehi, iya akanepa omukuavo, omulume oo ukahi nokulinga oumbalehi.” (Mateus 19:4-6, 9) Tyina ovalinepi valandula elondolo lia Jesus, nokukala nekolelo kese umwe namukuavo, aveho mombunga vakala nepamo nombembwa.

Omokonda yatyi ohole ku Huku yeeta ehambu mombunga?

Jesus wapopile okuti: “‘Una okukala nohole na Jeova Huku yove nomutima wove auho, nomuenyo wove auho no nondunge mbove ambuho.’ Etyi, otyo otyitumino tyotete, notyinene vali. Otyipi otyitumino otyikuavo otyinene? Jesus wati: “Kala nohole na mukuenyi [okukutikinyamo vana vakala kumwe noove—ombunga yove] ngetyi ulihole ove muene.” (Mateus 22:37-39) Moluotyo, etyi tyakolela vali pala okukala nehambu mombunga, okukala noupanga omuwa na Huku, mokonda ohole tuna nae itulunda okukala nohole na vakuetu.

Oñgeni ovalume vokuanepa novakai vapondola okulihambukiswa kese umue namukuavo?

Ovalume vahambukiswa ovakai vavo tyina valandula ongeleka ya Jesus. Oe ankho una ohole yotyotyili newaneno. (Efésios 5:25) Jesus wati: “Omona womunthu keile opo aumbilwe, anthi weya okuumbila.” (Mateus 20:28) Jesus nalumue apopile nonyengo na vana ankho vekahi mombuelo youtumini wae, mahi, ankho uvepameka. (Mateus 11:28) Moluotyo, ovalume vena okuundapesa outumini wavo nohole, monkhalelo imwe yetela ouwa aveho mombunga.

Tupu ovakai vapondola okulilongesila ku Jesus. Ombimbiliya ipopia okuti “omutwe wa Kristu o Huku.” Tupu yati “omutwe womukai omulume.” (1 Coríntios 11:3) Jesus ankho kelitehelela ngatyina ekahi pombuelo mokonda yokutavela ku Huku. Oe ankho una onthilo onene na Tate yae. Jesus wapopile okuti “ame apeho ndyilinga ovipuka vimuhambukiswa.” (João 8:29) Omukai utavela ehongolelo liomulume wae nokukala nohole nonthilo na Huku, uvatela ombunga yae okukala nehambu.

Oityi ovohe vapondola okulilongesila ku Jesus monkhalelo yokutekula ovana?

Jesus ankho ukala omuvo omunyingi novana nokuna esuko nomalusoke avo. Ombimbiliya ipopia okuti: “Jesus waihanena ovana ponthele yae, ati: “Yekei ovana veye kuame.’” (Lucas 18:15, 16) Nthiki imwe, ovanthu ankho vapopia omapita ovakuendye vamwe vapopile konthele yekolelo liavo mu Jesus. Mahi, Jesus wapandele ovakuendye ovo, akandukila vana ankho vekahi nokuvepopia omapita okuti: “Kamunetange okuti, momulungu wovana ovatutu vokunyama mamutundu evihiliko’?”—Mateus 21:15, 16.

Oityi ovana vapondola okulilongesila ku Jesus?

Jesus waava ongeleka ongwa konthele yoñgeni ovana vena okusuka novipuka viopaspilitu. Etyi ankho Jesus ena omanima 12, oe wavasiua mondyuo ya Huku lupumphi pokati kovalongesi, okuvetehelela nokuvelinga omapulo.” Oityi tyatundililako? “Aveho ankho vemutehelela vakalele tyahuva nenoñgonoko liae nomakumbululo.” (Lucas 2:42, 46, 47) Tyotyili, Jesus kelipakele kounene mokonda yenoñgonoko liae. Anthi, enoñgonoko olio, liemukuatesileko okukala nonthilo no vohe. Ombimbiliya ipopia okuti: “Oe watuaileko okuvetavela.”—Lucas 2:51.

[Ehangununo liolutalatu pefo 31]

Opo unoñgonoke vali onthele oyo, tala okapitulu 14 komukanda Oityi Ombimbiliya Tyili Ilongesa?

[Ehangununo liolutalatu pefo 31]

 Walingua no Nombangi mba Jeova.