Oityi Tulilongesila ku Jesus

Konthele “Yonthyulilo”

Onthyulilo yatyi?

Ovalongwa va Jesus vemupulile okuti: “Olipi enyingilikilo malilekesa okuti ove weyale, no lionthyulilo youye?” (Mateus 24:3) Etyi Jesus akumbulula epulo olio, katile etyi matyinyimiko oohi. Anthi, ankho upopia “ouye,” iya aundapesa onondaka mbulekesa omaongano aeho ouye no onongeleya atuminwa na Satanasi. (Mateus 13:22, 40, 49) Jesus ankho ukahi nokusoka ouye oo etyi ati: “Onthyulilo maiya.”—Mateus 24:14.

Oñgeni Jesus apopia onthyulilo?

Onthyulilo youye uno wovivi “onondaka onongwa.” Jesus wati: “Iya onondaka ombu onongwa mbouhamba mambukaiviswa kombanda yoohi aiho, pala oumbangi wovilongo aviho, iya konyima akuya onthyulilo.” Jesus wapopile onthyulilo youye uno okuti: “Makukakala ononkhumbi mbumue onene, mbuhenekaleko tunde konthyimbi youye alo pahe. Tupu, kamambukeya otyikando tyavali. Tyotyili, inkha ononthiki mbatyo ombo kambatepululilwe, ñgeno nawike wayovoka.”—Mateus 24:14, 21, 22.

Olie Makahanyaunuako?

Mavahanyaunuako ovovana veyele nokuhaumbila Jeova na Jesus. Ovanthu ovo kavetavela ku Huku. Jesus wati: “Ngetyi tyali kononthiki mba Noe, otyo matyikakala pokuya Kuomona womulume. Mokonda kononthiki mbatyo ombo, etyi ombila onene nkhele iheneye, . . . ankho kavasukile, alo ombila onene yeya aivekomboko aveho.” (Mateus 24:36-39) Jesus wapopia okuti ovanthu ovanyingi veli metapalo enthanda lituala kehanyauno. Anthi, walaa okuti kuna “ondyila . . . yokuahita ituala komuenyo.”—Mateus 7:13, 14.

Onalupi onthyulilo youye ou maiya?

Etyi apulwa konthele yenyingilikilo liokuya kuae “no lionthyulilo youye,” Jesus wakumbulula okuti: “Mokonda otyilongo matyikalwisa otyilongo otyikuavo iya ouhamba maukalwisa ouhamba omukuavo. Iya kovilongo ovinyingi makukakala ondyala, novinimawe. . . . Iya mokonda yovipuka ovivi mavikeliyawisa, ohole yovanthu ovanyingi maikatenda.” (Mateus 24:3-12) Ovipuka ovivi aviho hono vimoneka vilekesa okuti Ouhamba wa Huku apa katutu mauwetela ombembwa vana vetavela. Jesus wati: “Inkha muatala okuti ovipuka evi vikahi nokumoneka, noñgonokei okuti ouhamba wa Huku ukahi popepi.”—Lucas 21:3.

Oityi ove wesukisa okulinga?

Jesus wapopia okuti Huku “waava Omona wae wongunga, opo kese omunthu umukolela ahakanyimueko, mahi akakale nomuenyo wahapu.” (João 3:16) Opo tukolele mu Huku Nomona wae, tuesukisa okuvenoñgonoka nawa. Moluotyo, Jesus wati: “Omuenyo wahapu oyou, okunoñgonoka ove awike Huku yotyotyili, na Jesus Kristu una watumine.”—João 17:3.

Lunguka opo omasukalalo novitateka vihekutyilike okulilongesa oñgeni molekesa ohole yove ku Huku. Jesus wati: “Liyungei nawa opo omitima vienyi vihakale . . . nesukalalo liovipuka viomuenyo, iya onthiki oyo aimuhupula ngeliva. Mokonda maiya kovanthu vatyo aveho.” Inkha utavela omalondolo a Jesus, ‘mohupu kovipuka ovio aviho mavikeya.’—Lucas 21:34-36.

Opo unoñgonoke vali konthele oyo, tala okapitulu 9 komukanda Oityi Ombimbiliya Tyili Ilongesa?a posapi “Okuti Tukahi Umue Kononthiki Mbokuhulilila?”

[Onondaka Pokatoi]