Oityi Ospilitu Sandu?

JESUS nthiki imwe wapulile ovalongwa vae okuti: “Olie he pokati kenyi, tyina omona wae emuita ohi, oe emuavela onyoka ehemupe ohi? Ine inkha emuita eyiyi, oe emuavela o onge?” (Lucas 11:11, 12) Ovana mo Galileia ankho vehole okulia omayiyi no nohi. Ankho vei okulia patyi vahanda.

Jesus wati onthue tuesukisa okutualako okuita nononkhono ospilitu sandu, ngatyina omona aita okulia tyina ena ondyala. (Lucas 11:9, 13) Okunoñgonoka nawa oityi ospilitu sandu, matyituvatela okunoñgonoka otyilinga tyayo tyakolela momienyo vietu. Moluotyo, tete tutalei oityi Ombimbiliya itulongesa konthele yospilitu sandu.

“Epondolo lio Mukulami Malikufiki”

Ovihonekwa vilekesa nawa okuti ospilitu sandu, ononkhono Huku aundapesa pala okulinga ehando liae. Etyi oandyu Gabrieli yapopila Maliya okuti makatyita omona namphila ankho otyitumphua, oandyu yemupopila okuti: “Ospilitu sandu maikuwila, iya epondolo lio Mukulami malikuhiki. Moluotyo, tupu omona matyitwa matiwa osandu, Omona wa Huku.” (Lucas 1:35) Ngetyi onondaka mba Gabrieli mbulekesa, pokati kospilitu sandu no “nepondolo lio Mukulami,” pena ewaneko.

Olusoke ngolo luvasiwa mo Mbimbiliya. Omuuli Mikeia wati: “Ame muene nakala tyeyula epondolo liospilitu ya Jeova.” (Miquéias 3:8) Jesus walaa ovalongwa vae okuti: “Tyina ospilitu sandu yamemulaukila, onwe mamupewa ononkhono.” (Atos 1:8) Iya apostolu Paulu wapopia konthele “yononkhono mbospilitu sandu.”—Romanos 15:13, 19.

Otyo atyiho tyitulongesa tyi? Ospilitu sandu nepondolo lia Huku, otyipuka tyike. Ospilitu sandu, ononkhono mbuna Jeova aundapesa. Monondaka mbapepuka, ospilitu sandu epondolo lia Huku, ine ononkhono mbae. Iya ononkhono ombo mbuhuvisa ngatyi! Onthue katuvili okunoñgonoka ononkhono ankho mbesukisa pala okutunga ouye auho. Menyina liomuuli Isaia, Jeova uhada tusoke konondaka ombu: “Katulei peulu omaiho enyi iya amutale. Olie watunga ovipuka evi? O Youna utundisa embamba liambo nokumbuvalula, embuihana ambuho kenyina. Mokonda yononkhono ononene, nepondolo enene, naimue pumbo ikambapo.”—Isaías 40:26.

Ngotyo, Ombimbiliya ilekesa okuti ouye auho novipuka aviho vikahimo, nokualulikwa nawa, walingwa “kononkhono ononene,” ine epondolo enene lia Huku Omukulami. Tyimoneka nawa okuti, Ononkhono mba Huku ononene, iya onthue tueya kouye mokonda yononkhono ombo.​—Tala okakasa kati “Ospilitu Sandu Yuundapa.”

Jeova upondola okuundapesa ospilitu sandu yae monkhalelo onene, ngo puetyi atunga ouye auho. Mahi, tupu upondola okuyundapesa pala ouwa wovanthu. Ombimbiliya ipopia unene oñgeni ononkhono mba Huku mbalundile ovaumbili vae pano pohi.

“Ospilitu ya Jeova Ikahi Kuame”

Ovilinga via Jesus viokuivisa vituavela elekeso lihuvisa lio ñgeni ospilitu sandu ya Huku ipondola okulunda ovaumbili vae. Jesus wapopilile ovanthu vo mo Nazare okuti: “Ospilitu ya Jeova ikahi kuame.” (Lucas 4:18) Oityi Jesus alingile ‘kepondolo liospilitu’? (Lucas 4:14) Oe wahakulile kese uvela, watuliyile omapukupuku elunga, wekutisile ovanthu ovanyingi-nyingi no nombolo mbehehi no noohi mbehehi, nokututilisa alo umwe vokuankhia. Apostolu Petulu wapopile Jesus okuti: “Omulume Huku alekesa . . . pounyingi, novilinga vihuvisa, nomalekeso, nomanyingilikilo, Huku alinga menyina liae.”—Atos 2:22.

Ospilitu sandu hono kailingi omahuviso. Anthi, ipondola okulinga ovipuka ovinene pala onthue. Jeova una ehando enene liokuavela ovafendi vae ospilitu sandu yae, ngetyi Jesus akumbululile ovalongwa vae. (Lucas 11:13) Moluotyo, apostolu Paulu ankho upondola okupopia okuti: “Ame ndyina ononkhono movipuka aviho, mokonda ya una umpha epameko.” (Filipenses 4:13) Okuti ospilitu sandu ipondola okulinga otyilinga ngotyo momuenyo wove? Onthele mailandulako maikakumbulula epulo olio.

[Ehangununo liolutalatu pefo 5]

Photodisc/SuperStock

[Onondaka Mbavilapo pefo 5]

Ospilitu Sandu Hamunthu ko Mokonda yatyi

Ombimbiliya yeeleka kumwe ospilitu sandu nomeva. Etyi Huku alaa okukanena ovanthu vae komutwe wandyila, oe wati: “Ame mandyikauyulila omeva ko wokuna ohunga, no nomphupa mofika yokuakukuta. Madyiuyulila ospilitu yange kombuto yove, nononkhano mbange onongwa kovana vove.”—Isaías 44:3.

Tyina Huku auyulila ospilitu yae kovaumbili vae, vakala ‘tyeyula ospilitu sandu,’ ine ‘tyeyuliswa ospilitu sandu.’ Ombimbiliya ipopia okuti Jesus, na João Batista, na Petulu, na Paulu, na Barnabe, novalongwa ankho veliongiya monthiki yo Pendekoste menima 33 P.K., veyulile ine veyulisilwe ospilitu sandu.—Lucas 1:15; 4:1; Atos 4:8; 9:17; 11:22, 24; 13:9.

Nkhele soka: Okuti omunthu upondola ‘okuuyulilwa’ kovanthu ovanyingi? Ove upondola okupopia okuti omunthu ‘weyula’ monthumbo yovanthu? Katyitavela. Ombimbiliya ipopia konthele yovanthu veyula ounongo, nenoñgonoko, ine alo umwe enoñgonoko liaviuka. Mahi, kaipopi omunthu nawike okuti weyula omunthu mukuavo.—Êxodo 28:3; 1 Reis 7:14; Lucas 2:40; Colossenses 1:9.

Mo Gregu yapitiyua “ospilitu” ondaka o pneuʹma, tupu ihangununa epondolo lihamoneka. Ngetyi omukanda Vine’s Expository Dictionary of New Testament Words ulekesa, ondaka pneuʹma, “tete ipopia konthele yomphepo . . . ine omufuimo. Tupu ipopia haunene konthele yospilitu yokuna epondolo enene, mahi kaimoneka, nokuhakuatwa ngomphepo.”

Tyayandyuluka nawa okuti ospilitu sandu hamunthu ko.a

[Onondaka Poutoi]