Okuhongolelwa Nospilitu Ya Huku Pomuvo Wo Vakristau Votete Na Hono
“Ovipuka evi aviho vilingwa nospilitu ike vala.”—1 CORÍNTIOS 12:11.
1. Oityi matulilongesa monthele ei?
MENIMA lio Pendekoste yo 33 kuaendele ovipuka vihuvisa unene! Monthiki oyo Huku wanengulila ovaumbili vae ospilitu yae! (Atos 2:1-4) Huku wahimbika okuundapesa ospilitu yae pala okuhongolela ovanthu vae monkhalelo omphe. Monthele yokualamba, tuelilongesa oñgeni ospilitu ya Huku yakuatesileko ovaumbili vekolelo kohale okulinga ovipuka viepuiya movilinga via Huku. Mahi, oñgeni onkhalelo Huku aundapesa ospilitu yae kohale yelikalela nonkhalelo eyundapesa pomuvo wo Vakristau votete? Iya oñgeni Ovakristau hono vapola ouwa kospilitu sandu ya Huku? Tutalei.
“Ame Uno Mupika Wa Jeova!”
2. Oityi Maliya ankho ei konthele yospilitu sandu?
2 Etyi Jesus anengula ospilitu sandu alaele mondyuo onene mo Jelusalei Maliya nae ankho opo ekahi. (Atos 1:13, 14) Mahi, alo umwe etyi onthiki oyo ihenehikepo, ankho utyiiale okuti Jeova upondola okulinga ovipuka vihuvisa nospilitu yae. Jeova wapolele omuenyo Womona wae keulu eutumu pohi, iya Maliya akala omulemi namphila ankho omumphembela. Maliya wakala omulemi “nospilitu sandu.”—Mateus 1:20.
3, 4. Otyituwa patyi Maliya alekesa? Oñgeni tupondola okumuhetekela?
3 Oityi Jeova aholovonena Maliya? Etyi oandyu yapopila Maliya okuti makutula Omona wa Huku, oe wati: “Ame uno mupika wa Jeova! Tyilingwe muame ngetyi apopia.” (Lucas 1:38) Mokuapopia ngotyo Maliya walekesa otyituwa otyiwa Jeova ankho amonale. Ekumbululo liae lialekesa okuti oe ankho wafuapo pala okutavela ehando lia Huku konthele oyo. Oe kalingile epulo nalike konthele yetyi ovanthu mavasoko okumutala omulemi, ine oñgeni matyikalesa omphunga yae Jose. Etyi apopia okuti omupika wa Jeova, Maliya walekesa okuti oe ankho wayumba onthumbi aiho mu Jeova.
4 Okuti ove pamwe ulitehelela okuti ovilinga una meongano lia Huku ovinyingi unene, kumetyivili okuvifuisapo? Kese umwe puonthue wesukisa okulipula okuti: ‘Ndyina onthumbi nomutima auho yokuti Jeova malingi ovipuka monkhalelo yelikuata nehando liae? Okuti tyotyili ndyilekesa omutima wombili?’ Kala nonthumbi yokuti Huku wavela ospilitu yae vana vemuyumba onthumbi nomutima auho nokumutavela ngo Mutumini.—Atos 5:32.
Petulu Wakuatesilueko Nospilitu Sandu
5. Oñgeni ospilitu sandu yakuatesileko Petulu etyi o Pendekoste yo 33 P.K ihenehikepo?
5 Nga Maliya, apostolu Petulu nae wamuene ononkhono mbospilitu sandu ya Huku etyi o Pendekoste yo 33 P.K ihenehikepo. Jesus waavelele Petulu no noapostolu ononkhuavo epondolo liokutundisa ovilulu. (Marcos 3:14-16) Iya namphila Ovihonekwa kavipopi unene konthele yotyo, mokutala Petulu waundapesile epondolo olio. Ononkhono mba Huku tupu mbamonekele etyi Jesus aita Petulu aye kwe okuendela kombanda Yelunga lio Galileia, iya Petulu aende. (Tanga Mateus 14:25-29.) Tyotyili Petulu wayumbile onthumbi mospilitu sandu opo imukuateseko okulinga ovilinga ovinene. Pahe ospilitu oyo maiyavela Petulu novalongwa ovakuavo epondolo liokulinga ovipuka ovikuavo ovinyingi.
6. Oityi ospilitu ya Huku yakuatesileko Petulu okulinga mokueenda kuo Pendekoste yo 33 P.K.?
6 Motyipito tyo Pendekoste yo 33 P.K., Petulu navakuavo, vapelwe ounongo uhuvisa wokupopia omalaka onongendi veile mo Jelusalei. Iya Petulu akatuka apopila otyinyingi tyovanthu. (Atos 2:14-36) Tyotyili, omulume oo pamwe ankho ukala nowoma ine okulinga ovipuka tyihasoko, wapeua omutima wakola aave oumbangi omunene namphila ankho amoneswa ononkhumbi. (Atos 4:18-20, 31) Huku waundapesa ospilitu yae pala okuavela Petulu enoñgonoko liavilapo. (Atos 5:8, 9) Alo umwe wapelue ononkhono mbokututilisa ovanthu.—Atos 9:40.
7. Omalongeso patyi a Jesus Petulu anoñgonoka vala etyi alembulwa?
7 Etyi o Pendekoste ihenehikepo, Petulu wanoñgonokele ovipuka ovinyingi Jesus alongesa. (Mateus 16:16, 17; João 6:68) Mahi, ankho pena ononthele mbumwe momalongeso a Jesus oe ahanoñgonokele nawa. Mongeleka, Petulu ankho kanoñgonokele okuti Kristu matutiliswa ngomunthu wopaspilitu monthiki yatatu, ine okuti Ouhamba maukala keulu. (João 20:6-10; Atos 1:6) Petulu ankho ketyii okuti ovanthu mavakala nolutu luopaspilitu avakatumina Mouhamba wokeulu. Wanoñgonoka vala omalongeso oo a Jesus, etyi oe muene alembulwa nospilitu sandu mo Pendekoste, nokuholovonwa opo akakale nomuenyo keulu.
8. Ovalembulwa no “nongi ononkhuavo” vena enoñgonoko patyi?
8 Etyi ovalongwa va Jesus vapewa ospilitu sandu, vetyivila okunoñgonoka nawa omalongeso ae ankho vahanoñgonokele. Ospilitu sandu yavatela ovahoneki vo Vihonekwa vio Vakristau mo Gregu okuhangununa otyili tyihuvisa konthele yevangelo lia Jeova. (Efésios 3:8-11, 18) Hono, ovalembulwa no “nongi ononkhuavo” vapondola okulilongesa nokunoñgonoka otyili otyo. (João 10:16) Ove upanda enoñgonoko Liondaka ya Huku tupewa nospilitu sandu?
Paulu Wakalele “Tyeyula Ospilitu Sandu”
9. Ospilitu sandu yakuatesileko Paulu okulinga tyi?
9 Etyi palamba enima tunde po Pendekoste yo 33 P.K., Saulu weya okuihanwa okuti o Paulu, nae wapeua otyiawa tyospilitu sandu ya Huku. Ospilitu yaavelele Paulu ounongo wokulinga ovipuka vituetela ouwa hono. Paulu watumua okuhoneka omikanda 14 Viombimbiliya. Iya ngetyi tyaendele na Petulu, ospilitu ya Huku yakuatesileko Paulu okunoñgonoka nokuhoneka nokuayandyuluka konthele yekevelelo liokukala apeho nomuenyo keulu. Tupu ospilitu sandu yaavelele Paulu epondolo liokuhakula, nokutundisa ovilulu, nokututilisa vokuankhia! Mahi, Paulu wapelue nospilitu sandu epondolo liokulinga otyipuka tyimwe tyakolela vali. Ovaumbili va Huku vapewa epondolo liokulinga otyipuka otyo hono, namphila kavelipewa kehuviso.
10. Oñgeni ospilitu sandu yakuatesileko Paulu okupopia nounongo?
10 Paulu, wakalele “tyeyula ospilitu sandu,” apopi nonganga tyehena owoma. Otyo atyikuatesako unene omutumini woko Chipre ankho ukahi nokutehelela etompho olio! Omutumini oo wetavela otyili mokonda “wahuva nelongeso lia Jeova.” (Atos 13:8-12) Tyotyili, Paulu ankho utyii nawa okuti ospilitu sandu ya Huku yakolela unene tyina tupopia konthele yotyili. (Mateus 10:20) Oe konyima waita ewaneno lio Efesu vemuitileko opo apewe “ounongo wokupopia.”—Efésios 6:18-20.
11. Oñgeni Paulu ahongolelelwe nospilitu ya Huku?
11 Ospilitu sandu kayakuatesileko vala Paulu okupopia, mahi pamwe ankho imutyilika okupopila ponomphangu mbumwe. Etyi Paulu ankho alinga oungendi wae woumisionaliu, ankho uhongolelwa nospilitu ya Huku. (Atos 13:2; tanga Atos 16:6-10.) Jeova nkhele uhongolela ovilinga viokuvisa nospilitu yae. Nga Paulu, ovaumbili aveho va Jeova ovataveli, valinga ononkono mbokuivisa otyili nombili nokuhena owoma. Namphila ehongolelo lia Huku hono lihamoneka ngetyi tyali pomuvo wa Paulu, onthue tupondola okukala nonthumbi yokuti Jeova ukahi nokuundapesa ospilitu sandu yae opo vokuhanda vatehelele otyili.—João 6:44.
“Ovilinga Vielikalaila”
12-14. Okuti ospilitu ya Huku yundapa monkhalelo ike vala movaumbili vae aveho? Hangununa.
12 Okuti omahipululo ononkhano onongwa Jeova apele ewaneno liovalembulwa kohale, apameka ovaumbili vae hono? Tyotyili apameka! Hinangela onondaka Paulu atuminwe okuhonekela ewaneno mo Korintu konthele yoviawa vihuvisa viospilitu mononthiki mbae: “Kuna oviawa vielikalela, mahi kuna vala ospilitu ike, iya kuna ononkhalelo mbelikalaila mbokuundapa, mahi kuna vala Tatekulu wike, iya kuna ovilinga vielikalaila, mahi o Huku wike vala ulinga ovilinga aviho movanthu aveho.” (1 Coríntios 12:4-6, 11) Mahi, ospilitu sandu ipondola okuundapa mononkhalelo mbelikalaila movaumbili velikalela va Huku pala okulinga ehando liae. Tyotyili, ospilitu sandu ipewa aveho, “otyunda otyitutu” tya Kristu no ‘nongi mbae ononkhuavo.’ (Lucas 12:32; João 10:16) Mahi, kayuundapa apeho monkhalelo yelifwa mu kese munthu mewaneno.
13 Mongeleka, ovakulu vewaneno vaholovonwa nospilitu sandu. (Atos 20:28) Mahi, Ovakristau ovalembulwa kavaundapa aveho ngovakulu vewaneno. Omokonda yatyi tupopila ngotyo? Omokonda ospilitu ya Huku yuundapa mononkhalelo mbelikalela mu kese munthu mewaneno.
14 Ospilitu ilunda ovalembulwa okukala nonthumbi yokuti ovo ovana va Huku, oyo Jeova aundapesa pala okututilisa Jesus pala omuenyo keulu. (Tanga Romanos 8:11, 15.) Oyo ospilitu Jeova aundapesa pala okuetako ouye. (Gênesis 1:1-3) Tupu, Jeova waundapesile ospilitu oyo pala okuavela Bezalel ounongo wokulinga ovilinga viakolela mekaka liefendelo, nokuavela epondolo Sansau opo alinge ovilinga ankho vihevilwa nomunthu nawike, nokukuatesako Petulu okuendela kombanda yomeva. Mahi, okuhongolelwa nospilitu ya Huku hatyipuka tyike nokulembulwa nospilitu ya Huku. Okulembulwa nospilitu ya Huku onkhalelo ike vala yelikalela omu ospilitu ya Huku yundapa. Huku oe uholovona olie malembula nospilitu yae.
15. Okuti okumbatisalwa nospilitu sandu matyitualako apeho? Hangununa.
15 Ospilitu sandu ya Huku apeho yundapa movaumbili vae vekolelo mononkhalelo mbelikalaila. Ikahiale nokuundapa muvo omanima omanyingi etyi Huku nkhele ehenehimbike okulembula ovanthu. Okulembulwa nospilitu sandu tyahimbika mo Pendekoste yo 33 P.K., mahi kamatyitualako apeho. Okumbatisalwa nospilitu matyipu, mahi ospilitu sandu maitualako okuundapa movanthu va Huku opo vetyivile okulinga ehando liae apeho.
16. Ospilitu sandu ikahi nokukuatesako ovaumbili va Huku hono okulinga tyi?
16 Ospilitu sandu ikahi nokukuatesako ovaumbili va Huku hono okulinga tyi? Revelação 22:17 ikumbulula okuti: “Ospilitu nondombwa vatualako okuti: ‘Endyu!’ Iya una wetyiiva atie: ‘Endyu!’ Iya una wokuna ohunga eye. Una wahanda atambule otyali omeva omuenyo.” Nombatelo yospilitu sandu, Ovakristau hono vekahi nokukonga “una uhanda” okutavela omeva omuenyo atunda ku Jeova. Ovakristau ovalembulwa vekahi nokuhongolela ovilinga ovio. Anthi, onongi ononkhuavo, velipaka kumwe navo movilinga viokukonga ovanthu. Aveho kumwe vaundapa nospilitu sandu ike vala pala okulinga ovilinga ovio. Aveho, velipakula ku Jeova avambatisalwa “menyina lia Tate, no lio Mona, no liospilitu sandu.” (Mateus 28:19) Iya aveho valekesa otyinyango tyospilitu momuenyo wavo. (Gálatas 5:22, 23) Nombatelo yospilitu ya Huku, valinga ononkhono mbokukala nomuenyo wasukuka uhambukiswa Huku.—2 Coríntios 7:1; Revelação 7:9, 14.
Tualako Okuita Ospilitu Sandu
17. Oñgeni molekesa okuti una ospilitu ya Huku?
17 Tyilinge wapeua na Huku ekevelelo liokukala pano pohi ine okuenda keulu, Jeova upondola okukuavela “ononkhono mbavilapo” opo utualeko okukoleleya alo konthyulilo. (2 Coríntios 4:7) Ovanthu vapondola okukulinga omukuele mokonda yokuivisa onondaka onongwa Mbouhamba. Mahi hinangela okuti “inkha upopiwa omapita mokonda yenyina lia Kristu, umuna-mbembwa, mokonda ospilitu yenkhimano, ospilitu ya Huku ikahi noove.”—1 Pedro 4:14.
18, 19. Oñgeni Jeova mekukuatesako nospilitu sandu yae? Oityi wesukisa okutualako okulinga?
18 Ospilitu sandu otyali Huku aavela vana veyoovola tyotyili. Kaitukalesa vala nounongo, mahi tupu iyawisa ehando lietu liokuundapa unene movilinga viae. “Huku moluehando liae, ukahi nokuundapa mokati kenyi, opo mukale nehando, nokutyilinga.” Otyali otyiwa tyospilitu sandu, kumwe nononkhono tulinga opo tutualeko “okukakatela mondaka yomuenyo,” matyitukuatesako ‘okutualako okulinga ovipuka vieta eyovo [lietu.] Tualeiko okutyilinga nonthilo nonthekete.’—Filipenses 2:12, 13, 16.
19 Nonthilo aiho mospilitu ya Huku, linga kese tyilinga nomutima auho, linga nounongo ovilinga upewa, nokuita Jeova ekukuateseko. (Tiago 1:5) Jeova mekukuatesako okunoñgonoka Ondaka yae, nokutetulula ovitateka, nokuivisa onondaka onongwa. “Tualeiko okuita, opo mupewe, tualeiko okuovola opo muvase, tualeiko okutotola, opo muyelulwe,” iya otyo tyakutikinya okuita ospilitu sandu. (Lucas 11:9, 13) Tyotyili, tualako okuita ku Jeova okuti ove uhanda okukala ngovaumbili vae, vokohale no vohono, vana vahongolelwa nospilitu sandu ya Huku.
Okuti Upondola Okuhangununa?
• Nga Maliya, otyituwa patyi matulekesa tyipondola okutuetela ouwa?
• Omonkhalelo patyi Paulu ahongolelwa nospilitu ya Huku?
• Oñgeni ovaumbili va Huku vahongolelwa nospilitu yae hono?
[Olutalatu pefo 26]
Ospilitu ya Huku yakuatesileko Paulu okufinda ovilulu
[Olutalatu pefo 28]
Hono, ospilitu ya Huku ikuatesako Ovakristau aveho, ovalembulwa no nongi ononkhuavo