Okuti Upondola Okutavela Komahuviso Apopiwa Mombimbiliya?
INKHA ukahi nokutolelwa ehipululo lihuvisa, okuti oukuatyili womunthu ukahi nokupopia ehipululo hao maukukuatesako inkha motavela ine kumetavela kehipululo? Oukuatyili oo, kaukutikinya vala onkhalelo omunthu apopia ehipululo, mahi tupu inkha apeho upopiale otyili. Tupu, inkha apeho ukutolela otyili, nalumwe ekukembele, una ehunga eewa liokutavela etyi pahe ekahi nokukupopila.
Otyili otyo tyelifwa nomahuviso ekahi Mombimbiliya. Nawike puonthue ankho una omuenyo etyi omahuviso oo aendeleko. Mahi tupondola okunoñgonoka inkha omahipululo Ombimbiliya o otyotyili. Ñgeni? Tutalei ononthele mbumwe mbulekesa okuti omahuviso Ombimbiliya o otyotyili.
Omahuviso omanyingi alingilwa pounyingi. Pamwe omahuviso ankho amonwa novanthu ovanyingi. (Êxodo 14:21-31; 19:16-19) Ankho kaalingwa tyaholama, kokule novanthu.
Omahuviso ankho alingwa monkhalelo yehepuilisa. Ankho kakuhikwa onohiva ine onoñgoma, nokutunthukwa, nokutemesa ovikandiyelu. Haunene, omahuviso apopiwa Mombimbiliya ankho alingilwa kese omphangu, natyina ovanthu vaita. (Marcos 5:25-29; Lucas 7:11-16) Ngotyo, omahuviso oo, ankho kaalingwa monkhalelo yapanguale.
Vana ankho valinga omahuviso, kaveelingi pala okuovola ounene, nomunkhima, nomalumono. Mahi ankho opala okunkhimaneka Huku. (João 11:1-4, 15, 40) Kese umwe ankho ulinga omahuviso opo akale omuhona ankho uhitiswa.—2 Reis 5:15, 16, 20, 25-27; Atos 8:18-23.
Omahuviso elikalaila ekahi Mombimbiliya alekesa okuti kaalingilwe kononkhono mbovanthu. Mongeleka, elunga nomphepo viatuliswa, omeva apilululwa ovinyu, ombila yatalamekwa aitumwa ihimbike vali okuloka, ovavei vahakulwa, iya omaiho ovamphoki apatulwa. Omahuviso oo aeho, nomakuavo vali, alingwa nombatelo yononkhono mbavilapo kovanthu aveho.—1 Reis 17:1-7; 18:41-45; Mateus 8:24-27; Lucas 17:11-19; João 2:1-11; 9:1-7.
Alo umwe onondyale vamuene omahuviso, kavaanyene okuti alingilwe. Etyi Jesus atutilisa epanga liae Lasalu, ononkhalamutwe mbonongeleya ankho veyele Jesus kavaanyene okuti Lasalu ankho wankhia. Okuti ankho vapondola okuanya? Lasalu ankho ukahiale meendo ononthiki ononkhuana. (João 11:45-48; 12:9-11) Alo umwe etyi palambale omanima omanyingi konyima yononkhia mba Jesus, ovahoneki vomukanda wova Judeu utiwa Talmude vatualako okutavela okuti Jesus ankho una epondolo liokulinga omahuviso. Ovo ankho velipula vala ondyivindyivi yepondolo olio. Tupu, etyi ovalongwa va Jesus vaetelwe kombonge onene yova Judeu, kavapulilwe okuti: “Onwe mualinga ehuviso?” Mahi vapulwa okuti: “Okononkhono mbalie ine omenyina lialie muetyilinga?”—Atos 4:1-13.
Okuti upondola okutavela etyi Ombimbiliya itupopila konthele yomahuviso? Okutala kuetyi tuelilongesa, tyayandyuluka nawa okuti omahipululo Ombimbiliya konthele yomahuviso o otyotyili. Kuna omahunga omakuavo etukuatesako okuyumba onthumbi komahipululo Ombimbiliya. Mongeleka, tyina Ombimbiliya ipopia etyi tyaendeleko, apeho ipopia omuvo, nomphangu, nomanyina ovanthu vakutikinyuamo. Alo umwe vana vokupenya Ombimbiliya, vahuva noukuatyili womahipululo Ombimbiliya. Omaulo omanyingi Ombimbiliya ekahi nokufuiswapo nawa-nawa. Tupu, Ombimbiliya ina omalondolo omanyingi konthele yoñgeni matulingi oupanga omuwa, nomalondolo akuatesako ovanthu aveho. Konthele yokulinga oupanga navakuetu, omalondolo avasiwa Mombimbiliya akolela unene.
Inkha nkhele kuyumbu onthumbi Mombimbiliya, omokonda yatyi uhaovolela omuvo opo wiitange vali nawa? Tyina wameinoñgonoka vali nawa, tupu nonthumbi yove mailiyawisa. (João 17:17) Moimbuka okuti upondola okuyumba onthumbi kuetyi ikupopila konthele yomahuviso aendeleko kohale. Putyina utavela komahipululo oo, mokala nomahunga omawa okuyumba onthumbi muetyi Ombimbiliya ipopia okuti matyikamoneka apa katutu.
[Olutalatu pefo 5]
Onondyale mba Jesus kavaanyene okuti Lasalu ankho wankhia