Okuti Tuesukisa Okulikuambela ku Jesus?
O MUOVOLOLI umwe, wapulile ovakuendye novahikuena valamba po 800 vo nongeleya ononyingi, inkha vetavela okuti Jesus ukumbulula omalikuambelo. Ovanyingi puvo vapopia okuti, ukumbulula omalikuambelo. Mahi omuhikuena umwe, pomukanda wae wanyimapo enyina lia Jesus, ahonekapo “Huku.”
Oityi ove usoka? Tuesukisa okulikuambela ku Jesus ine oku Huku?a Opo tuvase ekumbululo, tete tutalei oñgeni Jesus alongesile ovalongwa vae okulikuambela.
JESUS WETULONGESA TULIKUAMBELE KULIE?
Jesus wetulongesa tupu wetulekesa okulie tuna okulikuambela.
IPokulikuambela ku Tate yae keulu, Jesus waava ongeleka opo atuho tuilandule
ETYI ALONGESA: Etyi umwe povalongwa aita ku Jesus ati: “Tatekulu tulongese oñgeni matulikuambela,” Jesus ati: “Tyina mulikuambela, popiei okuti: ‘Tate.’” (Lucas 11:1, 2) Tupu, Melongomona liae lio Komphunda, Jesus wapopilile ovateheleli vae opo velikuambele. Wati: “Likuambela ku Tate yove.” Tupu, evepameka mokuvepopila okuti: “Tate yenyi wii ovipuka patyi onwe muesukisa, tyina nkhele muhenemuite.” (Mateus 6:6, 8) Motyinthiki ahulililako pano pohi, Jesus wapopilile ovalongwa vae okuti: “Kese otyipuka muiita ku Tate, memupe-tyo menyina liange.” (João 16:23) Ngotyo, Jesus wetulongesa tulikuambele ku Tate yae, Tate yetu, Jeova Huku.—João 20:17.
ONGELEKA YAE: Ngetyi Jesus alongesile vakuavo okulikuambela, nae welikuambelele okuti: “Ame ndyikuhivilikila pokati kounyingi Tate, Tatekulu yeulu nohi.” (Lucas 10:21) Otyikando otyikuavo, “Jesus atale peulu ati: ‘Tate ame ndyikupandula etyi wendyiva.’” (João 11:41) Iya etyi Jesus ehenenkhie, welikuambelele okuti: “Tate, ndyipakula omuenyo wange pomaoko ove.” (Lucas 23:46) Pokulikuambela ku Tate yae—keulu “Tatekulu yeulu nohi”—Jesus waava ongeleka atuho tuna okulandula. (Mateus 11:25; 26:41, 42; 1 João 2:6) Okuti ongotyo ovalongwa vo tete va Jesus vanoñgonokele onondonga mbae?
OVAKRISTAU VO TETE ANKHO VELIKUAMBELA KULIE?
Etyi Jesus akondoka keulu, palamba vala onosimanu mbumwe, ovalongwa vae avahimbika okumoneswa ononkhumbi nonondyale mbavo. (Atos 4:18) Avelikuambela okuita ekuateso, mahi okulie velikuambelele? Ombimbiliya yati, “avakatula onondaka mbavo ku Huku,” okulikuambela opo Huku atualeko okuvekuatesako “menyina liomuumbili [wae] osandu Jesus.” (Atos 4:24, 30) Ngotyo, ovalongwa valandulile onondonga mba Jesus konthele yokulikuambela. Velikuambelele ku Huku, ha ku Jesus.
Konyima, apostolu Paulu wapopile oñgeni ankho elikuambela, no ñgeni omapanga ae ankho elikuambelele. Etyi ahonekela Ovakristau ovakuavo, wati: “Onthue tupandula Huku Tate ya Tatekulu yetu Jesus Kristu, apeho tyina tulikuambela mokonda yenyi.” (Colossenses 1:3) Tupu Paulu wahonekele ovakuatate vae okuti “menyina lia Tatekulu yetu Jesus Kristu upandula apeho Huku yetu Tate yetu mokonda yovipuka aviho.” (Efésios 5:20) No nondaka ombo, tuaimbuka okuti Paulu ankho waavela ondundo vakuavo opo velikuambele ku “Huku yae, Tate yae mokonda yovipuka aviho”—mahi ankho utyilinga menyina lia Jesus.—Colossenses 3:17.
Ngetyi tyalingile Ovakristau vo tete, nonthue tupondola okulekesa okuti tuhole Jesus mokulandula onondonga mbae konthele yokulikuambela. (João 14:15) Putyina tulikuambela ku Tate yetu keulu matukala nonthumbi yokuti Jeova utehelela omalikuambelo etu, ngetyi tyalingile omuhoneki wo Salmo 116:1, 2, wati: “Ndyihole Jeova, mokonda utehelela ondaka yange . . . ame mandyimuihana mokueenda kuononthiki mbange.”b
a Ovihonekwa vipopia okuti, Huku na Jesus kavelifwe.
b Opo omalikuambelo etu etavelwe na Huku, tuna okulinga ononkhono ononene mbokuendela movitumino viae. Opo unoñgonoke vali konthele yotyo, tala okapitulu 17 komukanda Oityi Ombimbiliya Tyili Ilongesa?