Okukala Omukuatyili Tyieta Ouwa

Mo Mbimbiliya ondaka melaka lio Gregu pamwe ipitiyua okuti “oukuatyili,” ilekesa “otyipuka tyakolela unene.” Tupu, pamwe ilekesa otyipuka otyiwa.

Ovakristau valinga ononkhono mbokuendela monondaka Paulu ahoneka kononkhono mba Huku okuti: “Onthue tuhanda okukala ovakuatyili movipuka aviho.” Otyo tyakutikinya-tyi?

OVILWA MOMUTIMA

Ovanthu ovanyingi apeho komuhuka velitalela motyilivandyelo tyina vehenetunde meumbo. Omokonda yatyi? Omokonda vahanda okukala tyehiwa. Mahi, kuna otyipuka tyakolela vali unene tyipona okukeyua nawa onohuki, ine okuvala ovikutu oviwa unene. Tyotyili, onkhalelo tuatuwa momutima, ipondola okuyawisa ouwa wetu kondye ine okuutepulula.

Ondaka ya Huku ipopia nawa okuti onthue tuayembela kokulinga ovivi. Gênesis 8:21 yati: “Eyembelo liomutima womunthu evi tunde pouna.” Moluotyo, opo tukale ovakuatyili, tuna okulwisa eyembelo liokulinga onkhali tuatyitwa nalio. Apostolu Paulu walekesa nawa ovilwa ankho ena viokulwisa onkhali, etyi ati: “Ame tyotyili ndyihambukwa novitumino via Huku, ngetyi natuwa mokati kange. Mahi, ndyiivite molutu luange otyitumino otyikuavo tyikahi nokulwa novitumino viomutima wange, tyinthuala ngonkhuatwa kotyitumino tyonkhali tyikahi molutu luange.”—Romanos 7:22, 23.

Mongeleka, tyina omutima wetu utuhongiliya okulinga etyi tyapenga, iya ngwe onthue tunale eyembelo liokulinga etyi tyapenga, katuesukisile okulinga etyi omutima wetu utuhongiliya okulinga. Mahi nkhele tupondola okuholovona etyi matulingi. Tyina tuholovona okuanya olusoke luapenga, tutualako okukala ovakuatyili, namphila tukahi pokati kovanthu vehe-vakuatyili.

OÑGENI MATUFINDI OVILWA

Opo tukale ovakuatyili, tuesukisa ovitumino viapama konthele yovituwa. Mahi, ovanthu ovanyingi vapesela omuvo omunyingi opo vatokole ‘ovikutu patyi mavavale,’ tyipona kovitumino vipopia oñgeni tuna okuvala. Moluotyo, vaamena ovivi valinga, mokonda vielikuata novipuka vahanda. Omukanda umwe wati: “Haunene, onthue tulinga ine tupopia omatutu, monkhalelo ovanthu vasoka okuti tuvakuatyili.” The (Honest) Truth About Dishonesty. Okuti kuna onondonga mbupondola okutukuatesako okulinga omatokolo aviuka? Enga kuna. Iya okuti omatutu etavelwa?

Ovanthu ovanyingi mouye auho vekahi nokukuateswako no Mbimbiliya. Ombimbiliya ina ovitumino vihaelekwa vitukuatesako tukale novituwa oviwa. (Salmo 19:7) Ombimbiliya ipopia etyi tyikuatesako onombunga, novituwa tuna okukala navio, no ñgeni tuna okufenda Huku. Namphila oyo kohale, mahi kaikulupa. Ovanthu vovilongo aviho, novivala aviho, nomihoko aviho vekahi nokukuateswako Nombimbiliya. Ovanthu vomihoko aviho vekahi nokukuateswako Nombimbiliya, mokonda velilongesa-yo, nokusokolola nawa kuetyi velilongesa, avaendela monondonga mbayo. Ankho nonthue tulinga ngotyo, matulongesa omutima wetu ukale omukuatyili atusoko etyi tyaviuka.

Mahi, etyi tuesukisa opo tufinde ovilwa viokuhapopi omatutu, ha kukala vala nenoñgonoko liaviuka lio Mbimbiliya. Onthue tukala pokati kovanthu vetuhongiliya okulinga ovivi. Otyo tuesukisila okulikuambela ku Huku na etukuateseko. (Filipenses 4:6, 7, 13) Inkha tulinga ngotyo, matukala nomutima wakola opo tutyivile okulinga etyi tyaviuka, atukala ovakuatyili movipuka aviho.

ONDYAMBI YOKUKALA OMUKUATYILI

Mokonda Hitoshi wapopiua monthele yo tete, watualako okukala omukuatyili, tyemuetela ouwa. Pahe uundapela omuhona umwe umuhole mokonda youkuatyili wae. Hitoshi wati: “Ndyipandula unene, mokonda navasa ovilinga vinkhuatesako okukala nomutima wasukuka.”

Ovanthu ovanyingi navo vaimbuka okuti otyo otyili. Tala onongeleka mbumwe mba vana vapola ouwa kokulandula ovitumino vio Mbimbiliya opo ‘vakale ovakuatyili movipuka aviho.’

• Omutima Wasukuka

  

  “Ame natunda mosikola etyi ndyina omanima 13, andyikaundapa novimphulu. Moluotyo, ovipuka ovinyingi mondyuo yange ankho nevimonena mokuvaka. Konyima, andyinepwa. Iya ame nomulume wange, atuhimbika okulongeswa Ombimbiliya no Nombangi mba Jeova. Atunoñgonoka okuti Jeova a Huku, uyele ovituwa ovivi. Moluotyo, atutokola okupilulula onkhalelo yomuenyo wetu. Mo 1990, atulipakula ku Jeova atumbatisalwa, iya atukala Onombangi mba Jeova.”—Provérbios 6:16-19.

  “Kohale, eumbo liange ankho lieyula ovipuka viavakwa, mahi pahe, mutupu vali natyike. Iya otyo, tyinkhalesa nomutima wasukuka. Tyina ndyisoka, komanima omanyingi nakala omunthu womatutu, ndyipandula unene Jeova mokonda yokankhenda kae okanene. Ndyihambukwa unene, okulangalapo kese nthiki nonthumbi yokuti pahe Jeova wahambukua na ame.”—Cheryl, ko Irlanda.

  

  “Etyi omuhona wange aimbuka okuti onkhalelo yomuenyo wange yapiluluka, ati: ‘Huku yove wekukalesa omunthu uyumbwa onthumbi! Tyotyili otyiwa unene okuundapelwa nove.’ Okukala omukuatyili movipuka aviho, tyinkhuatesako okukala nomutima wasukuka komaiho a Jeova Huku. Tupu, ndyityivila okukuatesako ombunga yange, novanthu ovakuavo opo navo vakale ovakuatyili.”—Sonny, ko Hong Kong.

• Ombembwa Momutima

  

  “Ame ndyiundapa mondyuo yokupaka onombongo. Movilinga evi, okukala omuhona tyakolela vali tyipona okukala omukuatyili. Ovanthu ovanyingi vasoka okuti: ‘Katyilingi natyike okukemba vala katutu, inkha matyikukuatesako okukala nolumono.’ Mahi, mokonda ndyitualako noukuatyili, ndyina ombembwa momutima. Natokola okutualako okukala omukuatyili, namphila katyapepukile. Ovahona vange vetyii okuti ame himevekembe.”—Tom, ko Estados Unidos.

• Okulihumba

  

  “Omutumini wange movilinga, ankho umpha ondundo opo ndyikembe konthele yovipuka vimwe vikamba movilinga. Mahi ame andyianye. Konyima etyi ovimphulu viamoneka, omuhona wange amphandula unene mokonda youkuatyili wange. Okukala omukuatyili mouye womatutu, tyihanda okukola omutima. Mahi, okuhulilila-ko, vakuetu vetuyumba onthumbi.”—Kaori, ko Japau.

Okukala nomutima wasukuka, nombembwa momutima, nokulihumba, tyilekesa nawa okuti, tyotyili okukala omukuatyili tyieta ouwa. Ove kutyitavela?