OSAPI YO KONDYE | OITYI WESUKISILA OKUKALA OMUKUATYILI?

Oñgeni Ounkhembi Ukukalesa?

“Apeho kuna ovitateka viepuiya, vipondola okutetululwa vala inkha omunthu ukemba katutu.”—Samantha, ko Afrika do Sul.

Okuti nove utavela onondaka ombo? Nga Samantha, onthue atuho pamwe tutumbukilwa novitateka viepuiya. Etyi tulinga povitateka vituhongiliya okupopia omatutu, matyilekesa oityi tuhole vali. Mongeleka, inkha okuliyovola movitateka vitukundisa tyakolela vali kuonthue tyipona ovipuka aviho, tupondola okusoka okuti omatutu esukisa. Mahi, tyina vakuetu vamaimbuka okuti etyi tualinga ine tuapopia omatutu, ovikando ovinyingi katyituetela ouwa. Nkhele tala onongeleka mbumwe.

OMATUTU ANYONA ONTHUMBI

Ovanthu valinga oupanga novanthu vayumbwa onthumbi. Mahi, okuyumba onthumbi momunthu, katyiya vala monthiki ike. Ovanthu vahimbika okuliyumba onthumbi, tyina vakala kumwe omuvo omunyingi, otyo vatomphola noukuatyili, na tyina valinga ovipuka tyihena elungavi. Mahi, onthumbi ipondola okunyonwa nomatutu omunthu apopia otyikando tyike vala. Iya tyina omunthu amanyono onthumbi, tyipuiya unene okumuyumba vali onthumbi.

Okuti nthiki imwe watendeleyilue ine wapopililue omatutu nepanga liove enene? Inkha wetyilingilue, tyekukalesile ñgeni? Tyipondola tyekuihamene unene. Otyo, otyili. Okuhakala omukuatyili tyinyona oupanga omuwa.

OMATUTU AETA OMATUTU

Robert Innes, omulongesi Mosikola imwe Onene mo California, waimbuka okuti, “omatutu elitambuliswa.” Omatutu ekahi ngouvela. Tyina ukala ehimbwe nomunthu ukemba, ukala motyiponga otyinene “tyokutambuliswa” omatutu.

Oñgeni upondola okulityilika okutokela meliva liokupopia omatutu? Ombimbiliya ipondola okukukuatesako. Mbambavo, tala onondonga mbehehi mbo Mbimbiliya.

Ononkhalelo Mbomatutu

Okukemba

OKUKEMBA OITYI? Okupopila omatutu omunthu ankho una okupopilwa otyili. Okukemba tyakutikinya okupililika onondaka pokupopia, nokutepulula onondaka mbakolela opo ayapule omunthu, nokuyawisa-ko vali unene omatutu opo ovanthu vasoke okuti otyili.

ETYI OMBIMBILIYA IPOPIA: ‘‘Jeova uyele omunthu wovivi, mahi ulinga oupanga nomuviuki.” (Provérbios 3:32) “Mokonda pahe muayeka-po omatutu, popiei otyili kese umwe na mukuavo.” —Efésios 4:25.

Okutendeleya

OKUTENDELEYA OITYI? Okupopia ovipuka ovivi visilisa ovituwa oviwa viomunthu.

ETYI OMBIMBILIYA IPOPIA: “Omunthu wokupopia vakuavo utualako okueta onondyaya, iya omutendeleyi uyapaula omapanga omanene.” (Provérbios 16:28) “Pana pehena ononkhuii, otupia tunyima, iya pana pehena omutendeleyi, onondyaya mbupwa.” —Provérbios 26:20.

Okumonena momatutu

OTYO OITYI? Okuvaka omunthu ehetyiimbuka.

ETYI OMBIMBILIYA IPOPIA: ‘Uhavake omuundapi omuhepi wove, una-le ovitateka.’ (Deuteronômio 24:14, 15) ‘Una uvaka omuhepi, ukahi nokulinga omutomba una Wemutunga. Mahi, wo kuna okankhenda na una wahepa, unkhimaneka Huku.’—Provérbios 14:31.

Okuvaka

OKUVAKA OITYI? Okupola-po otyipuka tyamuene uhapelwe.

ETYI OMBIMBILIYA IPOPIA: ‘Otyimphulu tyihavake vali, mahi tyiundape nombili, okulinga ovilinga oviwa nomaoko ae opo akale netyi apondola okuavela una wesukisa.’ (Efésios 4:28) “Muhayondyuei. . . . Vokuvaka, no vokuna elungavi, no nonkholwa, na vana vokupunda ovipuka via vakuavo, kamavakapiñgana Ouhamba wa Huku.”—1 Coríntios 6:9, 10.