“Tulandulei Onomphai Mba Jesus”
1. Oñgeni tupondola okukala ovaivisi ovanongo?
1 Jesus kalongesilwe monosikola ononene, mahi ankho uiiwe Ngomuivisi omunene. Tupandula unene mokonda atyiho Jesus alingile mokueenda kuovilinga viae viokuivisa, tyahonekwa pala ouwa wetu. Opo tukale ovaivisi ovanongo, tuesukisa “okulandula onomphai mba Jesus.”—1 Ped. 2:21.
2. Oityi matyitukuatesako okukala nohole ngaina Jesus ankho ena novanthu?
2 Lekesa Ohole kovanthu: Tyaavelele ondundo Jesus, ankho esuko enene ena novanthu. (Mar. 6:30-34) Ovanyingi potyilongo tyetu vena “onongembia” nokuna esuko enene liokutehelela otyili. (Rom. 8:22) Okusokolola konkhalelo yovanthu ovo, nohole onene Jeova ena navo, tyitulunda okutualako okuivisa. (2 Ped. 3:9) Tupu, ovanthu mavakala vali tyafuapo pala okutehelela etyi tuvepopila inkha vatala okuti tyotyili tuesuka navo.
3. Opi Jesus ankho aivisila ondaka ya Huku?
3 Ovola Onomphitilo Ambuho pala Okuvisa: Jesus ankho wovola onomphitilo ambuho pala okupopila vakuavo onondaka onongwa Mbouhamba wa Huku. (Mat. 4:23; 9:9; João 4:7-10) Tupu, nonthue tuhanda okukala tyafuapo pala okupopia konthele yondaka ya Huku tyina tukahi movilinga vietu via kese nthiki. Vamue vatyinda Ombimbiliya, nomikanda omikuavo opo vetyivile okuava oumbangi kovilinga, kosikola, na tyina valinga oungendi, no povitanda, ine ponomphangu ononkhuavo vali.
4. Oñgeni Ouhamba upondola okukala osapi yovilinga vietu viokuivisa?
4 Pokuivisa Popia Vali Konthele Youhamba: Onondaka onongwa Mbouhamba ankho osapi yovilinga viokuivisa via Jesus. (Luc. 4:43) Namphila tupondola okupopia ovipuka ovikuavo novanthu, tuhalimbueiko okuti ehando lietu okukuatesako ovanthu okunoñgonoka okuti tuesukisa Ouhamba wa Huku. Namphila tupopia ovipuka ovivi vilekesa okuti tukahi mononthiki mbahulililako, tyakolela vali ‘okuivisa onondaka onongwa mbovipuka oviwa.’—Rom. 10:15.
5. Opo tuivise nounongo, omokonda yatyi tuesukisila okuundapesa Ombimbiliya?
5 Yumba onthumbi Mondaka ya Huku: Jesus wayumbile onthumbi Movihonekwa mokuenda kuovilinga viae viokuivisa. Jesus kalongesile natyike tyatunda momutima wae muene. (João 7:16, 18) Okulia kua Jesus ankho Ondaka ya Huku, iya ankho wiiyuundapesa momuenyo wae opo etyivile okuliyakulila komahongaiyo a Satanasi. (Mat. 4:1-4) Opo tutyivile okulongesa nawa vakuetu, tuesukisa okutanga apeho Ombimbiliya, nokuundapesa momuenyo wetu etyi tutanga. (Rom. 2:21) Tyina tukumbulula omapulo movilinga viokuivisa, tuna okupopia otestu imue Yombimbiliya muvasiwa etyi tukahi nokupopia iya inkha tyitavela atutange muene Mombimbiliya yatyo. Tuhanda ovanthu vanoñgonoke okuti tukahi nokulongesa omalusoke a Huku, katulongesa omalusoke etu muene.
6. Oityi Jesus alingile opo etyivile okuhika komitima viovanthu?
6 Putyina Ulongesa, Ovola Okuhika Komutima: “Katunemone omunthu upopia nga una.” (João 7:46) Otyo tyapopia omafualali konthele ya Jesus etyi ono saserdote nova Faliseu vapulile omokonda yatyi omafualali kavemukuatele. Jesus kaavelele vala ekumbululo, anthi walongesile monkhalelo imue ankho ihika komitima via vana alongesa. (Luc. 24:32) Jesus ankho uundapesa onongeleka mbuiwe nawa novanthu opo evekuateseko okunoñgonoka etyi ekahi nokulongesa. (Mat. 13:34) Tyina Jesus ankho alongesa ovanthu, kevepopila ovipuka aviho otyikando tyike vala. (João 16:12) Jesus ankho unkhimaneka Jeova, kelinkhimaneka oe muene. Nga Jesus, nonthue matutyivile vala okukala ovalongesi ovanongo, inkha ‘tulava nawa onkhalelo yetu yokulongesa.’—1 Tim. 4:16.
7. Omokonda yatyi Jesus atuaileko novilinga viae viokuivisa?
7 Tualako Okuivisa Namphila Ovanthu Kavetavela ine Pamoneka Oundyale: Namphila Jesus alingile omahuviso omanene, ovanyingi kavemutavelele. (Luc. 10:13) Alo umue vamue mombunga ya Jesus, vasokele okuti “oe utupu onondunge.” (Mar. 3:21) Nongotyo, Jesus watuaileko novilinga viae viokuivisa. Watuaileko nehambu, mokonda ankho utyii okuti una otyili tyipondola okuyovola ovanthu. (João 8:32) Nombatelo ya Jeova, nonthue tutokolei okuhayekepo ovilinga vietu viokuivisa.—2 Cor. 4:1.
8, 9. Oñgeni tupondola okuhetekela Jesus, okulinga ononkhono opo tuundape nombili movilinga viokuivisa?
8 Tyesukisa Okulinga Ononkhono opo Uundape Nombili Movilinga Viokuivisa: Jesus ankho kesukile nomalumono, mokonda okuivisa ondaka ya Huku ankho otyipuka tyakolela vali. (Mat. 8:20) Jesus waivisile nombili, ovikando vimue ankho wivisa alo umue ketango. (Mar. 6:35, 36) Jesus ankho utyii okuti una omuvo uhehi pala okulinga ovilinga viae. Mokonda ‘omuvo wahupako kauhi,’ nonthue tupu tuesukisa okuhetekela Jesus, okulinga ononkhono opo tupakule omuvo wetu, nononkhono, nomalumono pala okuundapa movilinga viokuivisa.—1 Cor. 7:29-31.
9 Ovakristau vokotyita tyotete, ankho ovaivisi ovanongo mokonda velilongesila ku Jesus. (Atos 4:13) Nonthue matukala vala ovanongo movilinga viokuivisa, inkha tuhetekela Jesus Omuivisi omunene. —2 Tim. 4:5.