Ukahi Nokuundapesa Nawa Omutala Womulavi Movilinga Viokuivisa?
1 Omphange umue etyi atanga Omutala Womulavi wo 1 ya Kupupu yo 2008, wahonekele okuti: “Ame himakevelela okukaundapesa vala Omutala ou Womulavi movilinga viokuivisa!” Okuti ove watalale ononthele mbumue Momutala Womulavi? Wasokale oñgeni mokembuundapesa movilinga viokuivisa?
2 “O Que Aprendemos de Jesus”: Hamue ove watala okuti onthele ei maikukuatesako pala okuhimbika okulongesa ovanthu Ombimbiliya. Inkha nkhele kunetyilinge, ovola okutanga osapi Momutala Womulavi nomunthu uvasa iya omulekesa etyi Jesus apopia konthele oyo, ngetyi tyapopiwa mo palagrafu yotete. Tyina omunthu alekesa esuko, linga ononkhono opo utualeko netompho, okuundapesa ousapi wahonekua monkhalelo yomapulo maukuatesako omunthu okusoka. Ita omunthu apopie konthele yepulo. Hangununa olutalatu luelikuata netyi tyapopiwa, iya oende po palagrafu onkhuavo. Onthiki yotete uvasa omunthu, upondola okupopia nae onthele imue iya tyina wamakondoka okukemutalelapo, opopi onthele onkhuavo. Kala tyafuapo opo utualeko okulilongesa nae momukanda Ombimbiliya Ilongesa.
3 “Como Ter Uma Família Feliz”: Onthele ei yalingwa pala okukuatesako ovalume, ovakai, novohe, okutala oñgeni mavaundapesa ovitumino vio Mbimbiliya tyina vena ovitateka vipondola okunyona ombembwa mombunga. Tupu, upondola okuundapesa ononthele ombo pala okuvatela vana vehelilongesa Ombimbiliya okutala ounongo uvasiwa Mombimbiliya.—2 Tim. 3:16, 17.
4 Ononthele Pala Ovakuendye: Onthele ina osapi yati “Para os Jovens,” yaavela omphitilo omunthu ukahi nokutanga pala okusoka konthele yehipululo Liombimbiliya, no ñgeni apondola okuundapesa ononthele ombo pala okuvatela ovakuendye vakuavo avasa movilinga viokuivisa okutala esilivilo yokulilongesa Ondaka ya Huku. (Sal. 119:9, 105) Tyina ukahi nokupopia novohe, upondola okupopia vali unene onthele yati, “Ensine Seus Filhos” imoneka Momutala Womulavi onohanyi ambuho. Ononthele ombo mbupondola okukuatesako ovana okulilongesila kovanthu vapopiwa Mombimbiliya. Ukahi nokuovola omuvo opo utange ononthele ombo novana vove?
5 Ononthele Ononkhuavo: Onthele “Nossos Leitores Perguntam” ikumbulula omapulo alingwa na vana vehe Nombangi mba Jeova. Ove upondola okupopia onthele ei tyina ukahi nokuava Omutala Womulavi umbo na umbo. Onthele “Uma Carta de . . . ” ilekesa ovitateka ono misionaliu novanthu ovakuavo valwa navio movilinga viavo viokuivisa. Ononthele ombo mambukuatesako vana vokuna esuko okutala okuti onondaka onongwa mbukahi nokuiviswa mouye auho, okufuisapo enyingilikilo liokuya kua Kristu. —Mat. 24:3, 14.
6 Onthele “Achegue-se a Deus,” yapolwa mononthele Mbombimbiliya tutanga Mosikola Yovilinga Via Huku, ipondola okulunda vana vokuna omutima waviuka okuhanda okulilongesa vali konthele ya Jeova. Onthele “Imite a Sua Fé,” yalingwa pala okuvatela ovanthu okunoñgonoka vali nawa ehipululo lio Mbimbiliya, nokulandula ongeleka yovanthu vapopiwa Mombimbiliya, omaholovono avo, ekolelo liavo, novitateka vapita navio.
7 Tuahambukwa unene moluetyi tutambula Omutala Womulavi kese hanyi pala okuava movilinga viokuivisa! Moluotyo, tutualeiko okutanga omikanda ovio, nokuviundapesa nawa movilinga vietu viokuivisa.