Ononthele Onomphe Pala Okuhimbika Okulongesa Ovanthu Ombimbiliya
1. Ononthele patyi onomphe mambuya mo Mutala Womulavi iya oityi mbalingilwa?
1 Okuhimbikila mohanyi maiya, mo Mutala Womulavi mamuya ononthele onomphe mambutukuatesako okuhimbika okulongesa ovanthu Ombimbiliya. Osapi yati “Okulilongesila Kondaka ya Huku.” Namphila ovanthu ovanyingi motelitoliu vahahande okutanga kese ononthele mbo Mutala Womulavi, mahi ononthele ombo mbalingwa opo tumbuundapese tyina tupopia novanthu.
2. Ovipuka patyi vitukuatesako tuvasa mononthele ombo?
2 Oityi Matyikakutikinyua Mononthele Ombo Onomphe?: Osapi nousapi mbahonekwa ngepulo pala okukumbulula muene weumbo mokueenda kuetompho. Onotestu mbakolela mbahonekwa momukanda tyihena nondaka, opala muene weumbo akale nehambu liokumbutanga Mombimbiliya. Ono palagrafu ononthutu mbupondola okutangelwa omunthu pombundi yeumbo. Kese nthele yelikuata kumwe nomukanda Oityi Ombimbiliya Ilongesa opo tyikukuateseko okulongesa omunthu momukanda oo tyina tyesukisa.
3. Tyina tuenda movilinga via umbo na umbo, oñgeni tupondola okuundapesa Omutala Womulavi opo tuhimbike okulongesa ovanthu Ombimbiliya?
3 Oñgeni Matuundapesa Ononthele Ombo: Tyina uava Omutala Womulavi ove upondola okulinga epulo limwe lielikuata nonthele. Mongeleka, Omutala Womulavi 1 ya Hitandyila upopia unene konthele yesilivilo Liombimbiliya. Ove upondola okupula: “Ove utala Ombimbiliya Ngondaka ya Huku ine ngomukanda umwe vala omuwa? [Yeka omunthu akumbulule.] Ame ndyina otyipuka tyimwe tyakolela konthele oyo.” Tanga onthele yakolela yepulo liotete, nopalagrafu yotete, notestu ikahimo. Linga vali epulu oiti muene weumbo akumbulule. Tompholei onondaka mbelikuata nonthele, okuundapesa omapulo elikuata nonthele mukahi nokunthomphola. Tyina nkhele uheneende, linga epulo likahi komutue okelipongiya opo muye vali okutomphola konthele oyo. Tyina ukondoka lilongesa vali onthele ya kese simano alo wetelela yosimano onkhuavo. Tupu upondola okupopia onondaka mbehehi ohimbika okulongesa omunthu Ombimbiliya. Undapesa Omutala Womulavi pala okulekesa oñgeni tulilongesa novanthu Ombimbiliya.
4. Oñgeni tupondola okuundapesa ononthele onomphe mbo Mutala Womulavi tyina tukatalelapo ovanthu?
4 Tupu ove upondola okuundapesa ononthele ombo onomphe mbo Mutala Womulavi tyina ukaivisa nokukatalelapo ovanthu. Upondola okupopia okuti: “Ei onthele imwe omphe Yomutala Womulavi. Mandyikulekesa oñgeni yuundapeswa.” Tukahi nokulikuabela opo ononthele ombo onomphe mbo Mutala Womulavi, mbukuateseko ovanthu ovanyingi “vakale nenoñgonoko liafuapo konthele yotyili.”—1 Tim. 2:4.