Longesa Vakuenyi Okukala Nohole na Jeova
1. Oityi tyalingisa vamue okulinga oupanga na Jeova?
1 Ove uhinangela onthiki yotete weiva konthele ya Jeova? Oityi tyekulingisa okukala epanga liae? Ovanthu ovanyingi ovakuatyili mavekutolela okuti, ovo valinga oupanga Nomutungi wetu, etyi velilongesa konthele yovituwa viae oviwa, haunene okankhenda kae, nohole.—1 João 4:8.
2, 3. Oñgeni tupondola okuundapesa omukanda Ombimbiliya Ilongesa pala okuvatela ovalongwa Vombimbiliya okuyawisa ohole yavo ku Jeova?
2 “Ou Oe Huku Yetu”: Omukanda Ombimbiliya Ilongesa, upopia konthele yohole ya Jeova, nesuko liokulinga oupanga nae. Oñgeni tupondola okuundapesa omukanda oo pala okukuatesako vakuetu okuyawisa ohole yavo ku Huku? Tyina ukahi nokupopia onthele imue, upondola okulinga omapulo ngaa, maavatela omunthu okusoka: “Oityi otyo tyitulongesa konthele ya Jeova”? ine “Omonkhalelo patyi onthele ei ilekesa okuti Jeova o Tate atuho tuhanda”? Okulongesa monkhalelo oyo, matyikuatesako omulongwa okukala epanga lia Jeova omuvo auho.
3 Tyina tukuatesako ovalongwa Vombimbiliya okuimbuka okuti tyakolela okukala nenoñgonoko konthele ya Huku wike vala wotyotyili, nokuna omuenyo, ovo mavanoñgonoka onondaka mba Isaia, mbokuati: “Ou oe Huku yetu.” (Isa. 25:9) Tyina tuhangununa Ondaka ya Huku, tuesukisa okulekesa oñgeni outumini ukahi pomaoko a Kristu Jesus maukaavela ovanthu ononkhano onongwa pala okufuisapo ehando lia Jeova.—Isa. 9:6, 7.
4, 5. Okukala nohole na Jeova, tyihangununa tyi?
4 Elekeso Liokuti Tuna Ohole na Jeova: Onthue tutyii okuti okukala nohole na Jeova nomutima auho, nomuenyo, iya nonondunge tyakutikinya vali unene tyipona vala okusoka ku Huku. Tuesukisa okusoka ngetyi Huku asoka. (Sal. 97:10) Tulekesa okuti tuhole Huku, tyina tutavela ovitumino viae, nokutualako ‘okukala novituwa oviwa, nokulinga etyi tyihambukiswa Huku,’ namphila tulwa novitateka, noundyale.—1 Ped. 3:11; 2 João 6.
5 Okulinga ehando lia Huku mokonda tumuhole, tyieta ehambu limue enene. (Sal. 40:8) Omulongwa Wombimbiliya una okuimbuka okuti Ovitumino aviho via Huku viahonekwa pala ouwa wovaumbili Vae. (Deut. 10:12, 13) Tyina omunthu alandula ehongolelo lia Jeova, ulekesa okuti upanda ovilinga Viae aviho vihuvisa. Kuatesako omulongwa okunoñgonoka okuti, okuendela monondyila mbaviuka mba Jeova, matyiyovola omunthu kovitateka ovinyingi.
6. Ononkhano patyi onongwa vana vehole Jeova vapondola okupewa?
6 Vana Vokuna Ohole na Huku Vena Ononkhano Onongwa: Jeova una esuko enene navana veliola omutima, vokuna ohole nae. Iya oe uvetolela “ovipuka via Huku viokuaya kohi.” (1 Cor. 2:9, 10) Nenoñgonoko olio konthele yehando lia Jeova, ovo vena olusoke luayandyuluka komutue wandyila, nekevelelo liapama. (Jer. 29:11) Aveho vena ohole na Jeova vapewa ouwa wokankhenda kae. (Êx. 20:6) Ovo vena ekevelelo liomuenyo wahapu mokonda yohole onene Huku ena navo.—João 3:16.
7. Oityi ove usoka konthele yokulongesa vakuenyi okukala nohole na Jeova?
7 Tyina tunoñgonoka vali nawa Tate yetu keulu, tupu tukala vali nehambu liokupopia navakuetu. (Mat. 13:52) Tyotyili, elao limue enene okulongesa vakuetu, haunene ovana vetu, okukala nohole na Jeova! (Deut. 6:5-7) Atuho, kumue novalongwa vetu, tutualeiko okuyawisa ehambu lietu putyina Jeova etulekesa okankhenda kae okanene.—Sal. 145:7.