Longesa Vana Vehetyivili Okutanga Nawa
1. Otyitateka patyi tupondola okuvasa movilinga viokuivisa?
1 Tyina tukahi nokuundapa movilinga viokuivisa, pamue tukala notyitateka tyokulongesa otyili kovanthu vana vehetyivili okutanga nawa. Oityi tupondola okulinga?
2. Omokonda yatyi tuna okulekesa onthilo kuvana vehetyivili okutanga nawa, iya oñgeni matutyilingi?
2 Kala Nonthilo Navo: Jeova utala onkhalelo yomutima womunthu, katale kelilongeso omunthu apewa kosikola. (1 Sam. 16:7; Pro. 21:2) Moluotyo, nonthue tuahatombei vana vehetyivili okutanga nawa. Ovanthu ovo, mavetutehelela vali nawa tyina tupopia navo nonthilo noumphwa lundo. (1 Ped. 3:15) Otyo tyipondola okukutikinya okuhakuluminya omunthu okutanga o palagrafu ine otestu. Putyina omunthu elilongesa vali otyili Tyombimbiliya, oe upondola okukala vali nehando liokuyawisa ounongo wae wokutanga opo akale nehambu liokutanga Ondaka ya Huku ‘komutenya no kounthiki.’—Sal. 1:2, 3.
3. Ononkhalelo patyi tupondola okuundapesa opo tukuateseko vana vehetyivili okutanga nawa?
3 Ononkhalelo Mbelikalela Mbokulongesa Ovanthu Ombimbiliya: Onkhalelo imue ongwa yokulongesa ovanthu nokuvevatela okuhinangela etyi velilongesa, omalutalatu. Ove upondola okupula omulongwa apopie oityi eluete molutalatu lukahi momukanda mukahi nokuundapesa. Linga omapulo amwe pala okumukuatesako okunoñgonoka oityi olutalatu lulongesa. Tanga onotestu mbulongesa ononthele mbumue ove uhanda omulongwa ahinangele. Tupu upondola okuundapesa omalutalatu pala okupitulula onthele muamana okulilongesa. Muhelilongesei ono palagrafu ononyingi. Popia vali unene konthele yosapi no nonthele mbakolela muamana okulilongesa, lityilika okupopia ovipuka vihekahi pono palagrafu mukahi nokulilongesa. Tanga onotestu Mombimbiliya, iya olingi omapulo opo utale inkha omulongwa anoñgonoka umue nawa etyi tyatangwa. Otyo tyipondola okuyawisa ehando liae liokulilongesa okutanga nawa opo oe muene aovole otyili Tyombimbiliya.
4. Oñgeni tupondola okuvatela ovalongwa vetu opo velilongese okutanga nawa?
4 Ombatelo Pala Okulilongesa Okutanga Nawa: Ovanthu vokuhetyivili okutanga nawa, vapondola okunoñgonoka nawa nokuhinangela etyi vapopilwa. Ove upondola okuavela ondundo ovanthu ovo opo vatehelele ovikasete vieongano. Okutehelela nawa etyi tyikahi nokutangwa nokulandula momukanda watyo, nokupitaulula mondaka yaya pohi, matyivatela omulongwa okutanga vali nawa. Tupu, upondola okuvasa ombatelo mombrochula Aplique-se à Leitura e à Escrita. Kononthele mbumue, ovakulu vewaneno tupu vaonganeka osikola mewaneno pala okuvatela vana vehetyivili okutanga nawa. Onondonga ombo mambutuvatela okulongesa vana vehetyivili okutanga nawa okunoñgonoka ‘ovihonekwa via Huku,’ mavivelingisa okukala ovanongo pala eyovo.—2 Tim. 3:15.