Kuatesako Vana Vehetyivili Okutanga
1. Okulongesa Ombimbiliya vana vehetyivili okutanga oityi tyipondola okuvepuiya?
1 Ovanthu vehetyivili okutanga vapondola okusuka notyili, mahi vapondola okuwela owoma Ombimbiliya nomikanda omikuavo. Okuveavela monthiki yotete omukanda Ombimbiliya Ilongesa, tyipondola katyivekuatesako. Oñgeni tupondola okuvekuatesako mopamphepo? Tuapula ovaivisi ovanongo vovilongo 20 vielikalela etyi valinga. Etyi vapopia tyikahi pombuelo.
2. Omikanda patyi vivali vikahi nokukuatesako unene ovanthu vehetyivili okutanga?
2 Inkha omunthu ketyivili okutanga ove upondola okuhimbika okulilongesa nae Ombruchula Tehelela Huku ine Tehelela Huku opo Ukale Nomuenyo Wahapu. Omukokoli-ndyila umwe ko Estados Unidos ulekesa omunthu onombrochula ombo emupulu oipi ahandapo. Ombetele yo ko Kenia yahoneka okuti omikanda ovio vivali vikahi nokukuatesako unene ovanthu mokonda mo Afilika muna ovanthu ovanyingi vahanda okuhangununinwa ovipuka, tyipona okulinga omapulo otyo vakumbulula. Ovanthu vetyivila okutanga vetavela okutanga nokupulwa, mahi okulinga ngotyo vana vehetyivili okutanga tyipuiya. Inkha omulongwa utyivila katutu okutanga, ovaivisi ovanyingi vahimbika okulilongesa nae Ombruchula Onondaka Onongwa mba Huku!, ine Ove upondola Okukala Epanga Lia Huku!, ine hamwe Omukanda Womahipululo Ombimbiliya.
3. Ounongo patyi tuesukisa opo tutyivile okulongesa nawa vana vehetyivili okutanga?
3 Okupandula: Vana vehetyivili okutanga vapondola okukala nohonyi, nokulipaka unene pombuelo. Okuvekuatesako okukala nonthumbi otyipuka tyotete pala okuvelongesa otyili. Ovanthu ovanyingi vehetyivili okutanga, ovanongo nokunoñgonoka nawa ovipuka. Kala navo nehumbilo nokuvepanda. (1 Ped. 3:15) Mavakala nombili yokutualako okukula mopamphepo inkha velitehela okuti ononkhono vekahi nokulinga mbapandwa. Ngotyo kala omukuatyali okuvepandula.
Vana vehetyivili okutanga vapondola okukala nohonyi, nolikupaka unene pombuelo. Okuvekuatesako okukala nonthumbi otyipuka tyotete pala okuvelongesa otyili
4. Oñgeni tupondola okulunda vana vehetyivili okutanga okupongiya etyi matulilongesa?
4 Alo umwe tyina omulongwa ehetyivili okutanga mueavela ondundo opo elipongiye. Ovaivisi vamwe ko Africa do Sul vapopila ovalongwa vavo opo vaite ku umwe mombunga ine epanga utyivila okutanga opo evekuateseko. Omuivisi umwe ko Gra-Bretanha wavela ondundo ovalongwa vae mokuvelekesa momukanda wae po nopalagrafu mbehehi tyina velilongesa opo omulongwa atale okuti tyapepuka okuvasa ekumbululo tyina omukanda wanthindua. Omukuatate umwe ko India ulunda ovalongwa vae okutala omalutalatu mavelilongesa mosimano onkhuavo nokusokolola kuetyi alongesa.
5. Oñgeni tupondola okupwa elundo tyina tulongesa omulongwa?
5 Pwa Elundo: Namphila omukanda upopia ovipuka ovinyingi, kuatesako omulongwa okuvinoñgonoka nawa. Pokuhimbika, mupondola okulilongesa vala mono minutu 10 ine 15. Muhelilongesei ovipuka ovinyingi, mupondola okulilongesa vala onopalagrafu mbehehi. Pwa elundo inkha omulongwa utanga okulihindaika. Makala nondundo yokutanga nawa tyina ohole yae na Jeova yameliyawisa. Opo ukuateseko omulongwa okulinga ngotyo, otyiwa okumukonga ehimbike okuenda komaliongiyo.
6. Oñgeni tupondola okulongesa ovanthu okutanga?
6 Inkha omulongwa ulongoka okutanga, malingi ononkhono mbokukula mopamphepo. (Sal. 1:1-3) Ovanyingi valongesa ovalongwa vavo okutanga no mukanda Aplique-se à Leitura e à Escrita mo nominutu mbehehi tyina vamamane okulilongesa. Inkha utala okuti omulongwa uhanda okusoya, upondola okumulunda okukala nonthumbi mokupopia ovipuka vimwe evila oñgeni elilongesa vio. Mukuatesako okuti Jeova mayambe ononkhono mbae, nokumulunda okulikuambela okuita ombatelo. (Pro. 16:3; 1 João 5:14, 15) Ovaivisi vamwe ko Gra-Bretanha valunda ovalongwa vavo okuhasoko kovipuka ovinyingi, mahi vevekuatesako okulilongesa etyi matyivekuatesako, tete velilongesa o abesende nokuovola onotestu nokumbutanga, nokutanga omikanda vietu vina viapepuka. Okulongesa ovanthu okutanga tyesukisa okuvelunda okukala nehando liokutyilinga, hakuvelongesa vala oñgeni tyilingwa.
7. Omokonda yatyi katupondola okuyekapo okulongesa otyili vana vehetyivili okutanga?
7 Jeova katombo vana vahalongesilwe unene mosikola. (Jó 34:19) Jeova utala etyi tyikahi momutima. (1 Crô. 28:9) Ngotyo tuhayekeipo okulongesa otyili vana vehetyivili okutanga. Tuna omikanda ominyingi tupondola okuhimbika okulilongesa navo. Konyima, upondola okuvetuala momukanda Ombimbiliya Ilongesa nokuvekuatesako okunoñgonoka nawa Ovihonekwa.