Oñgeni Matulipongiya Pala Eliongiyo Liovilinga
1. Omokonda yatyi Eliongiyo Liovilinga liapongiyua? Iya oñgeni tupondola okupola esilivilo keliongiyo olio?
1 Eliongiyo Liovilinga liapongiyua pala okutukuatesako opo tukale ovanongo movilinga viokuivisa. Onthele yakolela vali Yeliongiyo olio Liovilinga, okuivisa onondaka onongwa Mbouhamba, nokulinga ovalongwa, nokupopia konthele yekoyeso lia Huku. (Mat. 28:20; Mar. 13:10; 2 Ped. 3:7) Tupolako esilivilo enene keliongiyo olio liakolela, tyina tulipongiya nawa nokukala tyafuapo pala okuava omakumbululo.
2. Oñgeni tupondola okulipongiya pala okutehelela elongomona?
2 Elongomona: Omikanda muapolwa elongomona, ovikando ovinyingi vilekeswa monondonga mbupewa omulongomoni oñgeni malingi onthele oyo. Ove upondola okupitulula onondaka ombo, okukutikinyamo onotestu, nokusoka oñgeni onondonga ombo mbupondola okuundapeswa movilinga viokuivisa.
3. Oityi tuna okulinga opo tulipongiye pala onthele mailingwa nomapulo?
3 Omapulo Otyo Ovateheleli Vakumbulula: Onthele ei mailingwa ngetyi tyilingwa elilongeso Liomutala Womulavi, okupopia onondaka mbehehi pokuhimbika no pokumanuhula. Kese palagrafu holovonamo onondaka mbakolela vali, nokulipongiya pala okuava omakumbululo ahasete.
4. Oñgeni tuna okulipongiya pala onthele mailingwa nomapulo?
4 Omapulo Ovateheleli Avakumbulula: Onthele ei mailingwa ngelongomona, mahi, omulongomoni upondola okuita ovateheleli vamue vakumbulule. Inkha utala nawa ononthele mbakolela vali nokutanga onotestu mbukahimo, mokala tyafuapo pala okuava omakumbululo tyina pamalingwa omapulo. Omukuatate malingi onthele ei, malingi ononkhono opo ovateheleli vanoñgonoke nawa etyi tyikahi nokupopiwa.
5. Oityi matyitukuatesako okupola esilivilo komalekeso?
5 Omalekeso: Ononthele mbumue mbuna omalekeso pala okulekesa oñgeni etyi tyikahi nokupopiwa tyipondola okuundapeswa potyilongo tyenyi. Ovakulu vewaneno ine ovaivisi ovanongo, ine ovakokoli-ndyila, mavaitua opo valinge omalekeso. Okulipongiya pala onthele oyo, tyakutikinya okusoka oñgeni onthele oyo ipondola okulingwa. Tyina palingwa omalekeso, soka oñgeni upondola okutyipopia monondaka mbove muene, nokupilulula elekeso olio pala okupopia na kese munthu uvasa. Etelela omukanda ine Omutala Womulavi, no Despertai! maviundapeswa melekeso. Mokueenda Kuelilongeso Liombunga kokangulohi, mupondola okulinga omalekeso amue.
6. Omokonda yatyi tuna yokulipongiya pala Eliongiyo Liovilinga?
6 Matuhambukwa unene Neliongiyo Liovilinga tyina tulilongesa ononthele mbo programa, nokusoka kononthele ombo tyina nkhele tuheneende keliongiyo. Okulandula onondonga ombo, matyitukuatesako okulipameka otyikati. (Rom. 1:11, 12) Inkha tuovola omuvo wokulipongiya pala Eliongiyo Liovilinga, matukala tyafuapo nawa pala okufuisapo otyilinga tyetu.—2 Tim. 3:17.