Eliongiyo Liokukaivisa Lifuisapo Etyi Lialingilwa
1. Omaliongiyo okukaivisa alingilwa-tyi?
1 Nthiki imwe, Jesus veliongiyile novalongwa vae 70 tyina nkhele veheneende movilinga viokuivisa. (Luc. 10:1-11) Evepameka mokuvepopila okuti kavekahi aveke, mahi mavahongolelwa na Jeova “Mwene wovilinga.” Jesus tupu wevelongesile opo vetyivile okuundapa iya evepungu “vevali-vevali.” Hono omaliongiyo okuivisa, nao alingwa pala okutupameka nokutuavela ondundo, nokutuonganeka.
2. Eliongiyo liokuenda movilinga viokuivisa lina okulingwa momuvo ulifwe-pi?
2 Eliongiyo liokuivisa lilingwa mo nominutu 10 ine 15, okukutikinyamo okupunga ovanthu, nokupopia oku mavakaivisa, nokulinga elikuambelo. Eliongiyo olio pahe malipilululwa. Okuhimbikila mohanyi ya Tyikukutu eliongiyo liokuivisa malilingwa vala ono minutu 5 ine 7. Inkha eliongiyo olio lialandula keliongiyo ekuavo liewaneno, lilingwa tyihasete, mokonda ovakuatate valongehiwale ovipuka ovinyingi. Okulinga tyihasete eliongiyo olio tyikuatesako ovaivisi okuhimbika liwa ovilinga viokuivisa. Tyihe-otyo, ovakokoli-ndyila inkha vahimbikale okuivisa tyina nkhele eliongiyo lihenehimbike, vapondola okupolapo vala omuvo vekahi nokulinga eliongiyo, tyina liamapu avatualako vali okuvalula omuvo wavo.
3. Oñgeni omaliongiyo okukaivisa ena okupongiyua opo akuateseko ovaivisi?
3 Omaliongiyo okukaivisa ena okupongiyua nawa opo akuateseko ovaivisi. Momawaneno omanyingi omaliongiyo oo, pala akuateseko vali ovaivisi, velitepauka ovikundyi. Otyo tyikuatesako ovaivisi okuhika liwa pomphangu valingila no potyilongo vakaivisa. Ovaivisi tyina vehehi katyisete okuvepunga iya tyikuatesako omukulu okutalelapo aveho votyikundyi otyo. Ovakulu aveho vewaneno vatala kovitateka via kese omphangu netyi matyikuatesako ovaivisi. Tyina vehenelinge elikuambelo aveho vena okunoñgonoka una mavakaivisa nae, noku mavakaivisa.
4. Omokonda yatyi eliongiyo liokuenda movilinga viokuivisa lina okutalwa ngomaliongiyo omakuavo?
4 Eliongiyo Olio Liakolela Ngomaliongiyo Omakuavo Ewaneno: Omaliongiyo okukaivisa akuatesako vana mavakaivisa, namphila ha aveho mewaneno venda peliongiyo olio. Mahi, otyo katyilekesa okuti eliongiyo olio kaliasukisile ngomakuavo. Ngomaliongiyo omakuavo mewaneno, neliongiyo liokukaivisa otyiawa tuapewa na Jeova tyitukuatesako okuliwaneka na vakuetu pala okulinga ovilinga oviwa. (Heb. 10:24, 25) Moluotyo, omuendesi una okulifuiika nawa, opo eliongiyo lilingwe monkhalelo ihilivika Jeova, nokukuatesako ovaivisi. Okulinga ngotyo, matyiavela ondundo ovaivisi okuya keliongiyo liokuenda movilinga viokuivisa.
Olohongele viupange woku kunda vi kuetevo esilivilo ndevi vi lingiwa Vonjango Yusoma.
5. (a) Oityi omukulu wotyikundyi ena okutala, tyina aholovona una malingi eliongiyo liokukaivisa? (b) Oñgeni omphange apondola okuhongolela eliongiyo liokukaivisa?
5 Etyi Omuendesi Ena Okufuiika: Opo omuendesi elifuiike nawa na ahongolele eliongiyo liokukaivisa, wesukisa okupewa otyilinga otyo tyina onthiki oyo yehenehikepo. Otyo tyesukisa unene pala eliongiyo liende nawa. Omaliongiyo okukaivisa tyina alingilwa monomphangu mbelikalaila, omuendesi ine omukuatesiko wae, oe ulinga eliongiyo liotyikundyi tyavo. Mahi, tyina aveho mewaneno mavalingila mphangwa ike, omukulu wovilinga malekesa una malingi. Ovakulu vamwe vovilinga mewaneno valinga omukanda wehinangeleso avewavela aveho mavalingi iya omukuavo aveumate pekuatulu. Ovakulu vovilinga vena okukoya nawa vana malingi eliongiyo liokukaivisa, mokonda opo eliongiyo liende nawa, litei kondongeso, nokonkhalelo elifuiika nokounongo wae. Inkha petupu omukulu wewaneno, ine omukuatesiko wavo, ine omukuatate wambatisalua wafuapo, omukulu wovilinga upondola okuholovona omphange wambatisalua na alinge eliongiyo olio.—Tala onthele yati ““Onalupi Omphange Ena Okuendesa Eliongiyo Liokukaivisa?”
6. Omokonda yatyi omuendesi weliongiyo liokukaivisa, esukisila okulifuiika nawa?
6 Tyina tuamapewa onthele Mosikola Yovilinga via Huku, ine Meliongiyo Liovilinga, tutyilinga umwe nawa nokulifuiika nawa. Vamwe puonthue venda keliongiyo liokukaivisa tyihena na tyike vei mavakapopila ovanthu, ngako asokela etyi mavakapopia. Ngetyi tulinga tyina tuamapewa onthele Mosikola Yovilinga via Huku, ine Meliongiyo Liovilinga, nokuendesa eliongiyo liokukaivisa, tyesukisa okulifuiika nawa. Mokonda pahe eliongiyo liokukaivisa liatepululwa, okulifuiika nawa tyakolela opo eliongiyo liende nawa. Okulifuiika nawa tyakutikinya okunoñgonoka oku mamukaivisa tyina muhenende.
7. Oityi omuendesi weliongiyo esukisa okupopia?
7 Etyi Matyipopiwa-mo: Kese tyilongo omasuka-suka ovanthu elikalaila, moluotyo omupika wekolelo nokualunguka ketuavela etyi matupopi momaliongiyo okukaivisa. Ovipuka vimwe una okupopia vivasiwa pokakasa kati: “Etyi Upondola Okupopia Meliongiyo Liokukaivisa.” Meliongiyo olio haunene mulingwa omapulo nomakumbululo. Pamwe papondola okulingwa elekeso liafuiikwa nawa, ine ovidiu yapolwa mo jw.org. Tyina omuendesi apongiya eliongiyo liokukaivisa una okusoka kuetyi matyavela ondundo ovaivisi nokuvepameka pala okukaivisa.
Poku pongiya ohongele yupange woku kunda, manji o songola o sukila oku ivaluka ovina vi vetiya havio vi pamisa va manji va enda kupange woku kunda keteke liaco.
8. Ovipuka patyi omuendesi weliongiyo liokukaivisa mo Tyasapalo no Tyalumingu apondola okupopia?
8 Mongeleka, Motyasapalo ovaivisi ovanyingi vaava Omutala Womulavi no Despertai! Ovanyingi vaivisa Motyasapalo Notyalumingu, kavaivisa mokati kosimano, ngotyo vapondola okulimbuako elekeso vafuiikile Mefendelo Liombunga konthele yovilinga viokuivisa. Moluotyo, omuendesi inkha upitulula omalekeso ehepuiya avasiwa Movilinga Vietu Viouhamba tyipondola okuvekuatesako. Upondola okupopia ovipuka ovikuavo, ngetyi ovipuka vimwe viamoneka potyilongo, no nonthiki mbovipito vionongeleya mbuvasiwa momikanda ine okupopia etyi mamuya okupopia onthiki onkhuavo tyina muamavasi omunthu. Inkha meliongiyo liovilinga mualingwa elekeso Liomutala Womulavi ine o Despertai! omuendesi upondola okulinga omapulo kovaivisi vapopie etyi velilongesilako ine okupopia onongeleka vakala nambo mbupameka. Motyalumingu, omuendesi upondola okupopia etyi tyelikuata netyi tyapopia omikanda vikahi nokuawa mohanyi oyo. Omikanda viokulilongesa ngetyi, Onondaka Onongwa, Tehelela Huku, no Ombimbiliya Ilongesa, vipondola okuawa kese nthiki, ngotyo omuendesi weliongiyo upondola okupopia oñgeni viawa.
9. Oityi omuendesi ena okupopia meliongiyo liokukaivisa Motyasapalo no Tyalumingu putyina ewaneno likahi mosimanu yokambanya?
9 Inkha mewaneno vekahi nokuava omukanda wokukonga, omuendesi upondola okupopia oñgeni Omutala Womulavi no Despertai! ine o tratadu viawa mokueenda kuotyilinga otyo ine upondola okupopia oñgeni omuivisi ena okulinga tyina omunthu amalekesa esuko. Tupu upondola okupopia omokonda yatyi otyiwa okulinga okambanya.
10, 11. Omokonda yatyi tyesukisa ovaivisi velifuiike, opo eliongiyo liokukaivisa liende nawa?
10 Oityi Ovaivisi Vena Okufuiika? Ovaivisi tyina venda peliongiyo liokukaivisa navo vena etyi valinga opo eliongiyo liende nawa. Mokulifuiika liwa, hamwe mefendelo liavo liombunga, mavañongonoka ovipuka mavivekuatesako okuavela ondundo ovaivisi ovakuavo. Tupu okulipongiya nawa muakutikinya okutyinda omikanda mokaivisa navio, tyina wenda peliongiyo liokukaivisa. Okulinga ngotyo tyikuatesako amuho okuenda noku mukaivisa tyihasete.
11 Otyipuka otyikuavo tyakolela tuesukisa okulinga, okuhika liwa tyina eliongiyo liokukaivisa liehenehimbike. Tuna okulinga ononkhono mbokuhika liwa komaliongiyo aeho ewaneno. Hatyiwako okuseta okuhika keliongiyo liovilinga viokuivisa mokonda tyipondola okunguanguanesa omuendesi. Ñgeni ngotyo? Omukuatate malingi eliongiyo olio, utala kovipuka ovinyingi tyina eliongiyo liehenehimbike. Inkha pena vala ovaivisi vehehi, ngwe upondola okusoka vakaivisa vala pana paiviswa-iviswale. Inkha oku mavakaivisa okokule, vapondola okuenda netuku-tuku ine nomota. Inkha apa muivisa pena onongangala, omuendesi upondola okupunga omukuatate aivise notyikundyi tyo nomphange. Omuivisi uvela, una okukaivisa pomaumbo o popepi. Ovaivisi ovape, vena okupungwa na vana valongoka. Mahi, inkha pena ovaivisi vaseta, vena okukutikinyuamo. Pamwe pena tyimwe tyipondola okutusetesa. Mahi, inkha apeho tuhole okuseta, tuna okutala nawa. Okuti omokonda katuesukile nomaliongiyo okuivisa? Ine omokonda katufuiika nawa ovilinga vietu viomeumbo?
12. Namphila pamwe upondola okupanga okukaivisa nomuivisi umwe, mahi ovipuka patyi wesukisa okuhinangela?
12 Ovaivisi veya peliongiyo liokukaivisa vapondola okuholovona una mavakaivisa nae tyina eliongiyo liehenehimbike, ine vapondola okuenda na una vapungwa nae. Inkha otyo uhole okulinga, okuti tyitavela ‘okulipameka kumwe’ novakuatate, tyina uundapa vala nepanga liove ononthiki ambuho? (2 Cor. 6:11-13, pokatoi) Okuti pamwe upondola okuovola okuundapa nomuivisi omupe opo umukuateseko okukala nounongo wokulongesa? (1 Cor. 10:24; 1 Tim. 4:13, 15) Tala nawa etyi ulongesa vakuenyi, okukutinyamo oñgeni upondola okuhimbika okupopia nomunthu. Tyina muamapungwa, lityilika okupilulula ou muapungwa nae, amuende noku mamukaivisa.
13. Inkha aveho vakala tyityii, avelifuika oñgeni eliongiyo liokukaivisa malitukuatesako?
13 Ovalanduli va Jesus 70, ava apungile na vende movilinga viokuivisa, “vakondokele nehambu.” (Luc. 10:17) Tyotyili, eliongiyo Jesus alingile novalongwa vae tyina vehenekaivise lievekuatesileko vafuisepo otyilinga tyavo. Tupu, hono omaliongiyo okuenda movilinga viokuivisa, etukuatesako unene. Inkha aveho vakala tyityii, avalingi onthele yavo, eliongiyo liokukaivisa malitupameka, nokutukuatesako, nokutuonganeka na tufuisepo otyilinga tyetu “tyokuivisa kombanda yohi aiho.”—Mat. 24:14.