Omaliongiyo Okuenda Movilinga Viokuivisa
1. Omokonda yatyi tuasukalala nokuenda movilinga viokuivisa monkhalelo yaongana nawa?
1 Jesus waava ongeleka yokuendesa ovilinga viokuivisa Ouhamba monkhalelo yaongana nawa. Tupu hono, vana vekahi komutue yovilinga viokuivisa Ouhamba vahanda ovilinga ovio vilingwe monkhalelo yaongana nawa. Mokonda yotyo, omawaneno ouye auho valinga omaliongiyo okuenda movilinga viokuivisa.—Mat. 24:45-47; 25:21; Luc. 10:1-7.
2. Oityi tyikevelelwa momaliongiyo okuenda movilinga viokuivisa?
2 Okuonganeka Nawa Ovipuka: Omaliongiyo okuenda movilinga viokuivisa, alingwa pala okutupameka, nokutuavela onondonga konthele yoñgeni matuundapa movilinga ovio, nehongolelo pala vana mavaundapa movilinga viokuivisa. Otestu yonthiki ipondola okutangwa tyina yelikuata novilinga viokuivisa. Ovikando vimue, omahinangeleso ekahi Movilinga Vietu Viouhamba, momukanda Raciocínio, ine momukanda Escola do Ministério, ena okupopiwa pala okuvatela aveho pala ovilinga vionthiki oyo. Tupu, mupondola okulinga elekeso konthele yomikanda maviawa. Putyina nkhele muhenelinge elikuambelo liokumanuhula, aveho vena okuiwa olie makaundapa nae, iya opi pakala o telitoliu apa mavakaundapa. Konyima yeliongiyo olio liono minutu 15, aveho vena okuenda kono telitoliu mbavo.
3. Olie mapiti komutue pala okuonganeka omaliongiyo okuenda movilinga viokuivisa?
3 Oñgeni Aonganekwa? Omukulu wovilinga, una otyilinga tyokuonganeka omaliongiyo okuenda movilinga viokuivisa. Ovakulu vewaneno vo grupu ine ovakuatesiko vovakulu vewaneno, vena otyilinga tyokuenda movilinga viokuivisa nono grupu mbavo Motyasapalo, no Tyalumingu. Ovakulu vamue vewaneno ine ovakuatesiko vewaneno, vapondola okuenda movilinga viokuivisa nono grupu mokati kosimano. Ovakulu vewaneno vo grupu, vaundapa kumue nomukulu wovilinga opo vakale nono telitoliu mbutuuka tyina vakaundapa movilinga viokuivisa umbo na umbo Motyasapalo, no Tyalumingu. Mokueenda kuosimano, omukulu wovilinga, maonganeka ovipuka pala vana mavaendesa ono grupu pala okuenda movilinga viokuivisa.
4-6. (a) Omokonda yatyi omaliongiyo okuenda movilinga viokuivisa ena okulingwa mo telitoliu yewaneno? (b) Oityi tyipondola okulingwa pala okutokola esuko liomaliongiyo okuenda movilinga viokuivisa?
4 Opi Omaliongiyo oo Ena Okulingilwa? Movityasapalo no Tyalumingu, omawaneno eheliongiye vala pomphangu ike, ovakulu vewaneno vapondola okuovola onomphangu mbukahi nawa pala okulinga omaliongiyo oo. Hahe momaumbo ovakuatate eliyandyana motelitoliu yewaneno. Omawaneno omanyingi okuliongiya Motyalumingu pala okutehelela elongomona, nokulilongesa Omutala Womulavi, tyina vamamane vaundapesa Ondyuo Yomaliongiyo pala okulinga eliongiyo liokuenda movilinga viokuivisa. Ovikando vimue papondola okulingwa ononkhono opo tuhaende unene pala okuhika ko telitoliu, nokutala inkha apa ovaivisi vekahi nokuliongiya paviuka pala okuundapa o telitoliu aiho.
5 Tyitei kuetyi tyikahi o telitoliu, muna okutokola omuvo ukahi nawa pala okulinga omaliongiyo okuenda movilinga viokuivisa, novikando viñgapi mosimano muna okulinga omaliongiyo oo. Omapulo aa ekahi pombuelo, apondola okuvatela okutokola opi omaliongiyo okuenda movilinga viokuivisa apondola okulingilwa.
6 O telitoliu patyi yesukisa okuundapwa vali? Omuvo patyi ukahi vali nawa pala okuundapa movilinga viokuivisa umbo na umbo? Okuti mupondola okuovola omuvo umue kokangulohi pala ovilinga viokuivisa umbo na umbo ine okukatalelapo ovanthu muapopia navo? Atyiho tyapongiyua pala ovilinga viokuivisa, tyina okupakwa pekuadru liomaiviso ewaneno. Ehando liovaivisi aveho Vouhamba, okuundapa o telitoliu aiho vapewa opo tutyivile okupopia nga apostolu Paulu wapopile okuti: “Ndyitupu vali o telitoliu nkhele ihene undapwe.”—Rom. 15:23.
7. Una waholovonua pala okuendesa eliongiyo liovilinga viokuivisa una otyilinga patyi?
7 Okulinga Omaliongiyo Okuenda Movilinga Viokuivisa: Una waholovonua pala okulinga eliongiyo olio, elipongiye nawa opo alekese okuti una onthilo onene nepongiyo olio lia Huku. Omaliongiyo oo, ena okuhimbika mo ola, nokupameka ovaivisi. Tupu, ahalambe pono minutu 15. Omukuatate maendesa eliongiyo, putyina nkhele eliongiyo lihenehimbike, una okunoñgonoka ono telitoliu patyi ovaivisi mavakaundapa. Namphila katyesukisile okukevelela vana vehika konthyulilo yeliongiyo, inkha ono grupu mambukaava oumbangi umbo na umbo, okupopia apa ovo vapondola okumuvasa tyipondola okuvatela unene. Tyina eliongiyo liamapo, aveho vena okuenda kono telitoliu mbavo. Eliongiyo limue lipameka nokuaongana nawa, tyotyili liavela ehongolelo liesukisa opo aveho vekahi peliongiyo olio vafuisepo nawa ovilinga viavo viokuivisa monthiki oyo.—Pro. 11:14.
8. Omononkhalelo patyi vana vakala pomaliongiyo okuenda movilinga viokuivisa vapondola okuundapela kumue na vana vahongolela ovilinga ovio?
8 Okuenda Komaliongiyo Ovilinga Viokuivisa: Okuundapela kumue tyakolela. (Heb. 13:17) Tyina tyitavela, una wonganeka o grupu, mavatela kese umue wesukisa omunthu umue pala okuundapa nae. Otyiwa ovaivisi ovanongo okukala pomaliongiyo oo, opo vakuateseko ovaivisi ovape, na vana vehena ounongo movilinga ovio. Vana vafuapo pala okuundapa na kese munthu, vapondola okuvatela unene. (Pro. 27:17; Rom. 15:1, 2) Aveho vena okulinga ononkhono pala okuhika omutenya. Onthilo tuna nehongolelo olio lia Huku, novakuatate vetu, maituavela ondundo opo tulinge omapiluluko esukisa konthele oyo.—2 Cor. 6:3, 4; Fil. 2:4.
9. Omononkhalelo patyi mbakolela ovakokoli-ndyila vapondola okuvatela omaliongiyo ovilinga viokuivisa?
9 Ombatelo Yovakokoli-ndyila: Ombatelo yovakokoli-ndyila momaliongiyo okuenda movilinga viokuivisa yakolela, tupu, yaavela ondundo aveho. Tutyii okuti ovakokoli-ndyila vena ovilinga ovinyingi. Valongesa ovalongwa Ombimbiliya, nokutalelapo ovanthu, nkhele ovanyingi vena onombunga pala okutekula iya vaundapa movilinga via kaputu. Moluotyo, ovakokoli-ndyila kavapondola okusoka okuti vekahi nokukuluminyua pala okuenda komaliongiyo aeho aonganekwa newaneno, haunene inkha alingwa kese nthiki. Anthi, ovakokoli-ndyila vena okulinga ononkhono opo vakale pomaliongiyo amue ovilinga viokuivisa kese simano. Tyotyili, omaliongiyo ovilinga viokuivisa, akuatesako unene ovakuatate no nomphange mewaneno. Iya enoñgonoko ovakokoli-ndyila vena konthele Yombimbiliya, nounongo movilinga viokuivisa, tyipondola okuvatela unene vakuavo. Okukala apeho movilinga viokuivisa, tyivevatela okukala nounongo movilinga ovio. Ovo vapondola okuundapesa ounongo oo, pala okuvatela vakuavo. Ombili yavo movilinga viokuivisa, no yokukala pomaliongiyo ovilinga viokuivisa, ongeleka ongwa pala okuhetekela. Tupu, tupanda unene ononkhono ovakokoli-ndyila valinga opo vakale pomaliongiyo oo.
10. Omokonda yatyi tyaviuka ovaivisi aveho Vouhamba okuvatela nomutima auho epongiyo olio?
10 Ngetyi tyaendele na Jesus novalongwa vae, ovilinga vietu viokuivisa Ouhamba vifuiswapo tyina tuivisa umbo na umbo. Omaliongiyo okuenda movilinga viokuivisa aonganekwa opo tulipameke nokuundapa nombili movilinga ovio. Ovaivisi aveho vonondaka onongwa, vesukisa okulinga ononkhono opo vavatele ovilinga ovio. (Atos 5:42; 20:20) Atuho tulingei omapiluluko esukisa opo tuvatele omaliongiyo okuenda movilinga viokuivisa. Inkha tulinga ngotyo, tupondola okukala nonthumbi yokuti Jeova metuavela ononkhano onongwa iya tupu tupondola okuhambukiswa Omutumini wetu, Jesus Kristu, tyina tuivisa onondaka onongwa Mbouhamba wa Huku.—Mat. 25:34-40; 28:19, 20.