Omapulo Akumbululwa
◼ Onondonga patyi mbo Mbimbiliya mbulandulwa pala okuundapesa otelefone tyina ukahi meliongiyo nomovilinga viokuivisa?
“Kuna Omuvo Wokulinga Ovipuka Aviho.” (Ecl. 3:1): Otelefone ikuatesako okupopia novanthu ine okuhonekela vakuetu kese muvo. Mahi, kuna omuvo umwe Ovakristau vahapondola okutalulwa notelefone. Mongeleka, omaliongiyo etu omuvo wokufenda Jeova, nokupewa onondonga, nokulipameka na vakuetu. (Deu. 31:12; Sal. 22:22; Rom. 1:11, 12) Okuti tupondola okuika otelefone yetu tyina tukahi meliongiyo nokutanga vala onondaka tuahonekelwa motelefone tyina eliongiyo liamapu? Inkha hamwe tyesukisa okulala notelefone yaikuka mokonda yotyitateka tyimwe, otyiwa okuipaka monkhalelo ihaviele opo ihatumphulule vakuetu.
“Linga Ovipuka Aviho Mokonda Yonondaka Onongwa.” (1 Cor. 9:23): Pamwe, tyitavela okuundapesa otelefone movilinga viokuivisa. Mongeleka, omukuatate ukahi komutwe wotyikundyi upondola okuundapesa otelefone opo apopie novaivisi vekahi konthele onkhuavo yotelitoliu. Ovaivisi pamwe vaundapesa otelefone opo vapopie nomunthu wesuka notyili ine ovalongwa Vombimbiliya, haunene inkha vakala kokule. Otyiwa okuhapopi kotelefone tyina tukahi nokutomphola nomunthu. (2 Cor. 6:3) Putyina tukevelela ovaivisi vakuetu, hatyiwa okulityilika okupopia kotelefone ine okuhonekela epanga, atusuku vali novilinga viokuivisa?
Kala Nehumbilo Navakuenyi. (1 Cor. 10:24; Fil. 2:4): Katupondola okuseta okuenda komaliongiyo okuivisa, atusoko okuti tupondola okutelefonala ine okuhonekela omukuatate umwe opo tunoñgonoke opi otyikundyi tyikahi nokuivisa. Tyina tuaseta, tuava otyilinga tyokuonganeka vali otyikundyi. Tyotyili, mokonda yovipuka vimwe pamwe tupondola okuseta. Mahi, tyina tukala notyituwa tyokuya liwa komaliongiyo, tulekesa okuti tuna onthilo neongano lia Jeova, novakuatate vekahi komutwe, novaivisi vakuetu.