Omapulo Akumbululwa
◼ Tyina omuivisi henembatisalwe, omuvo ulifwepi ena okuya komaliongiyo nomovilinga viokuivisa opo ambatisalwe?
Okumbatisalwa etokolo liakolela omunthu esukisa okulinga. Anthi, tyina omunthu ehenetavelwe opo okumbatisalwa, wesukisa okunoñgonoka oityi Huku akevelela kwe. Tupu, wesukisa okulekesa okuti watokola okuendela movitumino via Huku.
Ovakristau vaavelwa ondundo opo vahayekepo okuliongiya, ngotyo omuivisi uhenembatisalwe wesukisa okulekesa okuti una ombili yokuenda apeho komaliongiyo. (Heb. 10:24, 25) Wesukisa okuava omakumbululo. Tupu, wesukisa okulihonekesa Mosikola Yovilinga via Huku, namphila otyo hatyitumino.
Tupu, Ovakristau aveho vapwa otyilinga tyokuivisa onondaka onongwa nokulinga ovalongwa, iya omuivisi tyina nkhele ehenembatisalwe una okuundapa nombili movilinga viokuivisa. (Mat. 24:14; 28:19, 20) Onohanyi onoñgapi ena okukala omuivisi wahambatisalelwe? Otyiwa palambe omuvo utuuka opo alekese okuti wapama pala okutualako novilinga viokuivisa onohanyi ambuho tyina amambatisalwa. (Sal. 78:37) Mahi, katyesukisile akale omuvo omunyingi okuhimbikila etyi akala omuivisi alo ambatisalwa, tyesikisa vala onohanyi mbumwe. Wesukisa okuava onovola onoñgapi? Petupu otyitumino konthele yotyo. Ovakulu veuaneno vesukisa okutala kese muivisi monkhalelo yelikalela navakuavo nokupola pokati.—Luc. 21:1-4.
Ovakulu veuaneno (ine ovakuatesiko vavo mewaneno muhena ovakulu ovanyingi vewaneno) tyina vatomphola na vana mavambatisalwa vena okuhinangela okuti ovanthu velikalaila, vesukisa okupunga nawa olie upondola okumbatisalwa. Vesukisa okutala nawa inkha tyotyili vahanda umwe okukala Onombangi mba Jeova nokulekesa okuti vapanda elao vena liokuliwaneka neongano lia Jeova novilinga viokuivisa. Ovakulu vewaneno vetyi okuti omulongwa kanoñgonokele ovipuka aviho ine utupu ounongo ngatyina omuivisi wambatisalua. Inkha ovakulu vewaneno vetyimona okuti omuivisi nkhele kafuilepo pala okumbatisalwa, vena okumupopila noluembia etyi vatokola nokumulekesa etyi tyipopia Ovihonekwa konthlele yetokolo olio nokulinga etyi tyesukisa opo akuatesueko okukula mopamphepo.