Tomphola na Mukuenyi Movilinga Viokuivisa
1. Oñgeni matuhetekela apostolu Paulu tyina tuundapa navakuetu movilinga viokuivisa?
1 Apostolu Paulu waimbukile okuti omuvo ankho akala no vomundyila yae omphitilo “yokulipameka otyikati.” (Rom. 1:12) Tyina uundapa namukuenyi movilinga viokuivisa, okuti wiimbuka okuti oo omuvo wokumupameka nokumukuatesapo? Opo wahatie vala filuu, oityi wahapopilila mukuenyi etyi tyekukuatesako opo wivise nounongo?
2. Oityi tuesukisa okulinga opo tukuateseko mukuetu movilinga viokuivisa okuahakala nowoma, iya otyo tyakolela mokonda yatyi?
2 Vekuatesako Okuhakala Nowoma: Ovaivisi vamwe vena owoma, otyo tyipondola okumoneka monkhalelo vapopia. Onthue tupondola okuvekuatesako okuhakala nowoma putyina tuvepandula. Oipi onkhalelo onkhuavo yokuvelunda opo vahakale nowoma? Omutalelipo umwe womawaneno wapopila omuivisi okuti nae ankho una owoma, noñgeni elikuambelo liemukuatesako okuhakala vali nowoma. Omukuatate umwe wapopia etyi tyemukuatesako okuhakala nowoma, wati: “Tete tyesukisa okuyola novanthu. Pamwe ndyina okulikuambela opo ndyityivile okulinga ngotyo.” Okuti pena etyi tyekukuatesako okuhakala nowoma movilinga viokuivisa? Tyipopila mukuenyi tyina mukahi movilinga viokuivisa.
3. Oityi tupondola okupopila mukuetu matyimukuatesako okukala vali omuivisi omunongo?
3 Mupopila Ononkhalelo Mbokuivisa: Okuti wavasa onkhalelo yapepuka ine epulo liokuhimbika etompho, hamwe konthele ya tyimwe tyaenda potyilongo, opo utyivile okuhimbika etompho nounongo pokuivisa? Okuti una onkhalelo imwe yapepuka waundapesile pokupopia nomunthu, ekutehelela? Tyipopila mukuenyi. (Pro. 27:17) Tyina mukatalelapo omunthu umwe, upondola okupopila mukuenyi etyi mokapopia, no ñgeni moketyipopia. Tyina wamamane okulongesa Ombimbiliya, upondola okuhangununa omokonda yatyi wapopila konthele ya tyimwe, ine yotestu imwe, ine onkhalelo imwe yokulongesa, okutala komasuka omulongwa.
4. Omokonda yatyi tuesukisila okukuatesako ovaivisi vakuetu?
4 Pomuvo wo Vakristau votete, ovaivisi ankho kavakuatesako vala vana vehelilongesa. Tupu, ankho velipameka poyavo. (Atos 11:23; 15:32) Apostolu Paulu walongesile omukuendye Timoteo nokumulunda opo apopile vakuavo etyi alongeswa. (2 Tim. 2:2) Tyina tuahalimbwa okulinga otyiwa pala Ovakristau vakuetu movilinga viokuivisa, havo vala tuhambukiswa nokukuatesako opo vakale ovaivisi ovanongo, tupu tuhambukiswa Tate yetu keulu.—Heb. 13:15, 16.