“Ongiya Ovanthu”
1. Ovionge viononthiki ononthatu no viovilongo ovinyingi omonkhalelo patyi vielifwa novionge vialingilwe nova Isilayeli etyi vatunda mo Egitu?
1 Pakala vala katutu etyi ova Isilayeli vatunda mo Egitu, Jeova avela Moisesi onondonga pala “okuongiya ovanthu” Pomphunda Sinai opo vatehelele onondaka mbae navakale nonthilo nae, nokulongesa ovana vavo onondyila Mbae. (Deu. 4:10-13) Wali omuwo wehinangelo nokupameka unene ekolelo ngatyi! Mokueenda kuonohanyi mambulandulako, ovanthu va Jeova maveliongiya movionge ovinene opo valongeswe na Jeova. Oityi tuna okulinga opo tupoleko ouwa?
2. Oityi tuna okuilinga opo “tukale tyelipongiya” pala otyonge tyetu?
2 “Kala Tyelipongiya”: Jeova watumine ova Isilayeli opo “vakale tyelipongiya” pala otyonge matyilingilwa Pomphunda Sinai. (Êx. 19:10, 11) Ngova Isilayeli, okulipongiya tyakolela pala aveho mavakakala potyonge, ha vo vana vala mavakalinga ononthele. Mongeleka, ovanyingi mavesukisa okuita kovilinga viavo. Hamwe onkhalelo yove yelifwa noya Neemia. Neemia ankho uhanda okusapo ovilinga viae viokuavela ovinyu Ohamba Artaxerxe opo aye ko Jelusalei okukapindulapo ovimato nokukuatesako okutunga, mahi ankho utyii okuti Ohamba ipondola okuhetavela. Moluotyo, welikuambela nomutima wakola aiti etyi ahanda. Ohamba aimuyeke alo umwe aimuavela etyi esukisa opo akatunge! (Nee. 2:1-9) Tupu tyehekuita vala komuhona wove, okuti wasokale oñgeni moende kotyonge naapa mokehikila? Ovakulu vewaneno mavakala nehambu liokukuatesako aveho vesuka nekuateso. Linga omphango yokuhika liwa kese nthiki nokulipongiya pala “okutehelela nawa” etyi mokeiva.—Heb. 2:1.
3. Oityi matyitukuatesako okupongiya omutima wetu pala otyonge?
3 Otyikuavo tuesukisa okupongiya omutima wetu, opo tutyivile okukatehelela nokulongoka. (Esd. 7:10) Ehinangeleso liotyonge malipakua mo site jw.org nokuhonekua onosapi mbomalongomona aeho notestu ike ine onombali Mbombimbiliya kese nthiki. Otyo otyiwa pala onombunga velilongese mbo monthiki Yefendelo Liombunga monosimanu mambutetekela kotyonge tyetu. Ovaivisi vamwe vapolamo ehinangelo olio aveliundapesa pala okuhoneka ononthele mbavilapo mokueenda kuotyonge.
4. Oñgeni ovohe vapondola okuundapesa otyonge opo valongese ovana vavo?
4 ‘Longesa Ovana Vove’: Otyipuka tyimwe motyonge tyalingilwe Pomphunda Sinai, ovohe ova Isilayeli ankho vesukisa okulinga, “okulongesa ovana vavo.” (Deu. 4:10) Otyonge tyavela ovohe omphitilo ongwa yokulinga ngotyo. Ovohe vesukisa okupumphama novana vavo mokueenda kuotyonge nokuvekuatesako okutehelela nawa. Konthyulilo ya kese nthiki, natyina otyonge tyamapu onombunga vapondola okutomphola konthele yotyonge mefendelo liavo liombunga.
5. Oñgeni tupondola okuvasa ouwa wokukala potyonge matyiya?
5 Otyonge tyalingilwe Pomphunda Sinai tyakuatesileko ova Isilayeli okupanda elao lielikalela liokukala ovanthu va Huku. (Deu. 4:7, 8) Ovionge vietu navio vilingwa opo vitukuatesako monkhalelo ngoyo. Mononthiki ononthatu matyitukuatesako okusapo ouye wa Satanasi atuliwaneka novakuatate vetu momphangu ongwa nokupameka opalaisu yopamphepo. (Isa. 35:7-9) Nonthiki ya Jeova ikahi popepi, katuhande okupumbwa omphitilo oyo yokuliwaneka novakuatate vetu opo tulipameke!—Heb. 10:24, 25.