Ovilinga Viokukonga Ovanthu
1. Onalupi matuhimbika okukonga ovanthu opo veye kotyonge tyo 2014?
1 Inkha wahanda okukonga omapanga ine ombunga opo veye kotyipito tyove, molingi ononkhono mbokuteleka nawa nokuvekonga monkhalelo ihambukiswa. Tyelifwa notyo, kualingwa ononkhono ononene mbokuonganeka otyonge tyononthiki ononthatu novionge viovilongo mo 2014. Tyina kuamakambe onosimano ononthatu opo otyonge tyihimbike, matukala nelao liokukonga vakuetu opo veye kotyonge. Oityi matyitukuatesako okuvekonga noundyandyi?
2. Oityi matyitulundu okuundapa unene movilinga viokukonga?
2 Matukala nombili yokuundapa unene motyilinga otyo inkha tusoka kouwa matukala nao mokutambula onkhuta Jeova metuavela motyonge. (Isa. 65:13, 14) Tupu tuna okuhinangela okuti ovilinga ovio vihole okueta ouwa. Ovanthu matukongo maveya okutehela otyonge kumwe nonthwe. Mahi onkhalelo ovanthu mavakumbulula ononkhono tukahi nokulinga mayeetela omunkhima Jeova nokulekesa okuti omuna-tyali.—Sal. 145:3, 7; Rev. 22:17.
3. Oñgeni omukanda wokukonga mawawa?
3 Ovakulu va kese ewaneno vena okutokola oñgeni ewaneno maliave omukanda wokukonga, nokupopia inkha tyitavela okuusa momaumbo muhena ovanthu ine okuava mounyingi potyilongo tyavo. Tyina tuundapa movilinga ovio mo Tyasapalo no Tyalumingu, tupu tuesukisa okuava Omutala Womulavi no Despertai! inkha tyitavela. Inkha o Tyasapalo tyotete mohanyi tukahi nokuava omukanda wokukonga, tuna okuava vala omukanda wokukonga tyipona okuhimbika okulongesa ovanthu Ombimbiliya. Tyina otyilinga tyokukonga tyamapu, tyotyili matuhambukwa unene okunoñgonoka okuti tuaundapa nehambu okukonga ovanthu ovanyingi veliwaneke kumwe nonthwe kotyipito otyinene Jeova metuavela!