“Kala Novituwa Oviwa Pokati Komalongo”

1. Omokonda yatyi otyiwa okukala novituwa oviwa tyina tuenda kovionge?

¹ Tutalwa unene novanthu tyina tuenda kovionge vietu kese nima, ngotyo otyiwa tukale novituwa oviwa vilekesa okuti tuvafendi va Huku yetu. (Lev. 20:26) Onkhalelo yetu ongwa yokuvala nokulihiwisa, ina okulekesa okuti tuvalanduli votyotyili va Kristu. Tyina tuenda kovionge vietu, oñgeni tupondola ‘okulala novituwa oviwa pokati komalongo’ nokuavela omunkhima Tate yetu keulu?—1 Ped. 2:12.

2. Onomphitilo patyi tuna mbokulekesa ovituwa vietu vioukristau tyina tuenda kovionge?

² Lekesa Okuti Umukristau: Ohole ikahi pokati ketu nonkhalelo tupopia “novanthu vokondye,” vilekesa nawa okuelikalela kukahi pokati ketu novituwa ovivi viouye. (Col. 3:10; 4:5; 2 Tim. 3:1-5) Tuna okukala neholelo nokupwa elundo tyina tukahi mo hotele nokutomphola nawa novaundapi vo mombale, inkha pamoneka ovitateka. Ovituwa oviwa tupu viesukisa tyina tukuata pu vana vekahi nokulinga ovilinga viavo momphangu omo.

3. Ehinangeleso patyi liapewa ovohe iya omokonda yatyi?

³ Ovohe vesukisa okuyunga nawa ovana vavo, tyina vekahi movionge, no mombale, nomo hotele. (Pro. 29:15) Omukai umwe undapa mo hotele wapopila ovalinepi vamwe okuti: “Onthwe tuhole ovanthu venyi. Ombunga yove novana vove vena onondunge novituwa oviwa. Ovanthu aveho vaundapa muno vapopia nawa konthele yenyi iya tuhanda apeho konthyulilo yosimano mukale muno.”

4. Tyina tukahi mepundaumbo liotyonge, oñgeni tukalesa ovanthu vetutala?

⁴ Okuvala Nawa: Omivalo vietu tyina tuenda kotyonge vina okukala vionondunge, avihalekesa ovituwa vihaviukile viouye uno. (1 Tim. 2:9) Alo umwe tyina tulihonekesa pala okunyingila mo hotele ine okutundamo ine tyina tuatunda kovionge, tuna okuvala ovikutu vikahi nawa nokuasukuka. Ngotyo matuhambukwa tyina tukahi movionge vietu nokuhakala nohonyi tuna tuamavasi onomphitilo mbokuava oumbangi. Onkhalelo yetu ongwa novituwa oviwa, tyina tuenda kotyonge, kamatyipandwa vala novanthu vomitima omiwa opo vayovolwe nondaka ya Huku Ombimbiliya, mahi tupu mavietela ehambu Jeova.—Sof. 3:17.

Ehinangeleso Liotyonge Tyononthiki Ononthatu tyo 2014

◼ Omuvo: Mononthiki ambuho ononthatu omapito maaikulwa 6h00. Otyiimbo matyihimbika 8h20 mononthiki ambuho ononthatu. Putyina otyiimbo tyamahimbika okuhika, atuho tuna okuenda ponomphangu mbetu, opo otyonge tyihimbike monkhalelo yaongana. Mutano, no Tyasapalo otyonge matyimanuhuka 15h55, Tyalumingu 14h50.

◼ Ovionge Ovinene Viovilongo Ovinyingi: Konomphangu mbumwe makulingilwa ovionge viovilongo ovinyingi pomphangu ike. Kala tyityi okuti ombetele ikonga vala omawaneno amwe novanthu vo kovilongo ovikuavo tyina yamatale nawa ovipundi, napana patalama omatukutuku, nono hotele inkha pena. Inkha ovaivisi venda kovionge viovilongo ovinyingi vahakongolwe ovanthu vapondola okuhafumo. Inkha kumetyivili okuenda kotyonge wakongwa, kupondola okuholovona otyonge tyovilongo ovinyingi.

◼ Apa Patalamena Omatuku-tuku: Movionge aviho inkha omphangu mapatalama omatuku-tuku oyetu, vana maveya kotyonge kavesukisa okufeta, mahi omatuku-tuku ena okukalela omu ehikila. Mokonda omphangu yokutalamena omatuku-tuku onthutu, muhaetei omatuku-tuku omanyingi, lipakeleimo opo muendele vala metuku-tuku like inkha aveho vafuamo. Vana vatyinda ovilema ine ovavei ovo vela vena okupaka etuku-tuku pomphangu vapakelua.

◼ Okupakela Vakuetu Onomphangu: Tyina omapito komuhuka amaikulwa, mbambavo wahakahatekele ponomphango uhanda, olinthinthi navakuenyi. Okuhatale komahando etu, tyitulunda okuovola ouwa wavakuetu okulekesa okuti tuvakristau votyotyili nokuovola okuhilivika Huku. (João 13:34, 35; 1 Cor. 13:4, 5; 1 Ped. 2:12) Tupakela vala onomphangu vana tuendela navo metuku-tuku like ine ovo vana tukala navo meumbo like, na vana tulongesa Ombimbiliya. Vokuakulupa no vokuvela vapakelwa ovipundi viavo. Mokonda kavihi, papondola vala okupumphama wike ine vavali pombunga mavayungu una uvela ine wakulupa.

◼ Okulia: Mbambavo etelela okulia kuove, opo uhatunde potyonge pala okukalanda okulia mokueenda kuomuvo wokuomba. Upondola okutyinda okulia kuove mosaku onthutu itavela okupaka mombuelo yotyipundi tyove. Onosaku ononene, novipuka vityatyuka, novikunwa vikoleswa, kavipondola okutualwa motyonge.

◼ Oviawa Viotyali: Tupondola okulekesa olupandu luetu mokuava onombongo motyonge pala okuvatela ovilinga via Huku ouye auho.

◼ Ovihemba: Inkha ukahi nokunwa ovihemba, vietelela mokonda hamwe motyonge mutupu ovihemba ovio. Vana vena ouvela wesukisa okutomwa nononguya tyina vekahi motyonge kavapondola okumbuyumba pana papakwa esilo tyilinge motyonge ine mo hotele, mbupondola okutoma ovanthu.

◼ Okulunguka: Mbambavo lunguka opo uhelivete ine okusesunuka otunguka. Kese nima ovanthu ovanyingi vehole okulipumapo ine okutingusuka mokonda yokuvala ononkhaku mbayeluka. Otyiwa okuvala ononkhaku mbukahi nawa mbutavela okueenda pana payendama, nopo nondondelo ine popakuavo vali.

◼ Outuku-tuku Wokutyinda Ovana: Katupondola okutuala outuku-tuku oo potyonge. Opo mutyivile okuyunga nawa ovana venyi, vaumphame ponthele yenyi.

◼ Omuniko: Ovionge ovinyingi vihole okulingilwa monondyuo mbaikwa, iya opo mufile omphepo mupakwa ovifilamphepo ine muna vala oundyanena oututu. Moluotyo, otyiwa okuhawave omilela vinika unene, vipondola okulinga omapita vana vavela, navakuavo vokuna ovitateka konthele oyo.—1 Cor. 10:24.

◼ O Formulariu Queira Visitar (S-43): Tuna okuundapesa o formulariu Queira Visitar tyina tuavasa omunthu wesuka notyili pokuava oumbangi motyonge. Inkha wahoneka o formulariu oyo, upondola okuyavela ovakuatate vaundapa mo Seketa Yomikanda, ine omuhoneki weuaneno liove.

◼ Onombale: Hivilika Jeova tyina ukahi mombale mokukala novituwa oviwa. Okuvala nawa tyilekesa okuti Tuvakristau. Avela etyi una ovanthu vokuava inkha otyo tyilingwa.

◼ Vokueliava Pala Okuundapa Motyonge: Ehambu matukala nalio tyina tukahi motyonge maliliyawisa inkha tuliava pala okuundapa. Kese umwe uhanda okuvatela motyonge aye Koseketa Yovokuliava Pala Okuundapa Motyonge. Ovana nkhele vehena omanima 16 navo vapondola okuundapa, mahi vena okuundapa novohe ine omukulu omukuavo.