Onkhalelo Omphe Nokuhambukiswa Yokuivisa Mounyingi
1. Omawaneno okuna pana pakuata ovanthu ovanyingi apewa ondundo yokulinga tyi?
1 Omawaneno okuna pana pakuata ovanthu ovanyingi, apewa ondundo opo aonganeke ovilinga viokuivisa mounyingi, okupaka omikanda ko mesa ine omitala. Inkha muivisa monkhalelo oyo, omuivisi wike una okukala popepi. Mahi, inkha mamupake omikanda komitala, pena okukala ovaivisi vevali ovalume. Vana vaholovonwa vena okukala onondyandyi, nokulinga oupanga, nokuyakula nawa ovanthu. Inkha omunthu ukahi nokutala komutala, omuivisi una okumutompholesa, iya upondola okuhimbika okuti, “Nthiki imwe welipuliliale etyi Ombimbiliya ipopia konthele yosapi ei?” Ovaivisi ovakuavo vapondola okuava oumbangi kovanthu ovakuavo.
2. Popia ongeleka ilekesa esilivilo liokuivisa mounyingi nomikanda komitala.
2 Onkhalelo oyo yokuava oumbangi ikuatesako ovanthu ovanyingi okuhimbika okulilongesa Ombimbiliya. Omuhikuena umwe ankho ulongeswa mosikola onene wahonekela ko Nombangi mba Jeova okuovola opi apondola okuvasa Ondyuo Yomaliongiyo, mahi ahavasi Ondyuo naike Yomaliongiyo. Mosimano yalandulako amono omesa yomikanda pana ovanthu vaombela, aendepo. Ahimbika okulongeswa Ombimbiliya, konyima akala omuivisi iya ambatisalwa, pahe nae uundapa monkhalelo oyo yokuivisa.
3. Oñgeni ovanthu ovanyingi vapopia konthele yokuivisa mounyingi?
3 Omphange umwe utyihole tyokuivisa mounyingi, wapopia okuti: “Ovanthu vamwe vatalama opo vapole-po Omutala Womulavi no Despertai! omipe. Ovakuavo kaveneive Onombangi mba Jeova. Ame ndyiete okuti notyilinga etyi, ovanthu ovanyingi vapondola okuvasiwa.” Omphange omukuavo wati, “Onkhalelo oyo omphe yokuivisa ihambukiswa unene, mokonda ovanthu veya kuove, alo umwe tyina vehesukile notyili, mahi tyiveeta olumbwe.”
4. Omokonda yatyi otyiwa okupaka omutala womikanda pomphangu ike, no noola mbuike, kese osimano?
4 Otyiwa okupaka omutala womikanda pomphangu ike, mononthiki mbuike, no noola mbuike, kese osimano. Okulinga ngotyo, ovanthu vetyiliya okutala omutala oo avahakala vali nohonyi yokufuena-po nokupula ine okupolapo omukanda vahanda. Okuti ewaneno lienyi liaonganeka ovilinga viokuivisa monkhalelo ngoyo? Inkha ongotyo, ove upondola okuundapa monkhalelo oyo ihambukiswa nokuava ovinyango, “okuivisa Ouhamba wa Huku.”—Luc. 9:60.