Undapesa Nawa Omuvo Wove Movilinga Viokuivisa
Onombangi mba Jeova vakala movilinga viokuivisa onoola 1.945.487.604, mokuenda kuenima liovilinga lio 2014—tyilekesa okuti tuatokola okuundapa unene movilinga via Jeova! (Sal. 110:3; 1 Cor. 15:58) Mokonda “omuvo wahupapo kauhi,” hatyiwa tuundapese nawa omuvo wetu movilinga viokuivisa tupopie vali novanthu ovanyingi?—1 Cor. 7:29.
Okuundapesa nawa omuvo wetu, tyesukisa okupilulula onkhalelo yetu yokuivisa. Mongeleka, ankho tyina wivisa ukala onoola ononyingi otyo wahavasi omunthu nawike, okuti hatyiwa upilulule onkhalelo wivisa opo upopie vali novanthu ovanyingi? Omasuka-suka ovilongo elikalaila. Mahi, onondonga mambulandulako mbupondola okukukuatesako okuundapesa nawa omuvo wove opo ulityilike ‘okutaata omphepo.’— (1 Cor. 9:26)
Mahi, ovanthu ovanyingi komutenya vaundapa, omokonda yatyi wahaivisila umbo na umbo komakumbi ine kokangulohi, putyina ovanthu vavahiwa pomaumbo tyihena ovilinga? Komutenya, hahe vali okuivisa monondyila, ine kovalandesi.
Ankho apa muaholovona okuivisa nomitala kapakuate vali ovanthu ovanyingi, o Komisau Yovilinga Yewaneno, ipondola okutaindya oku mamukapaka omesa ine omitala viokuivisa, kukuata ovanthu ovanyingi.
Mongeleka, inkha tyina wivisa komuhuka movi Tyasapalo uvasa vali ovanthu, okuti tyitavela ukalongese ovalongwa vove Vombimbiliya komakumbi ine kongulohi? Tyina tukatalelapo ovanthu vakala mphangu ike, okuti tyitavela tulipakelemo opo tuende atuho?
Namphila omuvo auho tukala movilinga viokuivisa tyitavela tuuvalule, mahi ehambu lietu liliyawisa vali putyina tuamavasi ovanthu atuvelongesa. Ankho wamona okuti omuvo umwe wivisa kukahi nokuvasa ovanthu, ovola omuvo omukuavo. Likuambela ku Jeova, “Muene wovilinga” na ekuhongolele opo utyivile okuundapesa nawa omuvo wove movilinga viokuivisa!—Mat. 9:38.