Omapulo Akumbululwa
◼ Okuti tyitavela omuivisi aundapese o Internete opo aave oumbangi ine okulongesa omunthu ehei Ombimbiliya ukala kotyilongo otyikuavo?
Ovaivisi vamwe, vehole okuundapesa o Internete opo valongese ovanthu Ombimbiliya, vakala kovilongo ovikuavo kuailikwa ovilinga viokuivisa, ine okovilongo kuna vala ovaivisi vehehi. Pamwe, ovanthu vapopia navo vapondola umwe okutavela otyili. Mahi, pamwe omuivisi okupopia novanthu ehei mo internete ine okutuma o e-mail, tyipondola okumupaka motyiponga. (Tala Ovilinga Vietu Viouhamba via Julho yo 2007 p. 3 moputu) Namphila tuhanda okuvasa ovanthu vomutima waviuka opo tuvelongese otyili Tyouhamba, mahi pamwe okutomphola nomunthu tuhei, tyipondola okutukalesa nomapanga omavi ine okupopia novanthu vayapuka motyili. (1 Cor. 1:19-25; Col. 2:8) Tupu, movilongo muailikwa ovilinga Viokuivisa, pokulongesa ovanthu vakala movilongo ovio no internete, ovatumini vapodola okutyimona. Okuovola okulongesa ovanthu monkhalelo oyo tyipondola okupaka motyiponga ovakuatate no nomphange mbetu vakala movilongo ovio, vakuatwa. Ngotyo, ovaivisi kavapondola okutaindya ovanthu vakala movilongo ovikuavo mo internete vevelongese Ombimbiliya.
Tyina tuamaave oumbangi komunthu tuelivasa vala nae weya okupila motyilongo otyikuavo, tuna okupopia no filiyale yo motyilongo omunthu oo akala, ankho katulingi ngotyo katupondola okutualako okumulongesa tyina amakondoka kotyilongo tyae. Mahi, ankho o ngotyo, tupondola okumulekesa o jw.org, omu makavasa etyi tyimukuatesako, okuyawisa kenoñgonoko liae iya nokuvasa ombetele ine ondyuo yotyisangela tyo motyilongo tyae. Tupu tupondola okumuavela ondundo opo aovole Ondyuo Yomaliongiyo ikahi popepi naapa akala. Tyotyili, kovilongo vimwe kutupu Onondyuo Mbomaliongiyo. Mahi inkha omunthu tuapopia nae, uhanda okutaleluapo Nombangi ya Jeova motyilongo omu akala, tupondola okuhoneka okamukanda Queira Visitar (S-43), atukeavela omuhoneki wewaneno, upondola okunyingilila mo jw.org. Ovakuatate votyisangela tyihongolela ovilinga viokuivisa motyilongo omu omunthu oo akala, vetyii oñgeni vapondola okumukuatesako anoñgonoke otyili tya Huku.—Tala Ovilinga Vietu Viouhamba via Pepo Linene vio 2014 p. 7, Novilinga Vietu Viouhamba via Kuhuhu vio 2011 p. 2.
Inkha omunthu ankho tukahi nokutalelapo wailukila kotyilongo otyikuavo, ine hamwe ankho tukahi nokumulongesa Ombimbiliya, mahi tuemunoñgonokela vala mo internete, tuna okulinga ngetyi tyapopiwa pombanda. Mahi, tupondola okutualako okuyawisa enoñgonoko liae, alo pamoneka ovaivisi vo potyilongo tyae, ngavo vmulongesa. Mahi, ankho omunthu tuhanda okupopia nae, ukala motyilongo omu ovilinga viokuivisa viailikwa, tyesukisa okulunguka tyina tumuhonekela omukanda, ine okumulikalela notelefone ine onomakina onkhuavo.—Mat. 10:16.