Okuyawisa Ounongo Wetu Wokuivisa—Okukuatesako Ovape
Tyakolela Omokonda Yatyi: Ovalongwa va Jesus tyina ovape vesukisa okulilongesa “ovipuka aviho” evi Jesus evetuma, okukutikinyamo okulongesa vakuavo otyili. (Mat. 28:19, 20) Ovaivisi vamwe ovape, vafuapo-ale pala okulinga ononthele Mosikola Yovilinga via Huku iya tyipondola veholiale okuava oumbangi mombunga yavo nokupopila omapanga avo otyili. Mahi, tyina vatualako okuhumba etyi valongeswa, avanoñgonoka nawa okuti Jeova uhanda ovanthu vatyo aveho valongeswe onondaka onongwa, vapondola okukala nesuko liokuundapa movilinga viokuivisa. (Rom. 10:13, 14) Putyina vamakala ovaivisi, okuvelongesa nawa matyivekuatesako okukala nonthumbi yotyotyili opo vekule motyili.—Luc. 6:40.
Linga Ñga:
• Kuatesako omuivisi omupe okupongiya omikanda aviho makaivisa navio nevi makalongesa navio. Mulekesa oñgeni ove ufuiika otyipapo tyove, omuhangununina etyi omikanda ovio aviho vipopia.
• Holovonei kumwe nae elekeso lihepuiya likahi Movilinga Vietu Viouhamba iya amulilongesa-lio. Avela ondundo omuivisi omupe apopie elekeso olio monondaka mbae muene. Koyei elekeso like lielikuata netyi tyilingwa potyilongo tyenyi, pomalekeso ekahi momukanda Escola do Ministério pefo 82 amulilongesa-lio. Tupu mupopila omokonda yatyi tyakolela okuvala monkhalelo yaviuka.—2 Cor. 6:3, 4.
• Tualako okulongesa omuivisi omupe. Mulekesa okamukanda konondimbu mbokuivisa (cartão do território) iya o mulongesa oñgeni apondola okuundapesa omukanda wokuhonekwa ovanthu avasa movilinga viokuivisa umbu-na-umbu, omulekesa oñgeni apondola okuhoneka ovanthu vahanda okulilongesa. Mulongesa oñgeni apondola okuundapesa o jw.org movilinga viokuivisa, nokamukanda Boas Novas para Pessoas de Todas as Nações. Mukuatesako anoñgonoke oñgeni apondola okupopia monkhalelo ilunda ovanthu avesuku netyi apopia.—1 Cor. 3:6.
• Kala noumphua-lundo iya omupandula muetyi evila. (Prov. 25:11) Ava ongeleka ongwa. Ombili yove nesuko unalio novanthu, malivekuatesako mokueenda kuomuvo, avekuhetekela.
Tyilinga Mokueenda Kuohanyi:
• Undapa nomulongwa wove movilinga viokuivisa umbo-na-umbo, kataleleipo nae vana valekesa esuko, na vana ulongesa Ombimbiliya. Ankho utupu ovalongwa Vombimbiliya popia novaivisi vesukisa okukuatesako opo uundape navo movilinga viokuivisa.