Oityi Tupondola Okulinga Tukwateseko Vana Vatumbukilwa Novihuna?

Mononthiki mbuno ovihuna vivilapo vala. Ovanthu vana vokukakuatesako kovilongo kuna kuaenda ovihuna, vena okutyilinga tyaongana nawa. Opo ovilinga ovio viongane umwe nawa, Ononkhalamutwe Mbonombangi mba Siovaa mono Mbetele ambuho vapakamo Oseketa Yokukuatesako Vana Vatumbukilwa Novihuna.

Ovakulu vomoseketa omo, tyina vameivi okuti kuna oku kuamoneka ovihuna, vapopia novakulu vewaneno vokotyilongo oko opo vatale etyi ovaivisi vo mewaneno omo vesukisa. Tyina vamatale okuti ovipuka vialema, ovaivisi kamavetyivili, ovakulu vomo Mbetele vatuma-ko ovanthu mavakalulika otyilinga otyo. Pahe ovanthu ovo vatumwa-ko pamwe vakonga ovanthu vamwe vevekwateseko, tupu pamwe vaita ovanthu vaave etyi vena, okuti hatyo avalande ovipuka mavikesukisa kuna.

Okulinga ngotyo ovipuka tyikahi nawa mokonda tyitukwatesako okuhawane ovilinga vialingwa-le na vakwetu, kapakala ombwandya, iya katupeselelapo ovipuka. Mahi ine tyiti vala ou ulinga etyi ahanda, ou ulinga etyi ahanda, ovipuka kavikala nawa.

Ovakulu vokuatumwa no Mbetele ovo vetyii onombongo mbulifwe-pi mavesukisa, novanthu veñgapi mavevekwatesako. Tupu vapondola okupopia novanthu vokuundapa ku kaputu, pokutala-tala ovipuka maviende kuna kwamoneka ovihuna vahasete unene. Naina ine katuapelwe otyilinga tyokukongolola ovipuka maviende kuna kuatumbukila ovihuna hahe twehetyilinge, tupu ine katwaihanenwe opo twende-ko, otyiwa twahaye.

Mokonda onthwe tuhole vakwetu, tyina vamonekelwa novihuna twahanda okuvekuatesako. (Heb. 13:16) Naina, oityi tupondola okulinga? Tyimwe tupondola okulinga okuveitilako, nokuitilako vana veli nokuvekuatesako. Tupu tupondola okuava etyi tuna. Mokonda ovakulu vo Mbetele navo vapopilwa oku kuatumbukila ovihuna, vetyii umwe nawa oñgeni mavalingi onombongo tuava. Ine nonthwe tuhanda okukakuatesako vakuetu, tupondola okuhoneka omukanda Petição Para Voluntário do Departamento Local de Desenho/Construção (DC-50), pahe tyina tyameyapo avetuihana.

TALA OVIDIU YATI: OMBILA YATEYAPO ONONDYUO KO BRASIL, PAHE OKUMBULULA EPULO ELI:

Oityi wahumbapo vali povilinga Onombangi mba Siovaa valingile etyi ko Brazil kwaloka ombila imwe onene mo 2020?