Okukwatesako Vokwatumbukilwa Novihuna mo 2023 — “Twelimonena-ko Umwe Okuti Siovaa Una Olwembia”

Ombimbiliya yapopia okuti ‘kononthiki mbahulila-ko’ makumoneka ovihuna, ya “otyilongo matyikalwisa otyilongo otyikwavo.” (Mateusi 24:3, 7) Onthwe twetyimona umwe nawa menima liovilinga lyo 2023, okuti onondaka ombo mbukahi nokulifwila-po.a Mahi etyi movilongo vilamba 100 mwakala ovilwa, novinimawe, Onombangi mba Siovaa avahetekela olwembia lwa Siovaa. Vetyilinga ñgeni?

Mokweenda kwenima liovilinga lyo 2023, ovakwatate vetu vatumbukilwa novihuna vilamba 200, vimwe ovinimawe umwe, mahi ovikwavo viatuka umwe kovanthu. Opo Onombangi mba Siovaa vetyivile okukwatesako vakwavo, vamanena-po onombongo mbulamba po 10 milhões de dólares.b Onombongo ombo, mbatunda ponombongo mbuhole okwaawa novakwatate mouye auho. Tupu ovakwatate vamwe tyina vamatale potyilongo vakala pena vamwe vatumbukilwa novihuna, vapola umwe kotyavo opo vevekwateseko. Tala oñgeni onombongo uhole okwaava mbakwatesako vakwetu tufenda navo vatumbukilwa novihuna, movilongo vivali.

“Kuna Umwe Ovanthu Vehole Vakwavo”

Konohika mbumwe mbotyilongo tyo Nigéria, tyina ombila yamaloko omaande alinga umwe omanyingi, atalama vala. Mahi mu Kulindi yo 2022 omaande alingile umwe vali omanyingi tyilamba pweetyi mwene ehole okukala-kala-le. Omapia alamba po 676.000 aende nomaande. Ya ovanthu valamba po 2 milhões avataula momaumbo avo. Liwa-liwa Ombetele yoko Nigéria aitumu vokukwatesako vana vatumbukilwa novihuna, vekevepameke moupanga wavo na Huku, nokwonganeka ovilinga viokuvekwatesako.

Etyi Ovihuna Vialinga

• Ovaivisi vasapo omaumbo avo vena 7.505

• Omaumbo ateka naa ahanyauka-po ena 860

• Onondywo mbo Maliongiyo mbuna 90, n’Ondywo ike Yovionge ambuyula momaande

Etyi Twalinga Nonombongo

Twamanena-po onombongo mbulamba po 250 mil dólares, pala okulanda:

• Ovikulia, ngeetyi o nosaku mbolwoso, notyipoke, novikasa viomasa

• Nomakulusau no nomisikitelu

• Nokuviukisa onondywo mbateka-teka nokumbupindula-po

Oityi ovakwatate valinga opo vahapesele onombongo? Tyimwe valinga, okutala umwe nawa onondywo patyi mbesukisa okuviukiswa. Tyina vamatale okuti vesukisa umwe okutunga ondywo imwe, vatunga umwe novipuka vitungwa-le navio potyilongo opo.

Ovanyingi vokwatungailwa-ko vapandula unene. Omuhikwena umwe wati: “Omaande etusa umwe vala melamba, atyiho twalimine atyii nomeva, nondywo yetu aitoko-po atusala umwe vala ngootyo tyehena vali natyike. Mahi etyi vakwetu tufenda navo veya umwe monthiki yatyo oyo, avetutungila ondywo, atuhambukwa unene. Tupu Ombetele aitutumu okulia. Etyi vakwetu valekesa olwembia luli Swau 13:34, 35, atyituhuvisa unene. . . . Kuna umwe olwembia liotyotyili. Ame novo meumbo lietu twahanda okumupopila okuti twapandula unene amuho mweile okutukwatesako monthiki ankho twehulilwa.”

Tyina twamakakwatesako vakwetu vatumbukilwa novihuna, tyihuvisa umwe novanthu velitungaila navo. Osova imwe yo pokalongo katiwa Sabagreia ko Bayelsa, yapopia okuti: “Kuna omaongano amanyingi, nonongeleya ononyingi, mahi etyi twamona etyi, tyilingwa vala Nonombangi mba Siovaa. . . . Eongano [lienyi] nalio o limwe lisuka nokukwatesako ovanthu.”

“Twelimonena-ko Umwe Okuti Siovaa Una Olwembia”

Mu Hitandyila yo 2023, mepunda-umbo lyo Chile mwaenda ovihuna vina 400 vyo ohi inkhinduka otupia. Otupia otwo, atuyoko onofasenda mbulamba po 430.000, no nondywo ononyingi mulingilwa ovilinga viakaputu. Ovanthu vekehika po 8.000 avataula momaumbo avo. Etyi kwamoneka ovihuna ovio ombetele ailingi tyimwe ikwatesako vakwetu tufenda navo.

Etyi Ovihuna Vialinga

• Ovaivisi vena 222 avasipo omaumbo avo

• Onondywo mbuna 20 ambuhanyauka-po

Etyi Twalinga Nonombongo

Twamanena-po onombongo mbulamba 200 mil dólares, pala okulanda:

• Okulia, nomaande

• Nongasolina, no nondyapau, novihemba

• Nokutunga onondywo mbapia

Vomeumbo limwe vasoyele umwe unene etyi ovipuka ankho vena viahanyauka-po, okuti umwe neumbo liavo, neetyi ankho velitekula natyo. Pahe avesala umwe vala mankhanya. Pononthiki mbotete ankho tyivesoyesa okutala apa ankho pena eumbo liavo pesala vala otyipembe. Mahi etyi pahe vatala ondywo yavo ikahi nokutungwa katutu-katutu avehimbika umwe okukala nawa. Otyipuka tyimwe tyevekwatesako, okwatala olwembia lyo vokweya okutunga vena-lo. Otyo ngatyo umwe tyiveavela ondundo navo avakakwatesako okupindulapo ondywo ya vakwavo nayo ankho yahanyuka-po.

Ovanyingi pu ava tufenda navo, vahambukilwe unene etyi vakwateswako. Umwe wapopia okuti: “Tyokukwatesako ovanthu vatumbukilwa novihuna, otyali tya Siovaa. Etyi twatumbukilwa novihuna palamba vala onthiki ike, tukati ñgaa vakwetu veya okutukwatesako. Otyili, tyina twiiva okuti vakwetu vakwateswako tyituhambukiswa, mahi pahe tyina onthwe umwe tuli nokukwateswako, tuhambukwa vali unene. Tuhumba vali eongano lya Siovaa, nononkhono vakwetu tufenda navo valinga vahetekele olwembia lwa Siovaa, nesuko vena noonthwe avetukwatesako moupanga wetu na Siovaa, nomovipuka ovikwavo twesukisa. Movipuka ngoovio tutyimona okuti Siovaa una olwembia noonthwe.”

Tyina onthyulilo ifwena-ko vali ovihuna mavivili-po. (Luka 21:10, 11) Mahi pokati keongano lya Siovaa, tutyimona okuti Ohamba yolwembia Sesusi Kilisitu, ukahi noonthwe “ononthiki ambuho atee konthyulilo youye ou.” (Mateusi 28:20) Oviawa waavela mo donate.jw.org kotyali tyove, pala ovilinga vili nokulingwa mouye auho, novipuka ovikwavo, nomuvo wove, nononkhono ulinga, vilekesa okuti ove ukwatesako Ouhamba, ya uhole Ohamba yao. Twapandula otyali tyove otyinene.