Omapulo Ovatangi

Oityi tutila onthele yokwati: “Enyina Liove Lisukukiswe” ili m’Omutala Womulavi wa Junho yo 2020 yapotoyola umwe vali nawa etyi twii tyiyemba kenyina lya Siovaa, no kokuti oe wata-mo mokutumina?

Onthele oyo yapopile okuti, otyipuka otyinene vali ovanthu aveho, nonoandyu tuna okusuka natyo, okusukukisa enyina enene lya Huku, Siovaa. Etyi tyokuti, Siovaa wata-mo mokutumina ine katele-mo, natyo tyivandeka ñgoo kwootyo tyokusukukisa enyina liae. No tyokuti, ovanthu mavakakatela umwe mu Huku ine mavemuyeke-po, tyivandeka ñgoo vala ko tyokusukukisa enyina liae.

Oityi pehepano tupopila unene okuti otyipuka otyinene vali tuna okusuka natyo, enyina lya Siovaa, nokulisukukisa? Matupopi ovipuka vitatu vityilekesa.

Tyo tete, motyitaka tyo Endene, Satanasi wasilisa enyina lya Siovaa, wemuundula. Ovipuka Satanasi apulile Eva, ongatyina ankho eli nokuti Siovaa utupu-ale otyali, ovipuka ailika ovanthu vilekesa okuti una onya. Pahe, apopi umwe onondaka mbuviuka mu Siovaa yatyo, okumuti umwe onkhembi. Otyo alinga, tyasilisa umwe Siovaa. Pahe Satanasi atiwa umwe “Eliapu,” otyo okuti, “omutendeleyi.” (Suau 8:44) Eva pokwetavela komatutu a Satanasi, ngootyo waanya ku Huku, waanya okutuminwa nae. (Gên. 3:1-6) Okutuka opo, Satanasi una nokusilisa enyina lya Huku, uhahanesa omatutu atwala ovanthu kokusoka okuti Siovaa kekahi nawa. Vokutavela komatutu atyo oo, kavetavela-le ku Siovaa. Mahi ovanthu va Huku tyokusilisa enyina lya Huku, Siovaa, otyipuka otyivi vali unene vahahande. Tyokwasilisa enyina lya Huku, otyo umwe tyetweetela emone eli tuna-lio hono, otyo no mouye mweyulila vala ovivi.

Tya vali, opo Siovaa aetele oviwa ovipuka aviho atunga, wati maamena enyina liae, elisukula kovipuka aviho vilisilisa. Otyo otyo otyipuka otyinene vali Siovaa esuka natyo. Otyo atila: “Ame mandyisukukisa enyina liange enene.” (Eze. 36:23) Sesusi nae wetyipopia umwe nawa etyi ovafendi va Huku vena okusuka vali unene natyo pokulikwambela, etyi ati: “Enyina liove lisukukiswe.” (Mat. 6:9) Ombimbiliya yetyipopia ehimbwe tyokuti tyesukisa unene okunkhimaneka enyina lya Huku, Siovaa. Tala vala etyi tyapopia onotesitu mbumwe: 1 Crônicas 16:29 no Salmo 96:8 mbati: “Siovaa mupei omunkhima wata menyina liae.” O Salmo 66:2 yati: “Imbei oviimbo vihilivika enyina liae enene.” O Salmo 86:12 yati: “Mandyihivilika enyina liove apeho.” Nthiki imwe, Siovaa yatyo mwene wapopilile umwe keulu atyiivala mondywo yae mo Selusalei, pweetyi Sesusi atile: “Tate nkhimaneka enyina liove.” Ngwe Siovaa yatyo ati: “Ame nelinkhimaneka-le, iya mandyilinkhimaneka vali.” — Suau 12:28.a

Tya tatu, omphango ya Siovaa, apeho maiyembe vala kenyina liae. Nkhele tala vala: Tyina Omanima 1000 Kilisitu Matumina amapu, pahe ovanthu avatalwa umwe nawa, oityi matyikwame-ko? Okuti opo nkhele ovanthu nonoandyu mavakakala ñgoo tyeliyapauka mokonda yokusukukiswa kwenyina lya Huku? Opo tukumbulule epulo olio, matupopi ovipuka vivali viyemba ñgoo kokusukukisa enyina olio — tyokuti ovanthu mavayeke-po Siovaa, no tyokuti katele-mo mokutumina. Okuti ovanthu vokwamoneka umwe okuti kavayeke-po Siovaa, nkhele matyikevepwilisa vali okukakakatela mwe? Au. Opo pahe mavakalinga ovanthu vehena vali onkhali, vatalwa, vekahi umwe nawa. Nomwenyo vakakala nao opo pahe omwenyo umwe wahapu. Okuti opo nkhele tyokuti Huku oe wata-mo mokutumina matyikaeta vali onondyaya, nomaliyapauko pokati kovanthu nonoandyu? Au. Opo pahe aveho veli keulu, naava veli pano pohi, mavekelikwata-po umwe, tyityii okuti, Siovaa oe omutumini wata-mo. Ya pahe enyina lya Huku, Siovaa, malikakala ñgeni?

Pomuvo opo, enyina lya Siovaa malikasukuka umwe nawa, natyike vali matyikelisilisa. Mahi aveho, tyilinge ava veli keulu, tyilinge ava veli pano pohi, mavekesuka ñgoo nenyina olio enene lya Huku. Omokonda yatyi? Omokonda mavakamona ovipuka vihuvisa Siovaa mekevelingila. Nkhele tala vala: Mokonda Sesusi, makakondola outumini auho ku Siovaa Huku nomutima weliola, Huku ‘makakala ovipuka aviho pala aveho.’ (1 Kol. 15:28) Ovanthu aveho kombanda yeheke mavakahambukilwa ‘eyovo liovana va Huku.’ (Loma 8:21) Etyi Siovaa apanga-le kohale, matyikalingwa umwe, tyokuhonyeka aveho keulu na pano pohi, avelikwate-po, avalingi ombunga ike onene. — Efe. 1:10.

Ovipuka ovio aviho mavikalingwa, oñgeni mavikakalesa onoandyu mba Huku keulu, novanthu aveho pano pohi? Tyotyili, atuho matukesuka natyo tyokuhilivika enyina ewa lya Huku, Siovaa. Omwiimbi Ndaviti kononkhono mba Huku wahonekele okuti: “Siovaa Huku ahivilikwe . . . Enyina liae enene, lihivilikwe apeho.” (Sal. 72:18, 19) Apeho, ononthiki mbatyo ambuho, matukamona ovipuka oviwa vitutwala umwe kokuhilivika Siovaa.

Enyina lya Huku, Siovaa, lipopia umwe atyiho ngwe ekahi. Mahi haunene, enyina olio litusokesa kolwembia lwae. (1 Suau 4:8) Apeho matukahinangaila okuti, Siovaa wetutunga tupu o molwembia lwae, waava tupu otyilikutila tyeyovo o molwembia lwae, noomu atuminina utumina umwe nolwembia. Apeho matukamona ovipuka Siovaa meketulingila nolwembia. Apeho matukesuka nokukala vali noupanga omuwa na Tate yetu, nokwiimba oviimbo vihilivika enyina liae enene. — Sal. 73:28.