Omalapia Ovilwa
Kuna ovipuka ovinyingi visila omalapia ovanthu, mahi ovilwa nonondyaya, omalapia avio omanene vali. Tyilinge omafwalali ali movilwa, tyilinge vana vamwene ovilwa, vetyii umwe nawa oñgeni ovilwa vikalesa ovanthu.
OMAFWALALI ALI MOVILWA
“Tyina ovihuna ovinene — uti vala omono ovanthu vaipawa, omono ovanthu valemanekwa. Pahe omutima ulumpha-lumpha-mo vala.” — Gary wo ko Grã-Bretanha.
“Ame naloyelwe komwongo no motyipala, andyimono ovanthu ovanyingi veli nokunkhia, ovana novakulu. Okukalela vala okumona ovipuka ovio, ulinga vala ngoti utyinyama katyikulingi-ale vali navi.” — Wilmar, wo ko Colômbia.
“Okutala omunthu uli nokuloywa, katyikutundu momutwe. Apeho ulinga vala ngatyina wiivite omunthu oo uli nokuliyavela, omunthu oo kumulimbwa.” — Zafirah wo ko Estados Unidos.
OVANTHU VAMWENE OVILWA
“Ankho ndyisoka okuti petupu onthiki mandyikala nehambu. Ovilwa vilingisa otyiho, ulinga otyiho tyokuti venyi, nomapanga ove mavaipawa.” — Oleksandra wo ko Ucrânia.
“Okukevelela okupewa okulia nkhele tya ko 2 ola yo kombimba atee ko 23 ola otyo uli vala mombisa, tyilingisa otyiho mokonda usoka okuti ine vamwe valwa mavaponyokela mwoove.” — Daler wo ko Tajiquistão.
“Ovilwa vianthya melamba, viamphola oo tate, pahe ndyinthyiwe, ndyitupu vali omu napamena.” — Marie wo ko Ruanda.
Namphila ovanthu vapopiwa keulu oku vasilwa omalapia novilwa, mahi pehepano vatula omutima vena ombembwa. Tyihe-otyo vala, navo vena onthumbi yokuti ovilwa nonondyaya, apa katutu mavipu. Momutala ou Womulavi matuvasi-mo onotesitu mb’Ombimbiliya mambupopi oñgeni ovilwa mavikapwa-ko.