Vena Ombembwa Namphila Vakondyele Novilwa Nonondyaya
Gary wati: “Etyi nehenelilongese Ombimbiliya ankho ndyifwalali, ankho ndyilipula oityi kouye kweyulila ovilwa, oityi ovanthu velilingila onya, novikwavo vali. Mahi pahe pehepano ndyina ombembwa natula omutima. Ndyityii okuti Siovaa apa katutu maeta-ko ouye omupe, omphangu yombembwa.”
Gary haeko vala wakwatesiwako n’Ombimbiliya, tala ovakwavo yakwatesako.
OMBIMBILIYA YATI: “Siovaa ove ukahi nawa, okupolela-po ovanthu oviponyo kusete.” — Oviimbo 86:5.”
OTESITU EI YEKUKWATESAKO ÑGENI: “Ovelesikulu oyo yankhwatesako andyityimono okuti Siovaa una olwembia. Nayumba-ko onthumbi okuti ovipuka aviho nalingile movilwa Siovaa wevievela.” — Wilmar wo ko Colômbia.
OMBIMBILIYA YATI: “Ndyili nokulinga eulu epe, nohi omphe. Ovipuka vyo kohale, kamavikahinangailwa vali, nii kamavikeya vali komutima.” — Isaiya 65:17.
OTESITU EI YEKUKWATESAKO ÑGENI: “Na hono omutima wange ulumpha-lumpha-mo vala mokonda yovipuka namwene povilwa etyi ndyifwalali. Mahi otesitu oyo inthyinangelesa okuti ovipuka aviho ndyisoka vinthokotesa omutima, apa katutu Siovaa mevimane-ko. Hikevihinangela vali. Otyo otyiwa unene!” — Zafirah wo ko Estados Unidos.
OMBIMBILIYA YATI: “Pononthiki mbae omuviuki makayova, makukakala ombembwa onene apeho ngeetyi ohanyi itwalako apeho.” — Oviimbo 72:7.
OTESITU EI YEKUKWATESAKO ÑGENI: “Apeho ndyisoka vala konondaka ombo. Apa katutu, katukatokota vali omutwe, katukalinga vali otyiho, mokonda petupu vali otyivi natyike matyikamonekela vetu tuhole.” — Oleksandra wo ko Ucrânia.
OMBIMBILIYA YATI: “Ovanthu vove vokwanyima, mavakala vali nomwenyo. . . . Onwe vokukala meheke, pindukei-po, amukwiilila nehambu!” — Isaiya 26:19.
OTESITU EI YEKUKWATESAKO ÑGENI: “Pena ovanthu vomuhoko umwe velipakelele-mo vaipae ovanthu aveho vomuhoko wetu, omuhoko wo Tutsi, ovanyingi vombunga yange avaipawa. Mahi otesitu ei indyumbisa-ko onthumbi okuti vange vokwanyima matukelimona vali navo. Nahanda okukatehela vali onondaka mbavo tyina vamatutiliswa!” — Marie wo ko Ruanda.
OMBIMBILIYA YATI: “Apa katutu onondingavivi kamambukakala-ko vali . . . Mahi onondalawa mavakapiñgana ohi, avakakala-ko nehambu enene nombembwa onene.” — Oviimbo 37:10, 11.
OTESITU EI YEKUKWATESAKO ÑGENI: “Namphila ovilwa viapwa umwe, no ngootyo nkhele kuna ovanthu ovakalavi valinga onya vakwavo. Mahi etyi tyapopia ovelesikulu ei tyankhwatesako unene. Siovaa umona ovipuka aviho, neevi ndyili nokukondya navio uviete. Ngwe wati apa katutu ononkhumbi tuli nokukondya nambo mambukapwa-ko, atukembulimbwa.” — Daler wo ko Tajiquistão.
Ovanthu vapopiwa momukanda ou, havoko vala vakwateswako n’Ombimbiliya avakala nehambu, Onombangi ononyingi-ale mba Siovaa mbakwataiswako n’Ombimbiliya. Ovipuka velilongesa m’Ombimbiliya vivekwatesako okuhalingi okapungulula ovanthu vovivala ovikwavo, vomuhoko omukwavo, nokuheliyale poyavo mwene. (Ova Efesu 4:31, 32) Onombangi mba Siovaa kavelipake po viopulitika tupu kavaende kovilwa. — Swau 18:36.
Onombangi mba Siovaa velikwatesako unene na vakwavo vafenda navo. (Swau 13:35) Umwe utiwa o Oleksandra twapopi-ale, vataulilile kotyilongo tyimwe nou velilandula nae mokonda yovilwa. Wapopia wati: “Etyi twati vala konondimbu mbotyilongo otyo, tukati ñgana Onombangi vakwetu veya okutukevela. Otyipuka vetuyakulile nawa tyetukwatesileko unene atuhasete-ale okutyiliya kotyilongo oko.”
Tukukonga uye keliongiyo lietu, oko tulongeswa etyi Ombimbiliya ipopia tyitukwatesako okukala nombembwa, neetyi tuna okulinga tweendele mweetyi tulongeswa. Opo uvase Ondywo Yomaliongiyo ili popepi naapa ukala, nyingila mo jw.org, okuti hatyo ita ulongeswe Ombimbiliya momukanda Kalako Nomwenyo Apeho!