Tupandula Unene Okweevela Kwa Siovaa!

1-2. Oityi tutila onthwe tukahi ngomukwendye wapopiwa mopalangalafu yotete?

SOKA ñgeno omona umwe omukwendye, wekulila po vohe vena-tyo. Hono nthiki imwe, ovohe avatumbukilwa na tyimwe, avankhila-po umwe. Etyi omona oo etyiiva, atyimwiihama unene. Mahi matyimwiihama hatyotyo vala, nkhele pena vali otyikwavo matyivilisa-po olwiihamo ena-lo-ale. Pomutambo apopilwa okuti, ovohe valevalele ovipuka ovinyingi, vasa-po onongele ononene mbutala umwe vala mwe. Pahe soka, omona oo kamapiñgana vali olumono lwo vohe, mapiñgana onongele mbavo, onongele mbatyo ononene, nae ketyivili-ale okumbufeta. Ngwe ava vokwalevalelwe vekahi nokumbutantha.

² Etyi tyakala omukwendye oo, noonthwe otyo tukahi. Ovo tate yetu votete, ovo Andau na Eva, vali ovanthu vehena onkhali, vakalele motyilongo tyimwe otyiwa. (Ehim. 1:27; 2:​7-9) Motyilongo omo, ankho opala valinge ovahona, avakala nomwenyo wahapu. Mahi kapakalele-ale ehimbwe, ovipuka avityopoka. Atyiti umwe ovo vapeseka kotyilongo otyiwa, ovo vapeseka komwenyo wahapu. Pahe ankho oityi ovana vavo mavapiñgana kuvo? Ombimbiliya yati: “Ongeetyi kombanda yomunthu wike vala onkhali yanyingila mouye, ononkhia ambunyingilila monkhali, pahe ononkhia mbahahana movanthu aveho, mokonda aveho vena onkhali.” (Loma 5:12) Ku Andau twapiñgana-ko onkhali, ya onkhali itutwala kononkhia. Onkhali oyo, pahe yalinga ngatyina uti ongele imwe onene twasilwa, onthwe twehevili-ale okufeta. — Ovii. 49:8.

3. Oityi ononkhali mbetu mbaelekelwa ‘nonongele’?

³ Sesusi waeleka ononkhali mbetu ‘nonongele.’ (Mat. 6:12; Luka 11:4) Tyina twamalingi onkhali, ongatyina tuna etyi twalevala ku Siovaa. Siovaa ututantha-tyo umwe, wahanda tutyifete. Ine kapali natyike tyifeta pononkhali tulinga, opo ñgeno tukala vala nambo, atuyovoka vala tyina twankhia. — Loma 6:​7, 23.

4. (a) Ine katwakwatesilweko ñgeno atuho twakala ñgeni mokonda yonkhali? (Oviimbo 49:​7-9) (b) Tyina Ombimbiliya ipopia ondaka “onkhali,” ngootyo ili nokupopia-tyi? (Tala okakasa kati “Onkhali.”)

⁴ Okuti onthwe vala atwike, tutyivila okufeta, tukale vali novipuka ovo Andau na Eva vapesela? Nii vala onthwe katutyivili. (Tanga Oviimbo 49:​7-9.) Ine hatyetyi twakwatesiwako, ñgeno katukevela-le okuti haa matukakala nomwenyo wahapu, tupu ñgeno kutupu etutilo. Ñgeno tunkhia umwe vala atukakota ngovinyama. — Omup. 3:19; 2 Pet. 2:12.

5. Oityi Tate yetu wolwembia alinga, etuyovole konkhali twapiñgana? (Tala olutalatu lwo kondye.)

⁵ Nkhele tusokei komukwendye twapopia-le. Ine omukwendye oo ukati ñgana pena omunthu umwe omuhona umuti memufetela-ko onongele ambuho ovohe vasa-po, ukala ñgeni? Tyotyili, omukwendye oo uhambukwa, etavela otyali otyo alingwa. Na Tate yetu wolwembia Siovaa, una etyi elipola afete ongele yetu, onkhali twapiñgana ku Andau. Otyipuka otyo Sesusi wetyipopia ñgaa, wati: “Mokonda Huku uhole unene ouye, welipola Omona wae ongunga, opo ou uyumba onthumbi mwe ahakahanywe-ko, akamone omwenyo wahapu.” (Swau 3:16) Otyo yatyo Siovaa elipola, katyituyovola vala konkhali, mahi tupu tyitwavela omphitilo yokukala noupanga omuwa nae.

6. Onondaka patyi mbuli m’Ombimbiliya matupopi monthele ei? Ya omokonda yatyi matumbupopila?

⁶ Oityi tyalingwa-po opo tupole ouwa kotyali otyo otyinene, atuhukuluka kononkhali tulinga, ‘konongele’ mbetu? Epulo olio likumbululwa nonondaka ombu mbuvasiwa m’Ombimbiliya: Okuhonyeka, okupata ononkhali, okweevela, ofeto yeyovo, okuyovola, okutiwa tunondingaviwa. Monthele ei matupopi otyityi onondaka ombo mbuhangununa. Okusoka nawa kweetyi Siovaa alinga opo etweevele, matyitutwala kokumupandula vali unene.

OMPHANGO: OKUHONYEKA

7. (a) Etyi oo Andau na Eva valinga onkhali, oityi vanyona? (b) Onthwe vokwatuka moo Andau, oityi twesukisa okulinga? (Ova Loma 5:​10, 11)

⁷ Etyi ovo Andau na Eva valinga onkhali, kavapesekele vala komwenyo wahapu, mahi tupu vanyona oupanga omuwa vali nao na Tate yavo Siovaa. Potete, ovo Andau na Eva ankho veli mombunga ya Huku. (Luka 3:38) Mahi etyi vehetavelele, mombunga ya Huku avatewa-mo. Mombunga omo vatewa-mo pweetyi nkhele vehenekale novana. (Ehim. 3:​23, 24; 4:1) Pahe onthwe vokwatuka moo Andau, tuna okuhonyekwa na Siovaa, tulinge vali omapanga ae. (Tanga Ova Loma 5:​10, 11.) Otyo okuti, tuna okulikwatehila tukale noupanga omuwa na Siovaa. Omukanda umwe wati, ondaka yo Ngeleku yatiwa “okuhonyeka,” ipopia “okuhonyeka ovanthu ankho veliyele opo valinge omapanga.” Soka Siovaa oe umwe mwene welihinda alinge etyi matyituhonyeka vali nae. Oityi alinga?

ETYI TYALINGWA-PO: OKUPATA ONONKHALI

8. (a) Okupata ononkhali otyityi? (b) Okweevela otyityi?

⁸ Etyi Siovaa alinga opo ovanthu ovakwankhali vakale vali noupanga omuwa nae, okupata ononkhali. Pokupata ononkhali, pweetyi tyapeseka, papingiywa otyikwavo tyilifwe neetyi tyokwapeseka. Movihonekwa Viovakwa-Kilisitu mo Ngeleku, muna ondaka onkhwavo ilii nondaka okupata ononkhali. Ondaka oyo “okweevela,” okuhonyeka. (Loma 3:25) Okweevela oko kwapopiwa, okupa omunthu omphitilo yokukala nombembwa na Huku, nokukala noupanga omuwa nae.

9. Oityi Siovaa apakele-ko opo ova Isilayeli vaevelwe ononkhali mbavo?

⁹ Opo ova Isilayeli vakale noupanga omuwa na Siovaa, Siovaa wapakele-ko etyi ankho matyivekwatesako okweevelwa ononkhali mbavo. Mahi mwootyo ankho okwakwatelela-mo vala. Ova Isilayeli ankho valinga otyipito Tyokupata Ononkhali, like menima. Monthiki yatyo omo, omunene-nakwa ankho wiipaa ovinyama, avilingwa ovilikutila opo ovanthu vaevelwe ononkhali. Ovilikutila ovio viovinyama ankho kavityivili-ale okupola omunthu onkhali aimupu umwe, mokonda ovinyama kavielekwa-le nomunthu. Mahi no ngootyo, tyina omu Isilayeli walinga onkhali apakula otyilikutila Siovaa aita, Siovaa ankho umweevela umwe. (Hemb. 10:​1-4) Tupu otyipuka otyo tyokwaava ovilikutila mokonda yononkhali mbavo, ankho tyikwatesako ova Isilayeli okunoñgonoka okuti onkhali hatyipuka tyokunyana, nokusoka okuti vesukisa otyipuka tyiveyovola umwe vala like avahapalaika-po vali.

10. Oityi Siovaa alinga opo ayovole ovanthu konkhali like vala?

¹⁰ Oityi Siovaa alinga opo ayovole ovanthu konkhali like vala? Welipola Omona wae ehole, “waawa vala like atyahapalaikwa vali, opo atyinde-po ononkhali mbovanyingi.” (Hemb. 9:28) Sesusi waavele “omwenyo wae [alingi ofeto yeyovo opo] ayovole ovaunyingi.” (Mat. 20:28) Ofeto yeyovo otyityi?

ETYI TYAFETWA-PO: OFETO YEYOVO

11. (a) Omu mutyipopila Ombimbiliya, ofeto yeyovo otyityi? (b)  Omunthu patyi wata mokufeta ofeto yeyovo?

¹¹ Omu mutyipopila Ombimbiliya, ofeto yeyovo otyetyi tyifetwa pokupata ononkhali no pokuhonyeka ovanthu.a Siovaa wayeka ofeto yeyovo, opo apingiye-po etyi tyavombeswa. Ñgeni ngootyo? Hinangela okuti etyi ovo Andau na Eva valinga onkhali, vapeseka kokukala tyehena onkhali no komwenyo wahapu. Pahe ngootyo ankho pesukisa ofeto yeyovo ilifwe umwe nawa-nawa neetyi tyapeseka. (1 Tim. 2:6) Otyipuka otyo ankho tyifetwa vala nomulume omukulu (1) wehena nkhali, (2) upondola okukala-ko apeho, (3) mwene nae weliaava umwe alingwe otyilikutila, etunkhila. Omunthu ngoo, oe vala ankho upondola okutyivila okupingiya-po omwenyo wokwavombeswa, okupata onkhali.

12. Oityi tutila Sesusi ankho oe wata-mo mokufetwa pofeto yeyovo?

¹² Tala ovipuka vitatu tutila Sesusi oe umwe ankho wata-mo mokufetwa pofeto yeyovo. (1) Hamukwankhali-ko, “ngwe kalingile onkhali.” (1 Pet. 2:22) (2) Mokonda hamukwankhali-ko, upondola umwe okukala-ko apeho kombanda yohi. (3) Nae weliyeka umwe ankhie, aave omwenyo wae etuyovole. (Hemb. 10:​9, 10) Mokonda Sesusi hamukwankhali-ko, ankho ukahi umwe ngeetyi tyali Andau pweetyi ehenelinge onkhali. (1 Kol. 15:45) Naina etyi Sesusi aipawa, wetyivila umwe okupata ononkhali mba Andau. Otyo okuti, wetyivila umwe okukondola-po etyi Andau avombesile. (Loma 5:19) Otyo Sesusi atilwa “o Andau wahulilila.” Okutuka opo, kapesukisa vali omunthu omukwavo wehena nkhali eye afete pwootyo Andau avombesa. Sesusi waipawa umwe vala “like ahapalaika-po vali.” — Hemb. 7:27; 10:12.

13. Oityi tyelikalela pokuti nokupata ononkhali nofeto yeyovo?

¹³ Oityi tyelikalela pokuti nokupata ononkhali, nofeto yeyovo? Okupata ononkhali, otyetyi Huku alinga opo ovanthu vakale vali noupanga omuwa nae. Ofeto yeyovo, otyetyi tyafetwa pokupata ononkhali mbovanthu aveho. Ofeto oyo, ohonde ikola ya Sesusi twamomesilwa tuyovoke. — Efe. 1:7; Hemb. 9:14.

ETYI TYATUKA-KO: OKUYOVOLWA NOKUTIWA TUNONDINGAVIWA

14. Oityi pahe matulilongesa? Ya omokonda yatyi?

¹⁴ Oityi tyatuka kweetyi Siovaa alinga, tyokupata ononkhali? Ombimbiliya ipopia onondaka ononyingi mbulekesa ouwa watuka-ko. Namphila onondaka Ombimbiliya ipopia, tyiti ei ipopia etyi ei ipopia etyi, mahi ambuho mbupopia oviwa vituka kwootyo Siovaa alinga, tyokupata ononkhali, tyetwaavela omphitilo yokweevelwa nae. Pahe matutale onondaka ombo, na tumone ouwa tupola kokweevela kwa Siovaa.

15-16. (a) M’Ombimbiliya, ondaka “okuyovola” ipopia-tyi? (b) Okuyovolwa konkhali no kononkhia tyitukalesa ñgeni?

¹⁵ M’Ombimbiliya, ondaka okuyovola ipopia okuhukulula otyipuka, okufeta etyi tyityiyovola. Omutumwa Petulu otyipuka otyo wetyipopia ñgaa, wati: “Onwe mutyii umwe okuti havievi vivola viemuyovola, opalata, oolu, havio-ko viemuyovola komukalelo omuvi womwenyo, ou mwahilwa nonombwale mbenyi. Mahi mwayovolwa nohonde ikola, ngo yongi yehena apa yalemana, yehena otyinthembia, ohonde ya Kilisitu.” — 1 Pet. 1:​18, 19; okatoi.

¹⁶ Otyilikutila tyeyovo tyetuhukulula, twayovoka kokutuminwa nonkhali, nononkhia. (Loma 5:21) Tyotyili onthwe tupandula unene Siovaa, tupu tupandula Sesusi wafeta ohonde yae ikola, omwenyo wae, opo etuyovole. — 1 Kol. 15:22.

17-18. (a) Okutiwa tunondingaviwa tyilekesa-tyi? (b) Ouwa patyi atuho tupola-ko?

¹⁷ Okutiwa tunondingaviwa, tyilekesa okuti ongele ankho tuna-yo ina okufetwa, yafetwa-le, pahe twahukuluka. Atyiho tyahonekelwe tyanyimwa-po, pahe twasukuka. Otyipuka otyo Siovaa alinga, hakuti ngootyo tyapikiya omu mwene aviukisila ovipuka. Wetuti tupu tunondingaviwa hakuti okohalwetu mwene, nii katyilekesa okuti ononkhali tulinga umbunianga vala kesuku nambo. Mahi opo Siovaa etweevele ononkhali mbetu, onongele mbetu, utalela konthumbi tuna-yo mweetyi alinga tyokupata ononkhali, no motyilikutila tyeyovo tyafetwa. — Loma 3:24; Ngal. 2:16.

¹⁸ Ouwa patyi munthu na munthu apola-ko kokutiwa tunondingaviwa na Siovaa? Vana vokwakoywa vakatumine na Sesusi keulu, ovo vatiwa-le onondingaviwa, ovana va Huku. (Titu 3:7; 1 Swau 3:1) Ovo vaevelwa-le ononkhali mbavo. Ovo vata-mo umwe mokukakala Mouhamba wa Huku. Vetupu vali omukanda uveti valingaile ononkhali mbongandi no mbongandi. (Loma 8:​1, 2, 30) Vana mavakakala apeho pano pohi, ovo vatiwa-le onondingaviwa, omapanga a Huku. Navo vaevelwa-le ononkhali mbavo. (Tia. 2:​21-23) Otyinyingi tyovanthu mavakahupa mo Alumangendom, navo vapondola okukakala-ko apeho, no kononkhia avahakamakela-ko-ale vali. (Swau 11:26) “Onondingaviwa nonondingavivi” velele mononkhia, mavakatutiliswa. (Ovil. 24:15; Swau 5:​28, 29) Katutu-katutu ovanthu aveho vetavela ku Siovaa pano pohi, mavakayovokela “momunkhima wovana va Huku.” (Loma 8:21) Tala vala oviwa ovio aviho viatuka kweetyi tyalingwa tyokupata ononkhali, opo tuhonye vali na Tate yetu Siovaa!

19. Oityi tyetuyovola? (Tala okakasa kati: “Ouwa Tupola-ko.”)

¹⁹ Tyotyili, onthwe ankho tukahi umwe ngomukwendye twapopia mopalangalafu yotete, wapesekele kovipuka aviho, apiñgana vala ongele imwe onene ehevili-ale okufeta. Mahi pahe tupandula Siovaa wetukwatesako. Twahupila mweetyi tyalingwa tyokupata ononkhali, no mofeto yeyovo. Okuyumba onthumbi mu Sesusi Kilisitu tyituhukulula, tyituyovola konkhali no kononkhia. Ononkhali mbetu tupondola okumbweevelwa, naapa pahonaikilwe patilwe twalinga ononkhali, apanyimwa. Mahi otyipuka otyiwa vali, okuti pahe tupondola okukala noupanga omuwa na Tate yetu wolwembia, Siovaa.

20. Oityi matupopi monthele ilandula kweei?

²⁰ Okusoka umwe nawa kweetyi oo Siovaa na Sesusi vetulingila, matyitutwala kokuvepandula nomutima auho. (2 Kol. 5:15) Ine hatyetyi vetukwatesako, ñgeno tutupu-ale apa tukahupila. Mahi pahe, ouwa patyi munthu na munthu apola kokweevela kwa Siovaa? Otyo matupopi monthele ilandula kweei.