Oñgeni Upondola Okulilongesa Ombimbiliya Monkhalelo Ihambukiswa

Josue utanga ovitumino; ovimato vyo Jerikoo viatoka iya ondyuo ya Raabe aihatoko; Josue weyelula omankhanya otyo elikuambela

JOSUE ankho una otyilinga tyokuhongolela elongo lyo Isilayeli okuvetuala Motyilongo Tyalaelwe. Otyo ankho otyilinga tyihapepukile. Mahi Jeova emupameka etyi ati: “Kola omutima iya kala tyapama.” Jeova wapopilile Josue okuti inkha ankho utanga Ovitumino viae iya aendelamo, metyivili okulinga ovipuka monkhalelo ikahi nawa.—Josué 1:7, 8.

Onthue tukahi “momuvo wepuiya,” ngotyo tupondola okukala novitateka. (2 Timóteo 3:1) Inkha tuhanda okulinga nawa ovipuka nga Josue, nonthue tuna okulinga etyi Jeova emupopilile. Tuna okutanga Ombimbiliya ononthiki ambuho iya atuundapesa etyi tuatanga opo tulinge omatokolo omawa.

Mahi vamwe pu onthue kavetyivili okulilongesa ine vetupu ehambu liokulilongesa. No ngotyo, okulinga elilongeso lioulike tyakolela unene. Tyina utanga okakasa kati “Linga Ngetyi,” movasimo onondonga mambukukuatesako okupola ouwa kelilongeso liove iya okala nehambu.

Omuhoneki wono Salmu waimba okuti: “Nthyongolele mondyila yovitumino viove, mokonda neihambukilwa.” (Salmo 119:35) Nove upondola okuhambukwa tyina ulilongesa Ondaka ya Huku. Tyina utualako okulilongesa Ombimbiliya movasimo ovipuka oviwa.

Namphila ove utupu otyilinga tyokuhongolela elongo nga Josue, mahi una ovitateka momuenyo wove. Ngotyo, lilongesa Ondaka ya Huku iya oendelamo nga Josue. Inkha ulinga ngotyo, motyivili okulinga ovipuka monkhalelo ikahi nawa.

LINGA NGETYI

Tete likuambela. Ombimbiliya ina omalusoke a Jeova, iya ahonekwa opo tupoleko ouwa. Ngotyo, tyina utanga Ombimbiliya, ita ku Jeova opo ekukuateseko okunoñgonoka etyi motange, nokutyihinangaila iya nokutyiundapesa opo ulinge omatokolo omawa.—Esdras 7:10.
Lilinga omapulo. Ovola okulilinga omapulo tyina utanga Ombimbiliya na tyina utanga omikanda omikuavo. Lipula okuti: ‘Etyi tyindongesa-tyi konthele ya Jeova? Oñgeni tyelikuata nosapi Yombimbiliya? Oñgeni ndyipondola okuundapesa etyi nelilongesa opo ndyikuateseko vakuetu?’
Sokolola ku etyi ukahi nokulilongesa. Talamapo katutu, osokolola ku etyi ukahi nokutanga. Lipula okuti: ‘Oñgeni etyi ndyikahi nokutanga tyinkhalesa? Omokonda yatyi ndyilitehelela ngotyo? Oñgeni etyi natanga tyelikuata netyi tyamonekele momuenyo wange kohale, netyi tyikahi nokumoneka pehepano iya netyi matyikamoneka naame komutwe wandyila? Oñgeni ndyipondola okueendela monondonga ombu?’ (Jó 23:5; Salmo 49:3) Tyina usokolola, tala inkha utyivila okuhangununa omokonda yatyi Jeova apopila ovanthu vae opo velityilike ovituwa vimwe. Tupu, sokolola kovitateka vipondola okutundilila-ko inkha omunthu kaendela monondonga ukahi nokutanga.—Deuteronômio 32:28, 29.
Soka ngatyina nove opo ukahi. Mongeleka, tyina utanga ehipululo lya Jose, utyivila okusokolola etyi ankho tyikahi nokueenda-po etyi ovakulu vae vekahi nokumulandesa kova Isimayeli? (Gênesis 37:18-28) Oityi ove weete? Oityi vekahi nokupopia iya omuniko patyi wiivite? Linga ngatyina nove ankho opo ukahi. Olusoke patyi ankho vena iya oñgeni ankho velitehelela? Tyina ulinga ngotyo, mopolo vali esilivilo kuetyi ulilongesa
Undapesa oviti viokulilongesa. Eongano lya Jeova lituavela oviti vitukuatesako okulinga omaovololo ekahi nawa. Lilongesa oñgeni moundapesa oviti vivasiwa melaka liove, tyilinge mo internet ine omikanda. Ita ko vakuatate opo vekukuateseko okuundapesa nawa oviti ovio. Mongeleka, o Índice das Publicações da Torre de Vigia, Nomukanda Wokuovolola wo Nombangi mba Jeova, oviti vikuatesako okuvasa ovipuka ovinyingi viakolela iya tupu vihangununa ono versikulu mbumwe. Tupu, inkha una-o melaka liove, undapesa Omukanda Ukuatesako Okulilongesa Ondaka ya Huku. Omukanda oo utukuatesako okunoñgonoka nawa onomphangu, nomivo, novipuka viokueleka iya novikuavo vali.
Pitulula ovipuka viakolela vali. Otyo matyikukuatesako okuhinangela etyi welilongesa. Tupu, matyikukuatesako okupopila vakuenyi etyi wanoñgonoka. Okuti pena otyipuka welilongesila-ko upondola okuundapesa movilinga viokuivisa? Okulinga ngotyo, matyikukuatesako okuhinangela ovipuka viakolela vali iya na vakuenyi mavapolo ouwa ku etyi welilongesa.