Ombimbiliya Ilongesa—Ounongo Uhapu

NKHELE SOKA: Ñgeno wakatala ondyuo yokupakwa ovipuka vio kohale. Tyina utala ovipuka ovinyingi mondyuo omo, kavikahia-le nawa, vimwe viatyatyauka, vimwe viatandauka iya nkhele vimwe viakulupa unene mokonda viakalako omuvo omunyingi. Mahi tyina utala pena otyipuka tyimwe tyikahi vala nawa. Ove upondola okusoka okuti etyi nkhele otyipe. Ove opulu kuuna ukahi no kukuhongolela inkha otyipuka otyo otyipe. Ngwe ekukumbulula okuti: “Au” hatyipe-ko “etyi otyikulu vali kovipuka evi aviho vili muno iya nkhele nalumwe tyaviukisilwe.” Ove opulu: “okuti pena apa ankho muetyiholeka pekahi nawa?” omuhongoleli ati “Au,” “tyalokua-lokuale, nokuapukuaumunua novipepe. Ovanthu ovanyingi vahetekela-le okutyihanya-po.” Nokuahuva natyo, ove hamwe upondola okulipula okuti: ‘Otyipuka etyi tyatungwa natyi?’

Ombimbiliya ikahi ngo tyipuka otyo, Omukanda umwe wokohale tyipona omikanda omikuavo, namphila kuna omikanda omikulu. Mahi ngovipuka ovio viokohale viakulupa mokueenda kuomuvo, omikanda vimwe vio kohale kavietyivilile okutualako alo hono. Mongeleka konthele younongo, etyi vipopia hatyiliko iya aloo umwe ovanthu vokuatanga unene vetyiimbuka. Onondonga mbavio konthele yekongoko mbungua-nguanesa vali tyipona okukuatesako. Iya ovinyingi puvio kavielifuililepo, aloo umwe ononthele mbumwe mbahanyauka mokueenda komanima.’

Ombimbiliya yelikalela unene nomikanda omikuavo. Ombimbiliya Yahonekwa kohale momanima 3.500 konyima, mahi petupu onthele naike yakamba-po. Ombimbiliya yalambela movitateka vimwe ovinyingi: yayokwa, yailikwa iya yapopiwa omapita. Mahi etyi ilongesa tyahupa kovipuka ovio aviho. Namphila ounongo mouye ukahi nokuliyawisa unene iya Ombimbiliya o yokohale, mahi tyina ipopia konthele younongo tyihuvisa. Tala okakasa kati: “Okuti Ombimbiliya Nkhele Ina Esilivilo Pala Komutwe Wandyila Ine Itupu?”

ETYI OTYO UMWE TUESUKISA

Ove upondola okulipula okuti: ‘Etyi Ombimbiliya ilongesa nkhele tyina esilivilo mononthiki mbetu?’ Nkhele soka: ‘Ovitateka patyi ovanthu vehole vali okulwa navio hono? Ovipi vivetilisa vali owoma?’ Hamwe upondola okusoka kovita, no kokusilisa omphepo iya no koungangala. Pahe tala ovipuka vimwe ombimbiliya ilongesa. Olipulu okuti: Inkha ovanthu vetavelele etyi Ombimbiliya ilongesa, okuti ouye ñgeno wakala nawa?’

KALA NOMBEMBWA

“Vena ehambu ovokuna ombembwa, mokonda mavakaihanwa okuti ovana va Huku.” (Mateus 5:9) “Inkha tyitavela, muetyi muvila, kalei nombembwa novanthu aveho.”—Romanos 12:18.

OKANKHENDA NOKUEVELA

“Vena ehambu ovana-kankhenda, mokonda navo mavakalingilwa okankhenda.” (Mateus 5:7) “Kese umwe atualeko okukoleleya oviponyo viamukuavo, nokulievela pokati tyihakuluminyua, inkha umwe una ehunga liokunumana na mukuavo. Ngetyi Jeovaa emuevela, nonwe evelei vakuenyi.”—Colossenses 3:13.

OKUHALINGI OKAPUNGULULA

Huku “walinga omalongo aeho ovanthu, opo vakale kombanda yoohi.” (Atos 17:26) “Huku utupu okapungulula. Mahi, utavela kese omunthu una onthilo nae nokulinga etyi tyaviuka, momalongo aeho.”—Atos 10:34, 35.

KALA NONTHILO NOHI

“Iya Jeova Huku apake omulume motyikunino tyo Endene, pala okutyilima, nokutyiyunga.” (Gênesis 2:15) Huku “makahanyako vana vekahi nokuhanyauna ohi.”—Apcalipse 11:18.

LITYILIKA ELUNGAVI NO VIVI

“Liyunga kelungavi aliho, mokonda namphila omunthu ena omalumono omanyingi, omuenyo wae kauteimovipuka ena.” (Lucas 12:15) “Oundalelapo, novipuka aviho viasila, ine elungavi, vihapopiwe pokati kenyi, ngetyi tyaviuka kovanthu ovasukuki.”—Efésios 5:3.

KALA OMUKUATYILI IYA UNDAPA

“Onthue tuhanda okukala ovakuatyili movipuka aviho.” (Hebreus 13:18) “Otyimphulu tyihavake vali, mahi tyiundape nombili.”—Efésios 4:28

TYAKOLELA OKUKUATESAKO VANA VESUKISA

“Popiei onondaka mbuungumanesa vana vasoya, pamekei vokuatenda, pwei elundo novanthu aveho.” (1 Tessalonicenses 5:14) “Tekulei ononthyiwa-po, novahepe mononkhumbi mbavo.”—Tiago 1:27.

Ombimbiliya kaipopi vala ovipuka ovio, tupu ipopia ovipuka ovikuavo vitukuatesako momuenyo wetu. Itulongesa okusuka novipuka ovio iya nokuendela-mo. Inkha ovanthu ovanyingi valingile etyi ombimbiliya ipopia okuti, ñgeno kavatetululile ovitateka ovinyingi mouye? Tyotyili, etyi Ombimbiliya ilongesa apeho tyitualako! Okuti Ombimbiliya ipondola okukukuatesako?

OÑGENI ETYI OMBIMBILIYA ILONGESA TYIPONDOLA OKUKUETELA OUWA?

Omunongo umwe tyipona ovanthu vatyo aveho wati: “Ounongo utalelwa kovilinga viao inkha waviuka.” (Mateus 11:19, okatoi) Okuti ove kutyitavela? Onkhalelo ikahi nawa yokutala inkha una ounongo opokati kovilinga viove. Inkha okulilongesa Ombimbiliya tyieta ouwa, okuti ipondola okunkhuatesako momuenyo wange? Mahi oñgeni ipondola okunkhuatesako movitateka ndyina hono?’ Tutalei ongeleka imwe.

Delfina,b ankho una omuenyo ukahi nawa iya nehambu. Mahi liwa-liwa ovipuka avipiluluka. Omona wae womukainthu anyimi, otyinepo tyae atyipu iya esala vala nonongele ononyingi. Delfina uhinangela okuti: “Andyikala pehena apa ndyikuatelela. Nesala tyihena omona wange, nomulume aloo umwe tyihena ondyuo. Andyikala unene omapita, aloo umwe andyilipeleyela ononkhia, ankho ndyitupu vali ononkhono mbo kutualako nomuenyo.”

Delfina etavela okuti onondaka mbukahi mo mukanda wa Salmo 90:10 ombotyotyili. Onondaka ombo mbati: “Ononthiki mbomuenyo wetu mbuvasa vala pomanima omakwi epanduvali. Iya vana vokuakola, omanima omakwi etyinana. Mahi nongotyo omanima atyo oo, eyula ononkhumbi novitateka,kaasete okulamba.”

Momuvo wovitateka, Delfina wavasa ekuateso mo Mbimbiliya. Tyihuvisa unene onkhalelo Ombimbiliya yemukuatesako. Ononthele ononthatu mambulandulako iya nonokhuavo, mambulekesa oñgeni ovanthu ovanyingi navo vaendela monondonga mbo Mbombiliya avembundapesa opo vatetulule ovitateka momienyo viavo. Ovanthu ovo vamona okuti Ombimbiliya ikahi ngo tyipuka tyina tuapopia konthyimbi mondyuo ina mupakwa ovipuka viokohale. Ombimbiliya yelikalela unene nomikanda omikuavo vikalako ha avihasilivila vali. Mahi oityi Ombimbiliya ipopia, tyiikalesa tyelikalela nomikanda omikuavo? Okuti Ombimbiliya ondaka ya Huku umwe ine yovanthu?—1 Tessalonicenses 2:13.

Hamwe ove wetyimona-le okuti omuenyo omusupi iya weyula ovitateka. Mahi inkha utala okuti omuenyo wekulemena unene iya ngoti kumetyivili vali, opi upondola okuvasa epameko, neungumaneso iya no nondonga mambukukuatesako?

Tutalei ononkhalelo ononthatu mbo Ombimbiliya mbupondola okukukuatesako momuenyo wove. Ombimbiliya ipondola okutulongesa:

1. Okulityilika ononkhumbi apeho tyina tyitavela.

2. Okutetulula ovitateka tyina viamamoneka-po.

3. Okutala ovitateka monkhalelo yaviuka tyina tuhevili okuvitetulula.

Onthele mailandula-ko maipopi ononthele ononthatu.