Okuti Huku Walaa Okukuavela Omalumono?
‘Huku uhanda ove ukale omuhona, wokuna omatukutuku omanyingi, novitanda viava onombongo ononyingi. Inkha utavela kwe, ikula vala otyipapo tyove, iya omuavela onombongo ambuho una.’
NGETYI tyipopia o jornale imwe ilingwa mo Brazil, onongeleya mbumwe motyilongo otyo, mbupopila ovanthu onondaka ombo. Iya ovanthu ovanyingi vetavela onondaka ombo. Omukanda umwe wapopia konthele yolusoke luovanthu veliti Ovakristau mo Estadu Unidu okuti: “Ovanyingi vetavela okuti Huku uhanda ovanthu vakale ovahona. Iya vehehi . . . vetavela okuti inkha wavela Huku onombongo mbove, mekuavela vali onombongo ononyingi.”
Etavelo olio, vaihana okuti olumono lutunda ku huku, likahi nokuyandyana haunene movilongo vio ko Amelika-Latina, ngo mo Brazil. Iya ovanthu ovanyingi vahatekela monongeleya mbuna mbupopia okuti Huku walaa okuavela ovanthu omalumono no nombongo ononyingi. Mahi, okuti tyotyili Huku walaa okuavela omalumono vana vemuumbila? Okuti kohale ovaumbili va Huku, aveho vali ovahona?
Otyili Movihonekwa vio Hebreu, tuvasamo okuti vana ankho Huku aavela ononkhano onongwa, tupu ankho ovahona. Mu Deuteronômio 8:18 tutangamo okuti: “Ove una okuhinangela Jeova Huku yove, mokonda oe ukuavela epondolo liokukala nolumono.” Otyo ankho tyavela ova Isilayeli onthumbi yokuti inkha vetavela ku Huku, oe makanena nawa elongo avakala ovahona.
Okuti otyo tyilekesa okuti kese muumbili wa Huku makala omuhona? Job omulume wekolelo wali omuhona omunene. Etyi Satanasi emukalesa omuhepi, Jeova akondolela Job ouhona wae “okumuyawisilako vali” atyiho ali natyo. (Jó 1:3; 42:10) Abraiau tupu nae ankho omuhona. Gênesis 13:2 yati oe ankho “una onohambo mbovipako, no palata, no olu.” Etyi omatolopa ono hamba ononkhuana mbo Koutundilo elipaka kumwe, atyinda Lote otyimphumba tyae, Abraiau “waihana ovalume valongoka ankho ena, ovityita vitatu novapika ekwi netyinana vatyitilwa meumbo liae.” (Gênesis 14:14) ‘Novalume ovo 318 valongoka’, ovanongo kokuundapesa omitunga, otyo tyilekesa okuti Abraiau ankho una otyikumba otyinyingi meumbo. Okutekula ombunga oyo onene, tyalekesa okuti oe ankho una olumono olunyingi, no nohambo ononene mbovipako.
Tyotyili, ovaumbili ovanyingi va Huku kohale, nga Abraiau, na Isake, Jako, David, na Salomau, okutumbula vala vamue, vali ovahona. Okuti otyo tyilekesa okuti kese muumbili, Huku memukalesa omuhona? Ine otyo, tyilekesa okuti kese munthu wokuahepa, kapandelwe na Huku? Onthele mailandulako, maikakumbulula omapulo oo.