Landula Ongeleka Yovauli—Joel
1. Oñgeni tuhetekela omutima weliola wa Joele tyina tuivisa?
1 Omuuli Joele ankho omunthu patyi? Etyi apopia vala konthele yae, okuti ankho “omona wa Petuele.” (Joel 1:1) Omuuli oo ankho weliola omutima watonekele okupopia ondaka ya Jeova, ahapopi otyilinga tyae tyoutumwa ndaka. Tupu, nonthue tyina tukahi movilinga vietu viokuivisa katuliovolela omunkhima ine okupandwa, mahi tupopia vali konthele ya Jeova Nombimbiliya. (1 Cor. 9:16; 2 Cor. 3:5) Ngotyo, onondaka tuivisa hono mbapama unene. Ovipuka patyi meulo lia Joele vituavela ombili nekevelelo hono?
2. Tyina tuete okuti onthiki ya Jeova ikahi popepi tyitulunda okulinga tyi?
2 “Onthiki ya Jeova Ikahi Popepi.” (Joel 1:15): Namphila onondaka ombo mbahonekwa omanima omanyingi kohale, hono tukahi momuvo onondaka ombo mbukahi nokufuiswapo. Ovivi vikahi nokuliyawisa novanthu vomupenyo tuvasa movilinga viokuivisa, tyilekesa okuti onthyulilo youye uno wovivi ikahi popepi. (2 Tim. 3:1-5; 2 Ped. 3:3, 4) Tyina tutala ehangununo lionthyulilo, tuna ehunga enene liokupaka ovilinga viokuivisa tete momuenyo wetu.—2 Ped. 3:11, 12.
3. Omokonda okuivisa tyakolela unene tyina ononkhumbi ononene mbukahi nokuhikapo?
3 “Jeova Makaholeka Ovanthu Vae.” (Joel 3:16): Okuteketa kuapopiwa moversikulu ei, kulekesa vala onthiki yekoyeso liae mokueenda kuononkhumbi ononene. Tyituhambukiswa unene okunoñgonoka okuti Jeova makayovola ovaumbili vae vekolelo monthiki oyo. (Rev. 7:9, 14) Tyina tuundapa nombili movilinga viokuivisa nokutala oñgeni Jeova etutekula nokutupameka, tyipameka ekolelo lietu nonthumbi yokuti metukuatesako tyina ononkhumbi ononene mbameya.
4. Oityi tuhambukilwa nokutala komutwe nonthumbi?
4 Namphila onondaka mba Joele ankho mbahonekwa nomunthu ankho wanumana, mahi mbuavela ovanthu va Huku ekevelelo lieyovo lihambukiswa. (Joel 2:32) Tutalei komutwe nonthumbi nokuivisa nombili onondaka onongwa mbouhamba wa Huku tyina tutehelela onondaka mba Joel 2:23 mbati: “Hambukilwei Jeova Huku yenyi.”