Okuti Ovana Vove Vafuapo Nawa?
1. Omokonda yatyi ovana vokuenda kosikola vesukisa okulipongiya?
1 Kuakamba vala katutu opo ovana vapewe onofelia kosikola. Ovana venyi tyotyili vakala novitateka nokuhongiliyua. Ovo tupu vakalele no nomphitilo “mbokuava oumbangi konthele yotyili.” (João 18:37) Okuti vafuapo?
2. Opo ovana vakale tyelipongiya oityi vena okunoñgonoka?
2 Ovana vove vanoñgonoka nawa oityi tyihangununa okuhaende movipito viomouye iya omokonda yatyi okuenda kovipito ovio katyaviukile? Okuti velipongiya pala omahongaiyo vapondola okuvasa, okulongeswa monosikola ononene, okulipola konomphunga, nokupuena ine okunwa ovikunwa vikoleswa? Ovo vapopia vala okuti ongeleya yavo yeveilika ine vetyivila okuhangununa omatavelo avo?—1 Ped. 3:15.
3. Oñgeni ovohe vapondola okupongiya ovana vavo Melilongeso Liombimbiliya Mombunga?
3 Elilongeso Liombimbiliya Mombunga: Okulinga ononkhono pala okupopia ovipuka viokosikola tyina nkhele ovana vekahi monofelia matyivekuatesako okukala nonthumbi. Omokonda yatyi muehetyilingi like ine ovikando ovikuavo Melilongeso Liombimbiliya Mombunga? Opo utyivile okutala etyi mamulilongesa, upondola okupula ovana vove oityi tyiveetela vali otyiho tyina vasoka okuhimbika okuenda kosikola. Ononthele muelilongesa omanima okualamba, mupondola okulilongesa mbo vali mokonda pahe ovana vekula iya vanoñgonoka vali nawa ovipuka. (Sal. 119:95) Upondola okukutikinyamo ononthele omu ove ukala omulongesi ine omulongwa omukuavo. Longesa ovana vove oñgeni mavaundapesa Ombimbiliya nomikanda Raciocínios, os Jovens Perguntam pala okukumbulula omapulo. He umwe ulongesa ovana vae opo velipongiye okupopia novalongesi vavo kese nima tyina vahimbika okulongeswa kosikola okuti Tunombangi mba Jeova.—Tala mo Sentinela 15 ya Dezembro yo 2010, pomafo 3-5.
4. Oityi ovohe ovanongo valinga?
4 Ovitateka ovakuendye novahikuena Ovakristau valwa navio mononthiki mbahulililako ‘nokuepuiya’ vikahi nokuliyawisa. (2 Tim. 3:1) Ovohe ovanongo vaovola okusoka liwa ovitateka ovana vapondola okukala navio iya avevelongesa okutetulula ovitateka ovio. (Pro. 22:3) Ukahi nokukuatesako ovana vove opo vakale tyafuapo.